Yosuwa 1 - Fulfulde Bible

Yosuwa laati ardiiɗo Isra'iila

¹ Ɓaawo maayde Muusa, jaggiiɗo Jawmiraawo, Jawmiraawo wolwani Yosuwa ɓii Nuuna, balloowo Muusa, wi'i:

² “Jaggiiɗo am Muusa maayi. Kadi umma, eera maayo Urdun ngo, an e ummaatoore nde'e fuu, haa on nasta lesdi ndi ndokkanmi Isra'iila'en.

³ Nokkuure nde kosɗe mon njaaɓata fuu, mi hokki on nde bana mbi'mi Muusa.

⁴ Diga ladde e Libanon ɗo yahugo fuunaaŋge haa yotto maayo maŋngo wi'eteeŋgo Efratis, waato lesdi Heti'en fuu, yahugo hiirnaaŋge boo haa yotto mbeela, ɗum fuu ɗum laato maral mooɗon.

⁵ Balɗe ma fuu walaa dartantooɗo ma. Bana mi wonduno bee Muusa, bana non ngondiranmi bee maaɗa boo. Mi accataa ma e mi wudintaa ma sam.

⁶ Semmbiɗiɗ, laata cuusɗo, ngam an ronnata yimɓe ummaatoore nde'e lesdi ndi kunaniimi kaakiraaɓe maɓɓe mi hokkan ɓe.

⁷ Sey a semmbiɗa, a laato cuusɗo masin, a ɗowtano tawreeta ka Muusa jaggiiɗo am umri ma fuu. Taa sel laawol maaka, koo haa nyaamo koo haa nano, ngam keɓa hayru koo toy njahata fuu.

⁸ Tokka jaŋngugo deftere tawreeta nde'e tum, numtu nde jemma bee nyalawma fuu, ngam haa a ɗowtano ko winnda nder maare. Nden kam nufayeeje ma kiɓɓoto, a heɓan hayru.

⁹ Naa mi umri ma na? Sey a semmbiɗa, a laato cuusɗo. Taa hul, taa diwtora sam, ngam min, Allah Jawmiraawo maaɗa mi ɗon wondi bee maaɗa haa njahata fuu.”

Taaskara eeraaki maayo Urdun

¹⁰ Yosuwa umri kaliifa'en ummaatoore:

¹¹ “Ngance nder saŋngeere, umre yimɓe ummaatoore ni'i: Taaskane ko'e mon njooɓaari, ngam nder nyalɗe tati on tammi eeraago maayo Urdun ngo'o, haa on mara lesdi ndi Allah Jawmiraawo mon marnata on.”

¹² Nden Yosuwa wolwani yimɓe le'i Ruben e Gada e reeta lenyol Manassa, o wi'i ɓe:

¹³ “Ciftore ko Muusa, jaggiiɗo Jawmiraawo umri on. O wi'i: Allah Jawmiraawo mon siwtinan on, hokkan on lesdi ndi.

¹⁴ Rewɓe mon e ɓikkoy mon e dabbaaji mon njooɗoto nder lesdi ndi Muusa hokki on gaa'e Urdun. Ammaa onon honooɓe semmbiɗɓe fuu on ardoto banndiraaɓe mon eeraago, on mballa ɓe bee balmi mooɗon,

¹⁵ haa to Jawmiraawo siwtini ɓe bana mooɗon, haa to kamɓe boo ɓe mari lesdi ndi Jawmiraawo, Allah mooɗon hokkata ɓe. Ɓaawo man on loro, on mara lesdi ndi Muusa, jaggiiɗo Jawmiraawo hokki on gaa'e Urdun gal fuunaaŋge.”

¹⁶ Ɓe njaabi Yosuwa: “Ko umruɗa min fuu, min mbaɗan ɗum. Min njahan koo toy a nelata min.

¹⁷ Bana min ɗowtorani Muusa nder koo ɗume fuu, bana non min ɗowtanto ma an boo. Allah Jawmiraawo ma wondan bee maaɗa, bana o wonduno bee Muusa.

¹⁸ Koo moy tuurti, ɗowtanaaki umrooje ɗe umruɗa mo fuu, o mbareteeɗo. Ammaa an, laata a cemmbiɗɗo, cuusɗo.”