Yuhanna 13 - Fulfulde Bible

Yeesu looti kosɗe pukara'en muuɗum

¹ Lutti nyalaade woore haa juulde Paska waɗa. Yeesu anndi saa'i muuɗum wari haa o acca duniyaaru, o hoota haa Baabiraawo. O yiɗi yimɓe maako nder duniyaaru, o yiɗi ɓe haa timmoode.

² Yeesu e pukara'en muuɗum ɗonno nyaamda, nden Iblisa waɗi numo nder ɓernde Yahuuda, ɓii Simon Iskariyot, ngam o zammbo Yeesu.

³ Yeesu anndi, o wari diga Allah, o loroto haa Allah, o anndi boo Allah hokki mo baawɗe dow koo ɗume fuu.

⁴ O acci nyaamugo, o ɓorti ngapaleewol maako, o haddi gudel.

⁵ Nden o waɗi ndiyam haa taasawo, o fuɗɗi lootugo kosɗe pukara'en, o woosti ɗe bee gudel ngel o haddi.

⁶ Nden o wari haa Simon Piyer. Piyer wi'i mo: “Jawmiraawo, an, a lootantam kosɗe?”

⁷ Yeesu jaabi mo: “Jonta a anndaa ko mi waɗata tawon, ammaa a faaman ɗum yeeso seɗɗa.”

⁸ Piyer wi'i mo: “Aa'a, a lootantaa yam kosɗe sam.” Yeesu wi'i mo: “To mi lootanaay ma kosɗe, a walaa geɗal haa am.”

⁹ Simon Piyer wi'i mo: “Jawmiraawo, nden kam naa kosɗe tan a lootantammi, ammaa lootanam juuɗe bee hoore fuu.”

¹⁰ Yeesu wi'i mo: “To goɗɗo yiiwake, o walaa haaje yiiwaago fahin. Sey kosɗe tan o lootata, ngam ɓanndu maako ɗon laaɓi. Onon on laaɓɓe, ammaa naa on fuu.”

¹¹ Yeesu anndi mo tammi zammbaago mo, ngam maajum o wi'i: “Naa on fuu on laaɓɓe.”

¹² Ɓaawo o timmini lootango ɓe kosɗe, o ɓorni ngapaleewol maako fahin, o jooɗi haa taabal nyaamugo, o wi'i ɓe: “On paami ko mi waɗani on na?

¹³ On ɗon ewno yam moodibbo e Jawmiraawo, ɗum booɗɗum, ngam mi moodibbo fakat.

¹⁴ To min moodibbo, Jawmiraawo, mi looti kosɗe mooɗon, nden kam haani onon boo on lootindira kosɗe mooɗon.

¹⁵ Mi hokki on misaalu, ngam haa onon boo on mbaɗa bana mi waɗani on.

¹⁶ Gooŋga mi wi'ata on: Kuuwoowo ɓurataa jaagorɗo muuɗum maŋngu, nelaaɗo boo ɓurataa nelɗo ɗum maŋngu.

¹⁷ To on anndi ɗum, barka laatanto on to on mbaɗi ɗum.

¹⁸ Mi wolwaay ɗum ngam mooɗon fuu, mi anndi suɓaaɓe am. Ammaa haani ko Deftere wi'i hiɓɓa: Mo ɗon nyaamda bee am, ummani yam.

¹⁹ Mi ɗon wi'a on ɗum jonta, diga ɗum siwaa laataago ngam haa on nuɗɗina, min woni mo ngonmi to ɗum waɗi.

²⁰ Gooŋga mi wi'ata on: Koo moy jaɓi nelaaɗo am, jaɓi yam min. Koo moy jaɓi yam, jaɓi nelɗo yam.”

Yeesu waŋgini Yahuuda zammboto mo

²¹ Ɓaawo Yeesu wolwi bolle ɗe'e, ɓernde maako sakli, o wi'i: “Gooŋga mbi'anmi on, gooto mooɗon zammboto yam.”

²² Pukara'en ndaarndaartiri, ɓe anndaa dow moy o wolwi.

²³ Pukaraajo mo Yeesu yiɗi ɗum, ɗonno kommbi Yeesu haa taabal.

²⁴ Simon Piyer ɓaaƴi mo ngam haa o ƴama Yeesu dow moy o wolwi.

²⁵ Pukaraajo man ɓaari Yeesu ƴami mo: “Jawmiraawo, ɗum moy?”

²⁶ Yeesu jaabi mo: “Mi suuwan loŋngere nder takay, mo mi hokkata nde woni kaŋko.” Nden Yeesu hoo'i loŋngere, suuwi nde nder takay, hokki nde Yahuuda ɓii Simon Iskariyot.

²⁷ Nde Yahuuda jaɓi loŋngere maajum, Sayɗaanu nasti ɓernde maako. Yeesu wi'i mo: “Ko a yiɗi waɗugo, waɗ ɗum law.”

²⁸ Walaa koo gooto nder maɓɓe, taariiɓe taabal faami ngam ɗume Yeesu wi'i mo ɗum.

²⁹ Nde nii Yahuuda woni jogoowo ceede, ɗuuɗɓe tammi Yeesu wi'no mo o yaha o sooda kuuje ɗe ɓe mari haaje ngam juulde malla o hokka talaka'en huunde woɗnde.

³⁰ Nde Yahuuda jaɓi loŋngere go, o wurti law. Ɗum jemma.

Umroore hesre

³¹ Nde Yahuuda wurti, Yeesu wi'i: “Jonta Ɓii-neɗɗo teddinaama, Allah boo teddinaama nder maako.

³² Nde nii Allah teddinaama nder Ɓiɗɗo, Allah boo waŋginan tedduŋgal ngal Ɓiɗɗo mari bee hoore muuɗum. Jonta nii o waɗan ɗum.

³³ Ɓikkoy am, mi ɗon wondi bee mooɗon saa'i seɗɗa tawon. Ɓaawoɗon on tefatam, ammaa mi ɗon wi'a on jonta ko mi wi'no Yahuudu'en: On mbaawataa yahugo haa njahanmi.

³⁴ Mi ɗon hokka on umroore hesre: Ngiɗindire! Bana mi yiɗiri on, ngiɗindire onon boo.

³⁵ Dow maajum yimɓe fuu anndan on pukara'en am, to on ɗon ngiɗindira.”

Yeesu e Piyer

³⁶ Simon Piyer wi'i Yeesu: “Jawmiraawo, toy njahataa?” Yeesu jaabi: “A waawataa tokkaago yam haa njahanmi jonta, ammaa yeeso seɗɗa, a tammi tokkaago yam.”

³⁷ Piyer wi'i mo: “Jawmiraawo, ngam ɗume mi waawataa tokkaago ma jonta? Mi hokkan yoŋki am, mi maaya ngam maaɗa!”

³⁸ Yeesu jaabi: “Gooŋga a hokkan yoŋki maaɗa ngam am na? Gooŋga mi ɗon wi'e: Hiddeko asgumri u'a, a wi'an nde tati a anndaa yam.”