Yuhanna 4 - Fulfulde Bible

Yeesu e debbo Samariyaajo

¹ Farisa'en nani Yeesu ɗon waɗana yimɓe baptisma, ɗon heɓa pukara'en ko ɓuri Yuhanna.

² Gooŋga man kam, Yeesu bee hoore muuɗum waɗanaay koo gooto baptisma, ammaa ɗum pukara'en maako mbaɗata ɗum.

³ Nde Yeesu nani haala ka'a, o acci lesdi Yahudiya, o lori haa lesdi Galiili.

⁴ Ngam yahugo ton sey o saalo nder lesdi Samariya.

⁵ O yotti berniwol bi'eteeŋgol Sikar nder lesdi Samariya, ɓadiiŋgol bee ngesa ka Yaakubu hokkuno ɓiyum Yusufu.

⁶ Ɓulndu Yaakubu ɗon ton. Yeesu somi bee jahaaŋgal, o jooɗi dow ɓulndu. Ɗum caka nyalawma.

⁷ Debbo Samariyaajo wari nyeɗugo ndiyam. Yeesu wi'i mo: “Hokkam ndiyam mi yara.”

⁸ Yaake man pukara'en maako njehino haa berniwol ngam soodoygo nyaamdu.

⁹ Debbo Samariyaajo go wi'i Yeesu: “An a Yahuuduujo, min boo mi Samariyaajo, noy a ƴamratammi ndiyam yarugo?” Ngam walaa ko yaali Yahuudu'en bee Samariya'en.

¹⁰ Yeesu jaabi mo: “To a anndino dokkal Allah, to a anndino boo moy ƴami ma ndiyam yarugo, a ƴamanno mo, o hokke ndiyam ndokkanɗam ngeendam.”

¹¹ Debbo wi'i mo: “Moodibbo, a walaa cafgal, ɓulndu boo luggi. Noy a heɓrata ndiyam ngeetam man?

¹² Kadi a ɓuri kaaka amin Yaakubu dokkuɗo min ɓulndu ndu'u, kaŋko bee hoore maako e ɓikkoy maako ɓe njari haa maaru, non boo dabbaaji maako na?”

¹³ Yeesu jaabi mo: “Koo moy yari ndiyam ɗa'am, ɗomɗan fahin.

¹⁴ Ammaa jaranɗo ndiyam ɗam mi hokkata mo, meetataa ɗomɗugo sam. Ndiyam ɗam mi hokkata mo, laatoto seeɓoore nder maako, seeɓoore ndiyam ndokkanɗam mo ngeendam nduumiiɗam.”

¹⁵ Debbo go wi'i mo: “Moodibbo, hokkam ndiyam man, ngam taa mi meeta ɗomɗugo fahin, mi hisa loraago nyeɗugo ndiyam haa ɗo.”

¹⁶ Yeesu wi'i mo: “Yah ewnoya gorko ma, on ngara haa ɗo.”

¹⁷ Debbo jaabi mo: “Mi walaa gorko.” Yeesu wi'i mo: “A wolwi gooŋga nde a wi'i a walaa gorko.

¹⁸ Ngam a woodino worɓe njowo, mo a wondi jonta, naa o gorko ma. Ko a wi'i, ɗum gooŋga.”

¹⁹ Nden debbo go wi'i mo: “Moodibbo, mi faami a annabiijo.

²⁰ Kaakiraaɓe amin cujidani Allah dow hooseere nde'e, ammaa onon, on ɗon mbi'a Urusaliima tan woni nokkuure sujidango Allah.”

²¹ Yeesu wi'i mo: “Debbo, jaɓ ko mi wi'ete: Saa'i waran, nde on cujidanta Allah Baabiraawo, naa dow hooseere nde'e, naa haa Urusaliima.

²² Onon Samariya'en on anndaa mo on cujidanta, ammaa minin Yahuudu'en min anndi mo min cujidanta, ngam kisndam iwi haa Yahuudu'en.

²³ Ammaa saa'i waran, ɗum waɗi jonta ma, sujidooɓe bee gooŋga cujidanan Baabiraawo nder Ruuhu e gooŋga. Ngam ɗum irin sujidooɓe ɓe'e Baabiraawo ɗaɓɓata.

²⁴ Allah o Ruuhu, sey sujidanooɓe mo, cujidana mo nder Ruuhu e gooŋga.”

²⁵ Debbo wi'i mo: “Mi anndi Almasiihu, waato moytaaɗo waran. To o wari, o anndinan min kuuje fuu.”

²⁶ Yeesu wi'i mo: “Min bolwananɗo ma woni kaŋko.”

²⁷ Saa'i man pukara'en maako lortoyi. Ɓe kayɗini nde ɓe ngi'i o ɗon wolida bee debbo. Ammaa walaa koo gooto maɓɓe wi'i: “Ko ɗaɓɓata?” Malla: “Ngam ɗume mbolididta bee debbo oo?”

²⁸ Debbo acci mbulku muuɗum, lori nder berniwol, wolwani yimɓe, o wi'i:

²⁹ “Ngare, ndaare goɗɗo mo yecci yam ko mi waɗi fuu. Teema kaŋko woni Almasiihu?”

³⁰ Yimɓe ngurti berniwol, njehi haa Yeesu.

³¹ Saa'i man pukara'en ɗonno toro Yeesu ngam o nyaama, ɓe ɗonno mbi'a mo: “Moodibbo, nyaam.”

³² Ammaa o wi'i ɓe: “Mi woodi nyaamdu ndu on anndaa.”

³³ Pukara'en ƴamƴamtiri: “Woodi mo waddani mo nyaamdu na?”

³⁴ Yeesu wi'i ɓe: “Nyaamdu am woni waɗugo muuyo nelɗo yam e hiɓɓingo kuugal ngal o umri yam.

³⁵ Naa on ɗon mbi'a lutti lebbi nayi haa wakkati codol waɗa? Ammaa mi ɗon wi'a on, ɓaŋgte gite mon, ndaare gese, ƴaamnde ɓenndi, deydey sodugo.

³⁶ Diga jonta wakkati waɗi, codoowo ɗon jaɓa ngeenaari muuɗum, o ɗon mooɓta cammeeje ngam ngeendam nduumiiɗam, ngam haa mo saaki aawdi e mo sodi nyaamle fuu ceyodo.

³⁷ Oo saakan, oya boo sodan, balndol ngo'ol wi'i gooŋga.

³⁸ Mi neli on sodugo haa on kuuwaay sam, woɗɓe kuuwi, onon boo on ɗon naftoro kuuɗe maɓɓe.”

³⁹ Samariya'en ɗuuɗɓe nder berniwol man nuɗɗini Yeesu ngam seedamku ngu debbo seeduno: “O yecci yam ko mi waɗi fuu.”

⁴⁰ Ngam maajum, nde Samariya'en ngari haa Yeesu, ɓe tori mo o jooɗo haa maɓɓe. Yeesu jooɗi ton nyalɗe ɗiɗi.

⁴¹ Ɗuuɗɓe nuɗɗini Yeesu ngam daliila bolle maako.

⁴² Ɓe ɗonno mbi'a debbo: “Naa ngam daliila bolle ma fahin min nuɗɗini jonta, ammaa ngam minin bee ko'e amin min nani ko o wi'i, min anndi fakat kaŋko woni kisnoowo duniyaaru.”

Yeesu yamɗitini ɓiŋngel mawɗo

⁴³ Ɓaawo paɓɓuki Yeesu ton nyalɗe ɗiɗi, o acci ɓe, o dilli haa lesdi Galiili.

⁴⁴ Ngam Yeesu bee hoore muuɗum wi'no: “Annabiijo heɓataa tedduŋgal nder lesdi muuɗum.”

⁴⁵ Ammaa nde o yotti lesdi Galiili, yimɓe ton njaɓɓi mo booɗɗum, ngam ɓe ngi'i ko o waɗno nder Urusaliima nder juulde Paska. Ngam kamɓe boo ɓe yahnooɓe juulde man.

⁴⁶ Nden Yeesu lori haa wuro Kana nder lesdi Galiili, haa o waylitino ndiyam, o laatinno ɗam inaboojam go. Woodino wakiiliijo laamiiɗo haa Kafarnahum ton, ɓiyum nyawɗo.

⁴⁷ Nde o nani Yeesu wari diga lesdi Yahudiya, o ɗon nder lesdi Galiili, o yehi haa maako, o tori mo o yaha o yamɗitina ɓiŋngel maako gonnooŋgel daande maayde.

⁴⁸ Yeesu wi'i mo: “To on ngi'aay alaamaaji e kaayeefiiji, on nuɗɗintaa!”

⁴⁹ Wakiiliijo go wi'i mo: “Moodibbo, war saare am hiddeko ɓiŋngel maaya!”

⁵⁰ Yeesu wi'i mo: “Hootu, ɓiŋngel ma yeeɗiti.” Goɗɗo oo nuɗɗini ko Yeesu wi'i mo, o hooti.

⁵¹ Diga o ɗon dow laawol tawon, o fotti bee huuwooɓe maako, ɓe mbi'i mo: “Ɓiŋngel maaɗa yamɗiti.”

⁵² O ƴami ɓe: “Wakkatiire ndeye ngel heɓi daama?” Ɓe njaabi mo: “Keenya deydey zuura yontere acci ngel.”

⁵³ Baaba maagel siftori ɗum waɗi deydey saa'iire nde Yeesu wi'no mo: “Ɓiŋngel maaɗa yeeɗiti.” Nden kaŋko e yimɓe saare maako fuu ɓe nuɗɗini Yeesu.

⁵⁴ Kanjum woni kaayeefiwol ɗiɗaɓol ngol Yeesu waɗi ɓaawo o wurti Yahudiya, o warti Galiili.