Yosuwa 4 - Fulfulde Bible

Kaa'e maandorɗe sappo e ɗiɗi

¹ Nde ummaatoore fuu eeri maayo Urdun, Jawmiraawo wi'i Yosuwa:

² “Cuɓe worɓe sappo e ɗiɗo nder ummaatoore, gorko gooto nder lenyol fuu.

³ Umre ɓe ɓe koo'a kaa'e sappo e ɗiɗi haa caka maayo Urdun, haa nokkuure nde liman'en ndari ɗo, ɓe njahra kaa'e man haa nokkuure nde mbaaloton jemmaare nde'e, ɓe mballina ɗe ton.”

⁴ Yosuwa ewni worɓe sappo e ɗiɗo ɓe o suɓno nder yimɓe Isra'iila, gorko gooto nder lenyol fuu.

⁵ O wi'i ɓe: “Caale yeeso sundukru alkawal Allah Jawmiraawo mon wonndu caka Urdun. Koo moy mooɗon efta hayre woore, wakka nde, fodde limgal le'i Isra'iila'en.

⁶ Kaa'e man laato maandorɗe caka mooɗon. Yeeso ɗo, to ɓikkoy mon ƴami on maana kaa'e ɗe'e ngam mon,

⁷ njaabe koy: Ndiyam Urdun ta'i yeeso sundukru alkawal Jawmiraawo, saa'i ndu ɗon eero maayo. Kaa'e ɗe'e laatanto Isra'iila'en ciftinorɗe haa foroy.”

⁸ Isra'iila'en mbaɗi ko Yosuwa umri ɓe. Ɓe ngurtini kaa'e sappo e ɗiɗi haa caka Urdun, bana Jawmiraawo wi'no Yosuwa, fodde limgal le'i Isra'iila'en. Ɓe njahri kaa'e man haa nokkuure nde ɓe mbaali, ɓe mballini ɗe ton.

⁹ Yosuwa boo darni kaa'e sappo e ɗiɗi goɗɗe haa caka Urdun, haa nokkuure nde liman'en roondooɓe sundukru ndarino. Ton ɗe ngoni haa wargo hannde.

¹⁰ Liman'en ndari haa caka Urdun haa ko Allah umrani ummaatoore bee hunnduko Yosuwa fuu timmi. Kanjum woni ko Muusa umruno Yosuwa. Ummaatoore yaawɗi eeraago maayo.

¹¹ Nde yimɓe fuu timmini eeraago, liman'en roondooɓe sundukru Jawmiraawo eeri boo bee maaru, ɓe caali yeeso yimɓe.

¹² Yimɓe le'i Ruben e Gada e reeta lenyol Manassa ardi Isra'iila'en woɗɓe, ɓe taaskaniiɓe konu bana Muusa wi'no ɓe.

¹³ Honooɓe baakin ujine cappanɗe nayo (40.000) eeri maayo yeeso Jawmiraawo, ɓe njotti yayre kommbi Yeriko.

¹⁴ Nyalaade maajum Jawmiraawo mawnini Yosuwa yeeso Isra'iila fuu. Ɓe teddini mo bana ɓe teddiniri Muusa balɗe mum fuu.

¹⁵ Nden, Jawmiraawo wi'i Yosuwa:

¹⁶ “Umru liman'en roondooɓe sundukru seedamku alkawal ɓe ngurto maayo Urdun.”

¹⁷ Yosuwa umri ɓe bana non.

¹⁸ Nde ɓe ngurti Urdun, kosɗe maɓɓe boo meemi lesdi njoorndi, ndiyam maayo lori haa nokkuure muuɗum, teeli dow pomoole maayo bana naane.

¹⁹ Nyannde sappoore nder lewru aranndu, ummaatoore eeri Urdun, saŋngini haa Gilgal, haa seɓatto fuunaaŋge Yeriko.

²⁰ Ton haa Gilgal Yosuwa darni kaa'e sappo e ɗiɗi ɗe ɓe koo'uno haa caka Urdun.

²¹ O wi'i Isra'iila'en: “Yeeso ɗo, to ɓikkoy mon ƴami on maana kaa'e ɗe'e,

²² anndine koy: Isra'iila'en eeri maayo Urdun ngo dow joorɗum.

²³ Ngam Allah Jawmiraawo mon ɓeeɓni ndiyam maago yeeso mon haa on eeri. O waɗani on bana o waɗani min haa maayo Maaliya, nde o ɓeeɓni ngo yeeso amin haa min eeri.

²⁴ O waɗi ɗum ngam haa ummaatooje duniyaaru fuu annda baawɗe Jawmiraawo mawɗe, onon boo on kula Allah Jawmiraawo mon haa foroy.”