Yuhanna 1 - Fulfulde Bible

Almasiihu bi'eteeɗo Wolde

¹ Haa fuɗɗam, woodi bi'eteeɗo Wolde. Wolde man ɗonno haa kommbi Allah, kayre woni Allah.

² Nde ɗonno haa kommbi Allah diga fuɗɗam.

³ Allah tagri koo ɗume fuu bee maare, walaa ko taga bilaa maare.

⁴ Ngeendam iwi haa maare, ngeendam man woni annoora yimɓe.

⁵ Annoora ɗon yayna nder nyiɓre, ammaa nyiɓre waawaay haɗugo ka.

⁶ Allah neli goɗɗo mo innde muuɗum Yuhanna.

⁷ O wari ngam seedanaago annoora go, ngam haa yimɓe fuu nuɗɗina ka.

⁸ O laataaki annoora kaŋko bee hoore maako, ammaa o wari seedanaago annoora.

⁹ Wolde go woni annoora ngooŋɗuka, ka wari nder duniyaaru, ka ɗon yaynana yimɓe fuu.

¹⁰ Wolde man ɗonno nder duniyaaru, Allah tagri duniyaaru bee maare, ammaa duniyaaru annditaay nde.

¹¹ Nde wari haa yimɓe maare, ammaa yimɓe maare njaɓaay nde.

¹² Ammaa haa jaɓɓe nde, nuɗɗinɓe nde fuu, nde hokki ɓe baawɗe laataago ɓiɓɓe Allah.

¹³ Ɓe ndanyaaka fodde ɗabiya yimɓe malla muuyo yimɓe, ammaa ɗum Allah laatini ɓe ɓiɓɓe muuɗum.

¹⁴ Wolde go laati neɗɗo marɗo ɓanndu, o jooɗi caka meeɗen. O keewɗo mo'ere e gooŋga. Min ngi'i tedduŋgal maako, ɗum tedduŋgal Ɓiɗɗo bajjo mo Baabiraawo.

¹⁵ Yuhanna seedani mo, wolwi bee sawtu, wi'i: “Kaŋko woni mo mi wolwi dow muuɗum, mi wi'i: O waran ɓaawo am, ammaa o ɓuri yam, ngam o ɗon diga mi siwaa danyeego.”

¹⁶ En fuu en keɓi geɗal meeɗen haa jeynitaaje maako, en keɓi mo'ere dow mo'ere.

¹⁷ Tawreeta hokkaama bee juŋngo Muusa, ammaa mo'ere e gooŋga mbaŋgi bee Yeesu Almasiihu.

¹⁸ Walaa mo meeɗi yi'ugo Allah. Ammaa Ɓiɗɗo bajjo, ɗakkotirɗo bee Baabiraawo, kaŋko anndini en mo.

Waazu Yuhanna baɗoowo baptisma

¹⁹ Ndaa seedamku Yuhanna nde Yahuudu'en Urusaliima neli liman'en e Lewi'en haa maako ngam ƴamugo mo: “An a moye?”

²⁰ O salaaki jaabaago, o waŋgini ɗum laaɓɗum, o wi'i: “Naa min woni Almasiihu.”

²¹ Ɓe ƴami mo: “A moy kadi? A Eliya na?” O jaabi: “Aa'a, naa mi Eliya.” Ɓe mbi'i: “A annabiijo mo min ndeenata na?” O jaabi: “Aa'a.”

²² Ɓe mbi'i mo: “E a moy kadi? Haa min keɓa lornango nelɓe min jaawaabu. Ɗume a wi'anta hoore ma, an?”

²³ O jaabi: “Min woni mo annabi Esaaya wolwi dow muuɗum, wi'i: Goɗɗo ɗon hoola nder ladde, ɗon wi'a: Mbaɗane Jawmiraawo laawol darnuŋgol.”

²⁴ Nelaaɓe warɓe haa Yuhanna go, ɗum Farisa'en.

²⁵ Ɓe ƴami mo: “To a laataaki Almasiihu malla Eliya malla boo annabiijo go, ngam ɗume a ɗon waɗa baptisma?”

²⁶ Yuhanna jaabi ɓe: “Min mi ɗon waɗa baptisma nder ndiyam, ammaa woodi goɗɗo caka mooɗon, on anndaa mo.

²⁷ O waran ɓaawo am, ammaa mi he'aay koo fiistugo ɓoggi paɗe maako.”

²⁸ Fuu ɗum waɗi haa wuro Baytaniya, gaɗa maayo Urdun, haa Yuhanna waɗanta yimɓe baptisma.

Yeesu woni jawgel Allah

²⁹ Jaŋngo man Yuhanna yi'i Yeesu ɗon wara haa maako, o wi'i: “Ndaa jawgel Allah ittanŋgel hakkeeji duniyaaru.

³⁰ Kaŋko woni mo mi wolwani on haala mum, mi wi'i: Goɗɗo waran ɓaawo am, ammaa o ɓuri yam, ngam o ɗon diga mi siwaa danyeego.

³¹ Mi anndaano mo, ammaa mi wari waɗugo baptisma bee ndiyam ngam haa o waŋgana Isra'iila'en.”

³² Yuhanna waɗi seedamku, wi'i fahin: “Mi yi'i Ruuhu Allah jippi diga asama bana poola, wari jooɗi dow maako.

³³ Min mi anndaano mo, ammaa Allah mo neli yam waɗugo baptisma bee ndiyam, wi'i yam: A yi'an Ruuhu jippoto, jooɗo dow goɗɗo, kaŋko o waɗan baptisma bee Ruuhu Ceniiɗo.”

³⁴ Min mi yi'i ɗum, mi seedake kaŋko woni Ɓiɗɗo Allah.

Pukara'en Yeesu aartuɓe

³⁵ Jaŋngo man Yuhanna ɗonno dari fahin haa nokkuure go tawon bee pukara'en muuɗum ɗiɗo.

³⁶ Nde o yi'i Yeesu ɗon saalo, o wi'i: “Ndaa jawgel Allah.”

³⁷ Pukara'en ɗiɗo go nani ko o wi'i, ɓe tokki Yeesu.

³⁸ Yeesu yeesiti, yi'i ɓe ɗon tokki mo, o ƴami ɓe: “Ko ɗaɓɓititton?” Ɓe mbi'i mo: “Rabbi, toy njooɗiiɗaa?” Rabbi yiɗi wi'go moodibbo.

³⁹ O wi'i ɓe: “Ngare, on ngi'an.” Nden ɓe njehi, ɓe ngi'i haa o jooɗi. Nyannde man ɓe kiirtidi, ɗum ɗonno baakin saa'a nayi.

⁴⁰ Andire deerɗiraawo Simon Piyer, o gooto nder nanɓe seedamku Yuhanna, kaŋko o tokki Yeesu.

⁴¹ Andire tawi deerɗum Simon aran, wi'i mo: “Min tawi Almasiihu.” Almasiihu yiɗi wi'go moytaaɗo.

⁴² O yahri mo haa Yeesu. Yeesu laari mo, wi'i: “An woni Simon ɓii Yuhanna, yeeso ɗo innde ma laatoto Kefas. Kefas yiɗi wi'go Tapaare.”

Yeesu ewni Filip e Natanayel

⁴³ Jaŋngo man, Yeesu yiɗi yahugo lesdi Galiili. O tawi Filip, o wi'i mo: “Tokkam!”

⁴⁴ Filip iwi wuro Baytisayda, wuro maako wooto bee Andire e Piyer.

⁴⁵ Filip boo tawi Natanayel, wi'i mo: “Min tawi mo Muusa wolwi dow muuɗum nder tawreeta e annabi'en boo mbolwi haala maako, kaŋko woni Yeesu mo Nasaratu, ɓii Yusufu.”

⁴⁶ Natanayel wi'i mo: “Huunde woonde iwan diga Nasaratu na?” Filip wi'i: “War, laar!”

⁴⁷ Nde Yeesu yi'i Natanayel ɗon wara haa maako, o wolwi dow maako, o wi'i: “Ndaa goɗɗo laatiiɗo Isra'iilaajo bee gooŋga, mo walaa naafikaare sam.”

⁴⁸ Natanayel ƴami mo: “Noy anndirɗa mi?” Yeesu jaabi mo: “Mi yi'i ma nde a ɗonno les ibbi, diga Filip ewnaaki ma tawon.”

⁴⁹ Nden Natanayel wi'i mo: “Moodibbo, an woni Ɓiɗɗo Allah, an woni laamiiɗo Isra'iila!”

⁵⁰ Yeesu jaabi mo: “A nuɗɗini ngam mi wi'i mi yi'i ma les ibbi na? A yi'an kuuje ɓuranɗe kuuje ɗe'e mawnugo.”

⁵¹ O wi'i mo fahin: “Gooŋga mi wi'ete, on ngi'an asama maɓɓitake, malaa'ika'en Allah ɗon eeŋga, ɗon njippo dow Ɓii-neɗɗo.”