Yuhanna 11 - Fulfulde Bible

Maayde Laazarus

¹ Woodino goɗɗo mo innde muuɗum Laazarus, o nyawi. Wuro maako, Baytaniya. Ɗum wuro ngo Mariyama e Marta deerɗum debbo ngoni haa muuɗum.

² Mariyama o debbo mo rufino uurdi dow kosɗe Jawmiraawo, mo yiggino ɗe bee gaasa muuɗum. Laazarus nyawɗo oo, ɗum deerɗiiko.

³ Deerɗiraaɓe rewɓe ɗiɗo ɓe'e neli goɗɗo haa Yeesu, ngam o wi'a mo: “Jawmiraawo, soobaajo maaɗa nyawɗo.”

⁴ Nde Yeesu nani ɗum, o wi'i: “Nyawu ngu'u maaynataa mo, ammaa ngu waŋginan tedduŋgal Allah, ngam haa Ɓiɗɗo Allah teddine daliila man.”

⁵ Yeesu yiɗi Marta e Mariyama e Laazarus.

⁶ Nde o nani Laazarus nyawɗo, o faɓɓi nyalɗe ɗiɗi fahin haa nokkuure nde o wonno.

⁷ Nden o wi'i pukara'en: “En lorto haa lesdi Yahudiya.”

⁸ Pukara'en mbi'i mo: “Moodibbo, neeɓaay Yahuudu'en ɗonno ɗaɓɓa fiɗugo ma bee kaa'e, nden a yiɗi loraago ton?”

⁹ Yeesu jaabi: “Naa woodi saa'iiji sappo e ɗiɗi nder nyalawmaare? To goɗɗo ɗon yaha bee nyalawma, o fergataako, ngam o ɗon yi'a annoora duniyaaru ndu'u.

¹⁰ Ammaa to goɗɗo ɗon yaha bee jemma, o fergoto, ngam o walaa annoora nder maako.”

¹¹ Ɓaawo wolwango ɓe bolle ɗe'e, o ɓesdi wi'ugo ɓe: “Soobaajo meeɗen Laazarus ɗaanake, ammaa mi yahan findingo mo.”

¹² Pukara'en njaabi mo: “Jawmiraawo, to o ɗaanake, o yamɗitan.”

¹³ Yeesu ɗonno wolwa dow haala maayde Laazarus, ammaa pukara'en tammino o ɗon wolwa haala ɗoyŋgol bee gooŋga.

¹⁴ Nden Yeesu wi'i ɓe bee laaɓɗum: “Laazarus maayi.

¹⁵ Ammaa ngam daliila mooɗon mi ɗon seyo ngam mi walaa ton, ngam haa on nuɗɗina. Jonta kam, ndillen haa maako.”

¹⁶ Tomas bi'eteeɗo Ciwto wi'i pukara'en woɗɓe: “Ndillen ton enen boo, ngam en maayda bee maako.”

Yeesu woni ummitinoowo e geeɗinoowo maayɓe

¹⁷ Nde Yeesu yotti Baytaniya, o tawi ɓe nastini ɓanndu Laazarus nder yenaande, waɗi nyalɗe nayi.

¹⁸ Baytaniya ɓadi bee Urusaliima, baakin kilomeetir tati.

¹⁹ Yahuudu'en ɗuuɗɓe ngari haa Marta e Mariyama, ngam de'itingo ɓe ngam maayde deerɗiraawo maɓɓe.

²⁰ Nde Marta nani Yeesu wari, o dilli fottoygo bee maako, ammaa Mariyama jooɗi haa saare.

²¹ Marta wi'i Yeesu: “Jawmiraawo, to a ɗonno ɗo, deerɗam maayataano.

²² Ammaa mi anndi, koo jonta boo, Allah hokkete ko a toroto mo fuu.”

²³ Yeesu wi'i mo: “Deerɗa ummititto.”

²⁴ Marta jaabi mo: “Mi anndi o ummititto saa'i ummitineeki maayɓe, nyalaade darŋgal.”

²⁵ Yeesu wi'i mo: “Min woni ummitinoowo e geeɗitinoowo. Koo moy nuɗɗini yam yeeɗan, koo to o maayi boo.

²⁶ Koo moy geeto, nuɗɗinɗo yam, maayataa sam. A nuɗɗini ɗum na?”

²⁷ Marta jaabi mo: “Ooho, Jawmiraawo, mi nuɗɗini an, a Almasiihu, Ɓiɗɗo Allah, garanɗo nder duniyaaru.”

Yeesu ilni gonɗi

²⁸ Ɓaawo bolle ɗe'e, Marta lori haa deerɗum Mariyama, wi'i mo bee sirri: “Moodibbo wari, o ɗon ewne.”

²⁹ Nde Mariyama nani ɗum, o ummi law, o yehi haa Yeesu.

³⁰ Yeesu nastaayno wuro tawon, o ɗon haa nokkuure nde Marta fottuno bee maako.

³¹ Yahuudu'en wondunooɓe bee Mariyama nder suudu ngam de'itingo mo ngi'i o ummi law, o wurti, ɓe tokki mo. Ɓe tammi o yahan haa yenaande ngam woyugo ton.

³² Nde Mariyama wari haa nokkuure nde Yeesu woni, o yi'i mo, o hofi les kosɗe maako, o wi'i mo: “Jawmiraawo, to a ɗonno ɗo, deerɗam maayataano.”

³³ Nde Yeesu yi'i o ɗon woya, Yahuudu'en warduɓe bee maako boo ɗon mboya, ɗum ummini ɓernde maako.

³⁴ O wi'i: “Haa toy on uwi mo?” Ɓe njaabi mo: “Jawmiraawo, war laar.”

³⁵ Yeesu ilni gonɗi.

³⁶ Yahuudu'en mbi'i: “Kay, ndaare no o yiɗiri mo!”

³⁷ Ammaa woɗɓe caka maɓɓe mbi'i: “Kaŋko mo wumtini wumɓe, o waawataano hisnugo Laazarus maayde na?”

Laazarus yeeɗitinaama

³⁸ Ɓernde Yeesu ummi fahin, o yehi haa yenaande. Ɗum lowol maɓɓaaŋgol bee hayre.

³⁹ Yeesu wi'i: “Cottine hayre.” Marta, deerɗu maayɗo wi'i: “Jawmiraawo, o haccan, ngam o waɗi nyalɗe nayi nder yenaande.”

⁴⁰ Yeesu wi'i mo: “Mi wi'aayno ma, to a nuɗɗini, a yi'an tedduŋgal Allah na?”

⁴¹ Ɓe cottini hayre go. Yeesu tijji asama, wi'i: “Yaa Baabiraawo, mi yetti ma ngam a nanani yam.

⁴² Min kam, mi anndi a ɗon nanammi foroy, ammaa mi wi'i ɗum ngam mooɓre yimɓe dariiɓe haa ɗo, ngam haa ɓe nuɗɗina an neli yam.”

⁴³ Nde o wolwi bolle ɗe'e, o hooli bee sawtu: “Laazarus, wurta!”

⁴⁴ Maayɗo wurti, kosɗe e juuɗe maako ɗon taari bee leppi, yeeso maako boo saawaaŋgo bee leppol. Yeesu wi'i ɓe: “Piiste mo, acce mo o dilla.”

Dabare naŋngugo Yeesu

⁴⁵ Yahuudu'en ɗuuɗɓe warɓe haa Mariyama ngi'i ko Yeesu waɗi, ɓe nuɗɗini mo.

⁴⁶ Ammaa woɗɓe caka maɓɓe njehi haa Farisa'en, ngecci ɓe ko Yeesu waɗi.

⁴⁷ Farisa'en e mawɓe liman'en ndawridi, mbi'i: “Ɗume en mbaɗata? Ngam gorko oo ɗon waɗa kaayeefiiji ɗuuɗɗi.

⁴⁸ To en acci mo o ɗon waɗa bana nii, yimɓe fuu nuɗɗinan mo. Nden mawɓe Roma'en nastanɓe haala man, kalkan haykaliiru meeɗen e ummaatoore meeɗen!”

⁴⁹ Gooto caka maɓɓe, mo innde muuɗum Kayafas, kaŋko woni hooreejo liman'en hitaande man, wi'i ɓe: “Onon walaa ko on paamata.

⁵⁰ On paamataa to goɗɗo gooto maayi ngam jama'aare fuu, ɗum ɓuran wooɗugo dow halkere ummaatoore fuu na?”

⁵¹ O wolwaay bolle ɗe'e bee ngiɗa maako. Ammaa nde o hooreejo liman'en hitaande man, o waɗi annabaaku, o wi'i Yeesu maayan ngam ummaatoore Yahuudu'en fuu,

⁵² naa ngam ummaatoore maajum tan, ammaa ngam o hawta ɓiɓɓe Allah saŋkitiiɓe fuu boo.

⁵³ Diga nyannde man, mawɓe Yahuudu'en koo'i anniya mbarugo Yeesu.

⁵⁴ Ngam man Yeesu meetaay waancugo bee baŋguɗum caka Yahuudu'en. O dilli haa nokkuure kommbi ladde, haa wuro wi'eteeŋgo Efrayim, ton o faɓɓidi bee pukara'en maako.

⁵⁵ Juulde Yahuudu'en wi'eteende Paska ɓadake, yimɓe gure feere feere njehi Urusaliima diga juulde man siwaa, ngam ɓe cena ko'e maɓɓe.

⁵⁶ Ɓe ɗonno tefa Yeesu, ɓe ɗonno ƴamƴamtira hakkunde maɓɓe nde ɓe ɗonno ndari nder haykaliiru: “Ɗume numɗon? O warataa juulde sam na?”

⁵⁷ Mawɓe liman'en e Farisa'en umrino, to goɗɗo anndi haa Yeesu woni, sey o fefta mo ngam ɓe naŋnga mo.