Yimre Suleymaanu 6 - Fulfulde Bible

Yimooɓe

¹ Haa toy giɗaaɗo ma dilli, an ɓurɗo rewɓe fuu wooɗugo? Haa toy giɗaaɗo ma wayliti dilli? En njahda tefoygo mo na?

Paanyo debbo

² Ndaa, giɗaaɗo am diirti haa jarne mum, o yehi haa jarne pinndi belɗi uurooji. O dilli jarne ngam durugo tokkere maako e ngam teɓugo gurguli boo.

³ Giɗaaɗo am min jeyi, non min boo mi mo maako. Caka gurguli o durata.

No paanyo debbo wa'i Sukaajo

⁴ An giɗaaɗo am, a ŋarniiɗo bana Tirsa, an a wooɗi bana Urusaliima, kulniiɗo bana honooɓe les tuutaaje muuɗum'en!

⁵ Sottin gite dow am, ngam ɗe ɗon caklammi, Gaasa hoore maaɗa bana tokkere be'i, diirtotooɗi hooseere Gile'at.

⁶ Nyii'e maaɗa ɗon bana tokkere baali, gartanɗi diga lootirde maaji. Mbaalu fuu wondi bee ciwtu maagu, walaa koo ngootu nder maaji sooyi ngu.

⁷ Bana pecce rummaanoore, non gole ma, ɗe ɗon nyukki haa ɓaawo suddaare ma.

⁸ Rewɓe laamiiɗo cappanɗe njoweego ɗon, sulaaɓe cappanɗe njoweetato, faanyɓe rewɓe boo limataake sam.

⁹ Ammaa poolel am ngel walaa feloore sam, sey gooto oo! O bajjo haa debbo mo danyi mo, mo daada maako ɓuri yiɗugo. Faanyɓe ewnoto mo barkiɗinaaɗo to ngi'i mo, rewɓe laamiiɗo e sulaaɓe mum fuu njobbito mo:

Yimooɓe

¹⁰ Moye debbo jaynanɗo bana baɓɓol? Moye wooɗi masin bana lewru? Moye laaɓi haa nannda bee naaŋge? Moye kulniiɗo bana honooɓe les tuutaaje muuɗum'en?

Paanyo debbo

¹¹ Mi jippi haa jarne goorooje, haa mi laara no waadiwol hesɗitiri. Inabooje ton mbiliti na? Rummaanooje boo pinniti na?

¹² Nden mi anndaa ko ɓernde am waɗi yam, law nde wa'ini yam moota pucci ummaatoore tedda-asliire am.