Yuhanna 18 - Fulfulde Bible

Naŋngeeki Yeesu

¹ Nde Yeesu timmini bolle ɗe'e, o dilli bee pukara'en maako gaɗa maayel Kederon. Woodi jarne haa nokkuure man, o nasti ton bee pukara'en maako.

² Yahuuda, zammbotooɗo mo boo anndi nokkuure man, ngam Yeesu e pukara'en muuɗum mboowi hawtugo haa ton.

³ Yahuuda yahdi haa jarne man bee sooje'en e nelaaɓe mawɓe liman'en e Farisa'en, ɓe ɗon njogi balmi e pittirlaaji e jame yiite e balmi.

⁴ Yeesu anndi ko heɓata mo fuu. O wurti, o ƴami ɓe: “Moy on ɗaɓɓititta?”

⁵ Ɓe njaabi mo: “Min ɗon ɗaɓɓita Yeesu mo Nasaratu.” Yeesu wi'i ɓe: “Ɗum min.” Yahuuda, zammbotooɗo mo boo ɗon darodi ton bee maɓɓe.

⁶ Nde Yeesu wi'i: “Ɗum min”, ɓe lori ɓaawo ɓaawo, ɓe ndo'i haa lesdi.

⁷ Yeesu ƴami ɓe fahin: “Moy on ɗaɓɓititta?” Ɓe njaabi: “Yeesu mo Nasaratu.”

⁸ Yeesu wi'i: “Mi wi'i on, ɗum min. To ɗum min on ɗaɓɓititta kam, acce yimɓe ɓe'e ndilla.”

⁹ Ɗum laati non ngam gooŋɗingo wolde nde Yeesu wi'no: “Mi majjinaay koo gooto nder yimɓe ɓe a hokki yam.”

¹⁰ Simon Piyer woodino kaafahi, o losi ki, o soppi suka hooreejo liman'en, o ta'i mo nofru nyaamru. Innde suka oo, Malkus.

¹¹ Ammaa Yeesu wi'i Piyer: “Waatu kaafahi maaɗa haa suudu maaki. Mi yarataa jardugel bone ngel Baabiraawo am hokki yam na?”

Yeesu yeeso Annas

¹² Nden sooje'en e mawɗo maɓɓe e Yahuudu'en aynooɓe naŋngi Yeesu, kaɓɓi mo.

¹³ Aran ɓe njahri mo haa Annas, kaŋko woni esiraawo Kayafas, hooreejo liman'en hitaande maajum.

¹⁴ Kayafas woni mo sarwuno Yahuudu'en, wi'no ɓe: “Ndikka goɗɗo gooto maaya ngam ummaatoore fuu.”

Piyer yeddi Yeesu

¹⁵ Simon Piyer e pukaraajo feere ɗonno tokki Yeesu. Pukaraajo oo, hooreejo liman'en anndi mo, kaŋko o nastidi bee Yeesu haa daldal saare hooreejo liman'en.

¹⁶ Ammaa Piyer ɗonno dari yaasi, kommbi dammugal. Nden pukaraajo mo hooreejo liman'en anndi ɗum go wurti wolwani debbo aynanɗo dammugal, nastini Piyer nder saare.

¹⁷ Debbo man wi'i Piyer: “Naa an boo a pukaraajo gorko oo?” O jaabi: “Aa'a, naa ɗum min.”

¹⁸ Huuwooɓe e aynooɓe kuɓɓi yiite, ɗon aytino ton, ngam jaaŋgol ɗonno waɗa. Piyer boo ɗonno darodi bee maɓɓe, ɗonno aytino.

Hooreejo liman'en ƴami Yeesu

¹⁹ Nden hooreejo liman'en ƴami Yeesu dow haala pukara'en muuɗum e ekkitinol muuɗum.

²⁰ Yeesu jaabi mo: “Mi wolwi bee baŋguɗum yeeso yimɓe fuu. Foroy mi waazi nder cuuɗi dewal Yahuudu'en e nder haykaliiru, haa Yahuudu'en fuu mooɓtoto, mi wolwaay koo ɗume bee sirri.

²¹ Ngam ɗume a ƴamatammi? Ƴam nanɓe yam ko mi wolwani ɓe, kamɓe ɓe anndi.”

²² Nde Yeesu wolwi bolle ɗe'e, gooto nder aynooɓe maari mo, wi'i: “Bana nii a jaaborto hooreejo liman'en na?”

²³ Yeesu jaabi mo: “To kalluka mbolwumi, waŋgin ɗum. Ammaa to booɗɗum mbolwumi, koni a maari yam?”

²⁴ Nden Annas neldi mo o kaɓɓaaɗo haa Kayafas, hooreejo liman'en.

Piyer dullitini Yeesu fahin

²⁵ Simon Piyer ɗonno dari ton, ɗonno aytino. Nden ɓe mbi'i mo: “An boo naa a gooto nder pukara'en gorko oo na?” Ammaa o yeddi ɗum, o wi'i: “Aa'a, naa ɗum min.”

²⁶ Gooto nder suka'en hooreejo liman'en, banndiraawo goɗɗo mo Piyer ta'ino nofru mum go, wi'i mo: “Mi yi'aay ma nder jarne bee maako na?”

²⁷ Ammaa Piyer yeddi ɗum fahin. Saa'i man nden asgumri u'i.

Yeesu yeeso Pilaatu

²⁸ Jaŋngo maajum fajiri cub ɓe koo'i Yeesu haa saare Kayafas, ɓe njahri mo haa suudu kiita haa saare ngomna Roma'en. Yahuudu'en nastaay saare man, ngam taa ɓe coɓa, haa ɓe keɓa nyaamugo nyaamdu Paska.

²⁹ Nden Pilaatu, wurti, wari haa maɓɓe, ƴami ɓe: “Ɗume on ngullori goɗɗo oo?”

³⁰ Ɓe njaabi mo: “To o laataakino kalluɗo, min ngaddataano mo haa maaɗa.”

³¹ Pilaatu wi'i ɓe: “Kooce mo onon, kiite mo fodde tawreeta mooɗon.” Yahuudu'en njaabi mo: “Ɗum duŋanaaki min min kiito goɗɗo kiita maayde.”

³² Ɗum laati non ngam gooŋɗingo bolle ɗe Yeesu wi'no, ngam tinndingo no o maayrata.

³³ Pilaatu nasti saare mum fahin, ewni Yeesu, ƴami mo: “An woni laamiiɗo Yahuudu'en na?”

³⁴ Yeesu jaabi: “A wi'i ɗum bee hoore ma naa malla woɗɓe ngecci ma ɗum?”

³⁵ Pilaatu jaabi: “Min mi Yahuuduujo na? Yimɓe ummaatoore maaɗa e mawɓe liman'en ngulli ma haa am. Ɗume a waɗi?”

³⁶ Yeesu jaabi: “Laamu am laataaki laamu duniyaaru ndu. To laamu am laatino ngu duniyaaru ndu, jaggiiɓe am ngaranno haɓugo ngam am, ngam taa mi nasta juuɗe Yahuudu'en. Ammaa gooŋga laamu am laataaki laamu duniyaaru ndu.”

³⁷ Pilaatu ƴami mo: “A laamiiɗo kadi na?” Yeesu jaabi: “An maa a wi'i ɗum: Mi laamiiɗo. Mi danyaama, mi wari nder duniyaaru ndu'u ngam mi seedano gooŋga. Koo moy yiɗi gooŋga, heɗititto ko mi wi'ata.”

³⁸ Pilaatu ƴami mo: “Ɗume woni gooŋga?” Nden Pilaatu wurti fahin, wari haa Yahuudu'en, wi'i ɓe: “Min mi tawaay daliila hiitaago gorko oo sam.

Yeesu hiitaama kiita maayde

³⁹ Ammaa bana ko woowa haa mooɗon, juulde Paska fuu, mi yoofanan on kaɓɓaaɗo gooto mo on ngiɗi. On ngiɗi mi yoofana on laamiiɗo Yahuudu'en na?”

⁴⁰ Ammaa ɓe ngooki fahin, ɓe mbi'i: “Aa'a, naa kaŋko a yoofata, min ngiɗi a yoofana min Barabbas!” Barabbas man o pasoowo.