Yuhanna 20 - Fulfulde Bible

Yenaande sookre

¹ Nyalaade aranndeere, waato nyannde Alat, fajiri cub, diga weetaay booɗɗum tawon, Mariyama mo Magdala yehi haa yenaande. O yi'i hayre sottinaama diga hunnduko yenaande.

² O doggi, o yehi haa Simon Piyer e pukaraajo giɗaaɗo Yeesu. O wi'i ɓe: “Ɓe kooci ɓanndu Jawmiraawo diga yenaande, min anndaa haa ɓe mballinoyi ndu!”

³ Piyer e pukaraajo oya go ngurti, ndilli haa yenaande.

⁴ Ɓe ndoggi ɓe ɗiɗo fuu, ammaa pukaraajo oya go ɓuri Piyer pargal, o aarti yottaago haa yenaande.

⁵ O yurni nder yenaande, o yi'i leppi ɗon mbaali, ammaa o nastaay.

⁶ Nden Piyer mo tokkino mo go boo yotti, nasti yenaande, o yi'i leppi ɗon mbaali.

⁷ Leppol ngol ɓe caawino hoore Yeesu bee maajum wondaay bee leppi goɗɗi go, ammaa ngol ɗon taggi, waali haa pellel goɗŋgel.

⁸ Nden pukaraajo aartuɗo yottaago haa yenaande go boo nasti. O yi'i, o nuɗɗini.

⁹ Haa wargo wakkati man fuu ɓe paamaayno ko Deftere wi'i tawon. Ngam nde wi'i Yeesu ummititto caka maayɓe.

¹⁰ Nden pukara'en ɗiɗo go kooti.

Yeesu waŋgani Mariyama mo Magdala

¹¹ Mariyama ɗonno dari haa yaasi, kommbi yenaande, o ɗonno woya. Wakkati o ɗonno woya, o turi, o yurni nder yenaande,

¹² o yi'i malaa'ika'en ɗiɗo, ɓe ɗon ɓorni limce daneeje, ɓe ɗon njooɗi haa nokkuure nde ɓanndu Yeesu wonno, gooto gal hoore, gooto boo gal kosɗe.

¹³ Ɓe mbi'i mo: “Debbo, koni mboyata?” O jaabi: “Ɓe kooci ɓanndu Jawmiraawo am, mi anndaa haa ɓe mballinoyi ndu.”

¹⁴ Nde o wolwi bolle ɗe'e, o yeesiti, o yi'i Yeesu ɗon dari, ammaa o anndaa ɗum Yeesu.

¹⁵ Yeesu wi'i mo: “Debbo, koni mboyata? Moy a tefata?” Mariyama tammi ɗum kuuwoowo jarne. O wi'i mo: “Jawmam, to an hooci ndu, wi'am haa a wallinoyi ndu, haa mi yaha, mi hooca ndu.”

¹⁶ Yeesu wi'i mo: “Mariyama!” Mariyama wayliti haa maako, wi'i mo bee Ibraniŋkeere: “Rabbuni!” Bana wi'go Moodibbo.

¹⁷ Yeesu wi'i mo: “Taa meemam, ngam mi siwaa eeŋgtugo haa Baabiraawo am. Ammaa yah, wi' deerɗiraaɓe am, mi ɗon eeŋgta haa Baabiraawo am, laatiiɗo Baabiraawo mooɗon boo, haa Allah am, laatiiɗo Allah mooɗon boo.”

¹⁸ Nden Mariyama mo Magdala dilli, wi'i pukara'en: “Mi yi'i Jawmiraawo”, nden o yecci ɓe ko Yeesu wi'no mo.

Yeesu waŋgani pukara'en muuɗum

¹⁹ Nyannde Alat man, nde jemma waɗi, pukara'en ɗon mooɓi nder suudu. Ɓe kuɓli dammugal, ngam ɓe ɗonno kula Yahuudu'en. Yeesu wari, dari caka maɓɓe, wi'i ɓe: “Salaaman wonda bee mooɗon!”

²⁰ Nde o wolwani ɓe bolle ɗe'e, o holli ɓe juuɗe maako e wuttudu maako. Nde pukara'en ngi'i Jawmiraawo, ɓerɗe maɓɓe keewi seyo.

²¹ Yeesu wi'i ɓe fahin: “Salaaman wonda bee mooɗon. Bana no Baabiraawo neli yam, min boo mi ɗon nela on.”

²² Nde o wolwani ɓe bolle ɗe'e, o fuufi dow maɓɓe, o wi'i: “Njaɓe Ruuhu Ceniiɗo!

²³ Ɓe on njaafani hakke muuɗum'en, keɓan yaafuye, ɓe on njaafanaaki boo, keɓataa yaafuye.”

Tomas e Yeesu

²⁴ Nde Yeesu warino haa pukara'en, gooto nder maɓɓe, Tomas bi'eteeɗo Ciwto, wondaay bee maɓɓe.

²⁵ Pukara'en woɗɓe mbi'i mo: “Min ngi'i Jawmiraawo.” Ammaa Tomas wi'i ɓe: “To mi yi'aay ɓattajje suufuuje nder juuɗe maako, to mi meemaay ɗe bee hoondu am, to mi nastinaay juŋngo am nder huuduure wuttudu maako boo, mi nuɗɗintaa sam.”

²⁶ Asaweere woore ɓaawoɗon, pukara'en ɗon mooɓti nder suudu fahin, Tomas ɗon wondi bee maɓɓe. Dammugal ɗon huɓli, ammaa Yeesu wari, dari caka maɓɓe, wi'i: “Salaaman wonda bee mooɗon.”

²⁷ Nden o wi'i Tomas: “Waddu hoondu ma haa ɗo, laar juuɗe am, waddu juŋngo ma, nastin ngo nder wuttudu am, accu waabaago, nuɗɗin.”

²⁸ Tomas jaabi mo: “Jawmiraawo am, Allah am!”

²⁹ Yeesu wi'i mo: “Jonta nde a yi'i yam a nuɗɗini na? Barka laatanto ɓe ngi'aay yam, ammaa ɓe nuɗɗini yam.”

Daliila deftere nde'e

³⁰ Yeesu waɗi kaayeefiiji goɗɗi ɗuuɗɗi yeeso pukara'en muuɗum, ɗi mbinndaaka nder deftere nde'e.

³¹ Ammaa ko winnda nder maare, ɗum winndaama ngam haa on nuɗɗina Yeesu woni Almasiihu, Ɓiɗɗo Allah, ngam on keɓra ngeendam nder innde maako bee nuɗɗingo mo.