Yosuwa 10 - Fulfulde Bible

Haɓre bee Amoori'en

¹ Adoni-Sadik, laamiiɗo Urusaliima nani Yosuwa nyaami berniwol Ayu, nattini ngol, mbari laamiiɗo maagol, bana o waɗi Yeriko e laamiiɗo ton. O nani boo no yimɓe Gibiyon mbaɗi narral bee Isra'iila'en, ɗon njooɗi caka maɓɓe.

² Habaru maajum hulni yimɓe Urusaliima masin, ngam Gibiyon woni berniwol maŋngol bana berniiji laamiiɓe goɗɗi, ngol ɓuri Ayu mawnugo boo, worɓe maagol fuu ɓe semmbiɗɓe.

³ Ngam man Adoni-Sadik, laamiiɗo Urusaliima neldi habaru haa Hoham, laamiiɗo Heburuun e Piriyam, laamiiɗo Yarmut e Yafiya, laamiiɗo Lakis e Debir, laamiiɗo Egilon. O wi'i ɓe:

⁴ “Ngare haa am, mballeeɗam hippaago Gibiyon, ngam yimɓe ton narri bee Yosuwa e Isra'iila'en.”

⁵ Laamiiɓe Amoori'en njowo ɓe'e mooɓi, laamiiɓe Urusaliima e Heburuun e Yarmut e Lakis e Egilon. Ɓe kawti jama'aaje konu maɓɓe fuu, ɓe caŋngini yeeso Gibiyon, ɓe kaɓi bee maagol.

⁶ Yimɓe Gibiyon neldi habaru haa Yosuwa nder saŋngeere haa Gilgal wi'ugo mo: “Taa wudin maccuɓe ma! War law, wallu min, hisnu min! Ngam laamiiɓe Amoori'en jooɗiiɓe haa kooseeje fuu mooɓi dow amin.”

⁷ Yosuwa e jama'aare konu mum e honooɓe semmbiɗɓe fuu ummi Gilgal.

⁸ Jawmiraawo wi'i Yosuwa: “Taa hul ɓe, ngam mi hokki ma ɓe. Walaa koo gooto maɓɓe dartanto ma.”

⁹ Jemmaare fuu Yosuwa e yimɓe mum njehi diga Gilgal haa Gibiyon, nden ɓe ukkani Amoori'en bee juhuki.

¹⁰ Jawmiraawo jiiɓi hakkiilooji Amoori'en nde ɓe ngi'i Isra'iila'en. Isra'iila'en mbari Amoori'en ɗuuɗɓe masin haa Gibiyon, ɓe taasni luttuɓe dow laawol ba'otooŋgol haa Baytihurun. Ɓe ukkani ɓe haa ɓe njotti Azeka e Makkeda.

¹¹ Saa'i Amoori'en ɗon ndogga yeeso Isra'iila'en, ɗon ndiirto Baytihurun, Jawmiraawo toɓni mallimallooje mawɗe dow maɓɓe haa ɓe njotti Azeka, ɗuuɗɓe caka maɓɓe maayi. Maayɓe ngam daliila mallimallooje ɗe'e ɓuri ɗuuɗugo dow mbaraaɓe bee kaafaaje Isra'iila'en.

¹² Yosuwa wolwani Jawmiraawo nyalaade nde Jawmiraawo hokki Isra'iila'en fuu jaalorgal dow Amoori'en, o wi'i yeeso Isra'iila'en: “An naaŋge, dara haa Gibiyon! An lewru boo, haa waadiwol Ayyalon!”

¹³ Fakat, naaŋge dari, lewru boo dari, haa Isra'iila'en timmini waataago konne'en muuɗum'en. Habaru maajum winndaama haa Deftere Adiliijo. Naaŋge dari haa caka asama, nge yaawanaay mutugo nyalawmaare fuu.

¹⁴ Nyalaade bana maare meeɗaay laataago e meetataa boo, haa Jawmiraawo nana koŋngol neɗɗo bana maagol. Ngam Jawmiraawo haɓani Isra'iila'en.

¹⁵ Nden Yosuwa e Isra'iila'en fuu lori nder saŋngeere haa Gilgal.

Yosuwa mbari laamiiɓe Amoori'en njowo

¹⁶ Laamiiɓe Amoori'en njowo go ndoggi, ɓe nyukki nder lowol haa Makkeda.

¹⁷ Goɗɗo tawi ɓe ton, Yosuwa boo anndinaama haa ɓe nyukki.

¹⁸ O wi'i: “Talle kaa'e mawɗe haa hunnduko lowol, ndarne worɓe woɗɓe haa maagol ngam aynugo ɓe.

¹⁹ Ammaa taa ndare, onon, taasne konne'en mooɗon, kippe sakkitiiɓe maɓɓe. Taa acce ɓe ɓe nasta berniiji maɓɓe, ngam Allah Jawmiraawo mooɗon hokki on ɓe.”

²⁰ Yosuwa e Isra'iila'en mbari ɗuuɗɓe maɓɓe, ammaa woɗɓe maɓɓe keɓi daɗugo, ɓe nasti berniiji maɓɓe cemmbiɗɗi.

²¹ Nden Isra'iila'en fuu ngarti jam haa Yosuwa nder saŋngeere haa Makkeda. Ɓaawoɗon walaa koo gooto nder yimɓe lesdi maɓɓiti hunnduko mum dow Isra'iila'en.

²² Nden Yosuwa wi'i: “Maɓɓite lowol, ngurtinaneeɗam laamiiɓe njowo go.”

²³ Ɓe mbaɗi bana nii, ɓe ngurtini laamiiɓe man nder lowol, ɓe ngaddi ɓe haa maako: Ɗum laamiiɗo Urusaliima e laamiiɗo Heburuun e laamiiɗo Yarmut e laamiiɗo Lakis e laamiiɗo Egilon.

²⁴ Nde ɓe ɗon ngurtina ɓe, Yosuwa ewni worɓe Isra'iila fuu. O wi'i ardiiɓe konu yahduɓe bee maako: “Ɓadite, njaaɓe daaɗe laamiiɓe ɓe'e.” Ɓe ɓaditi, ɓe mbaɗi non.

²⁵ Yosuwa wi'i ɓe: “Taa kule, taa tampe sam, ammaa cemmbiɗe, cuusɗine ɓerɗe mon! Bana nii Jawmiraawo waarata konne'en mooɗon ɓe on kaɓata bee maɓɓe fuu.”

²⁶ Nden Yosuwa mbari ɓe, ɓili ɓalli maɓɓe haa leɗɗe jowi, ton ɗi nyalli haa kiikiiɗe.

²⁷ Wakkati naaŋge muti, Yosuwa umri ɓe njippina ɓalli laamiiɓe ɓe'e diga leɗɗe man. Ɓe ngudini ɗi nder lowol ngol ɓe nyukkino, ɓe maɓɓi lowol man bee kaa'e mawɗe. Ton ɗe ngoni haa wargo hannde.

Yosuwa nyaami berniiji fombina

²⁸ Nyalaade man nden Yosuwa nyaami berniwol Makkeda. O nattini wonɓe nder berniwol e laamiiɗo maagol fuu bee kaafahi, walaa mo lutti bee yoŋki. O waɗi laamiiɗo Makkeda bana o waari laamiiɗo Yeriko.

²⁹ Ɓaawo maajum Yosuwa e Isra'iila'en fuu ummi Makkeda, njehi berniwol Libna, ɓe kaɓi bee yimɓe maagol.

³⁰ Kaŋgol boo Jawmiraawo hokki ngol Isra'iila'en, bee laamiiɗo maagol fuu. Walaa mo lutti bee yoŋki koo gooto, ɓe mbari yimɓe ton fuu bee kaafaaje. Ɓe mbaɗi laamiiɗo Libna bana ɓe mbaari laamiiɗo Yeriko.

³¹ Nden Yosuwa e Isra'iila'en wonduɓe bee muuɗum fuu ummi Libna, njehi Lakis. Ɓe caŋngini yeeso maagol, ɓe kaɓi bee maagol.

³² Nyannde ɗiɗawre Jawmiraawo hokki Lakis haa Isra'iila'en. Ɓe nyaami ngol, ɓe mbardi wonɓe nder berniwol fuu, walaa mo lutti bee yoŋki, bana ɓe mbaari Libna.

³³ Horam, Laamiiɗo Gezer wari wallugo Lakis. Ammaa Yosuwa mbardi ɓe, kaŋko e yimɓe maako fuu, o accaay koo gooto maɓɓe bee yoŋki.

³⁴ Nden Yosuwa e Isra'iila'en wonduɓe bee muuɗum fuu ummi Lakis, njehi Egilon. Ɓe caŋngini yeeso maagol, ɓe kaɓi bee maagol.

³⁵ Nyalaade maajum ɓe nyaami ngol, ɓe mbari yimɓe maagol bee kaafaaje. Ɓe nattini yimɓe maagol fuu bana ɓe mbaari Lakis.

³⁶ Ɓaawo man Yosuwa e Isra'iila'en wonduɓe bee muuɗum fuu ummi Egilon, mba'i kooseeje yahugo Heburuun. Ɓe kaɓi bee maagol,

³⁷ ɓe nyaami ngol. Ɓe mbari laamiiɗo e wonɓe nder maagol e wonɓe nder gure taariiɗe ngol fuu bee kaafaaje, ɓe luttaay koo gooto bee yoŋki. Yosuwa nattini ngol fuu, bana o waari Egilon.

³⁸ Nden Yosuwa e Isra'iila'en wonduɓe bee muuɗum fuu ngayliti gal Debir, kaɓi bee maagol.

³⁹ Ɓe nyaami ngol bee gure maagol, ɓe naŋngi laamiiɗo maagol, ɓe mbari ɓe bee kaafaaje. Ɓe nattini wonɓe nder maagol fuu, walaa koo gooto luttuɗo bee yoŋki. Yosuwa waɗi Debir e laamiiɗo maagol bana o waari Heburuun e Libna bee laamiiɗo maagol.

⁴⁰ Yosuwa nyaami lesdi fuu. O jaali laamiiɓe haa kooseeje e Lesdi Fombina, haa lesdi towndiije e lesdi leesndi fuu. O luttaay koo gooto bee yoŋki. Ko mari poofɗe fuu, o nattini ɗum bana Jawmiraawo, Allah Isra'iila umruno mo.

⁴¹ Yosuwa jaali ɓe diga Kaades-Barne'a haa Gaaza, diga lesdi Goosan fuu haa yotti Gibiyon.

⁴² Laamiiɓe ɓe'e e lesɗe muuɗum'en fuu, Yosuwa jaali ɗum nder jahaaŋgal konu gootal. Ɗum fuu ɗum laati non ngam Jawmiraawo, Allah Isra'iila haɓani yimɓe mum.

⁴³ Nden Yosuwa e Isra'iila'en fuu lorti nder saŋngeere haa Gilgal.