Yimre Suleymaanu 8 - Fulfulde Bible

Jobbitoore yiide e no paanyo debbo salori giɗaaɗo mum

¹ To a laatino deerɗam, to a musinno enɗi daada am, to mi tawno ma haa yaasi, mi hebboto ma, walaa koo gooto boo yawoto yam!

² Suudu daada am njahranmaami. To en nasti ton, a ekkitintam yiɗugo ma. Inaboojam uurɗam mi hokkete, rummaanooje am ɓiɗɗaaɗe mi yarnete.

³ Nano maako ɗon sakki les hoore am, nyaamo maako boo huufammi ɓanndu.

⁴ Faanyɓe rewɓe Urusaliima, kunaneeɗam bee lelji e kampure, taa pindine yiide, taa ndaame nde, sey to nde yelake!

Yimooɓe

⁵ Moy debbo oo garanɗo diga ladde, ɓaariiɗo giɗaaɗo mum? Ndaa, les lekki dimanki ɓiɓɓe ki'i mi findini ma, haa nokkuure nde daada ma reedi e danyi ma.

Paanyo debbo

⁶ Waɗam bana ɓellere ɓernde ma, bana jawe haa juŋngo ma, Yiide semmbiɗi bana waade, kaajal saati bana joonde maayɓe. Yiide wulan bana yiite huɓɓanŋge, bana ɗemɗe yiite hulniiŋge nde wa'i.

⁷ Koo ndiyamji ɗuuɗɗi ke'ataa nyifugo yiide. Koo maaje keewɗe ndiyam boo mbaawataa moɗugo nde. Goɗɗo gurtinɗo jawdi saare mum fuu, ngam soodugo yiide bee maari, fakat yimɓe njawoto mo.

Deerɗiraaɓe paanyo debbo

⁸ Minyiraawo amin o heewtaay tawon, enɗi maako boo pamɗi, mawnaay tawon. Kadi ɗume min mbaɗanta deerɗiraawo oo nyannde goɗɗo wari haddinango mo?

⁹ To o laatake mahol berniwol, nden bee tuutuuji cardi min lamsa ngol. To o dammugal, min palan ngal bee maɓɓoode leggal cemmbiɗŋgal.

Paanyo debbo

¹⁰ Ndaa, mi nanndi bee mahol berniwol, non boo enɗi am, cuuɗi maagol towɗi. Kanjum mi laati keɓɗo hayru yeeso maako.

Sukaajo

¹¹ Suleymaanu woodino ngesa inabooje, haa Ba'al-Hamoona. O halfini ka haa remooɓe, koo moy ɗon wadda ngam nafuuda maaka ceede cardi ujineere.

¹² Ngesa inabooje am, min jeyi! Ka ɗon yeeso am. An, Suleymaanu, ndaa ceede cardi ujineere, non boo remooɓe teemeɗɗe ɗiɗo.

¹³ An gonɗo nder jarne, ngorgiraaɓe am ɗon keɗito, townu sawtu ma, accu mi nana:

Paanyo debbo

¹⁴ Doggu law, an giɗaaɗo am! Sey a laato bana lelwa e ɓiŋngel hamfurde dow kooseeje uurooje.