Yosuwa 23 - Fulfulde Bible

Bolle Yosuwa ragareeje

¹ Nyalɗe ɗuuɗɗe ɓaawo Jawmiraawo hokki Isra'iila'en siwtaare yeeso konne'en maɓɓe fuu, nde Yosuwa boo ndottidi masin,

² saa'i maajum Yosuwa ewni Isra'iila'en fuu, ndotti'en e ardiiɓe e hiitooɓe e kaliifa'en. O wi'i ɓe: “Ndaa, mi naywi masin.

³ Onon on ngi'i ko Allah Jawmiraawo mooɗon waɗi ummaatooje ɗe'e fuu daliila mon, ngam Allah Jawmiraawo mooɗon haɓani on.

⁴ Ndaa mi marni on lesdi bee waɗugo kur'u fodde le'i mon, mi hokki on lesdi ummaatooje luttuɗe ɗe on nyaamaay tawon e ummaatooje ɗe nattinmi fuu, diga maayo Urdun haa fuunaaŋge haa yotti Mbeela haa hiirnaaŋge.

⁵ Allah Jawmiraawo mooɗon riiwan ummaatooje man yeeso mooɗon e o jaɓtan lesdi maaje, haa onon boo on mara ndi, bana Allah Jawmiraawo mooɗon wi'i on.

⁶ Cemmbiɗɗe masin, mbaɗe e ɗowtane ko winnda nder deftere tawreeta Muusa fuu, taa cele laawol maaka koo haa nyaamo koo haa nano.

⁷ Taa njillindire bee ummaatooje luttuɗe ɗe'e caka mooɗon. Taa ewne inɗe labbi maɓɓe, taa kunore bee inɗe maaji, taa ndewe ɗi, taa cujidane ɗi.

⁸ Ammaa ɗakkotire bee Allah Jawmiraawo mooɗon bana no mbaɗɗon haa wargo hannde.

⁹ Jawmiraawo riiwi ummaatooje mawɗe cemmbiɗɗe yeeso mooɗon. Onon boo walaa mo dartani on haa wargo hannde.

¹⁰ Koo moy mooɗon riiwan konne'en ujineere, ngam Allah Jawmiraawo mooɗon haɓanan on, bana o wi'no on.

¹¹ Ngam maajum kakkilane ko'e mooɗon booɗɗum, ngiɗe Allah Jawmiraawo mooɗon.

¹² To on acci ɗowtanaago mo, to on ɗakkotiri bee ummaatooje luttuɗe caka mooɗon ɗe'e, to on esiri bee maɓɓe, to on ɗon ngillotira bee maɓɓe,

¹³ nden kam annde fakat, Allah Jawmiraawo mooɗon accan riiwugo ummaatooje man yeeso mooɗon. Ɓe laatanto on bana tuuforgol malla ngaska, bana ɓoccol dow ɓaawo mon, bana gi'e nder gite mon, haa to on natti on fuu nder lesdi mboondi ndi'i ndi Allah Jawmiraawo mooɗon hokki on.

¹⁴ Min kam wakkati maayde am ɓaditake. Koo moy mooɗon anndi haa ɓernde mum e yoŋki mum bee laaɓɗum no Allah Jawmiraawo hiɓɓiniri barkaaji ɗi o iinani on fuu, walaa ko lutti.

¹⁵ Fakat, bana no Allah Jawmiraawo hiɓɓiniri barkaaji ɗi o iinanino on fuu, bana non boo masiibooji ɗi o wi'no on fuu, o ukkanan on ɗi haa on kalka nder lesdi mboondi ndi o hokki on.

¹⁶ To on piisti alkawal ngal Allah Jawmiraawo mooɗon umri on, to on ndewi ɗowanteeɓe woɗɓe, to on cujidani ɓe, nden kam tikkere Jawmiraawo saatan dow mooɗon, on kalkan law nder lesdi mboondi ndi o hokki on.”