Yimre Suleymaanu 5 - Fulfulde Bible

Sukaajo

¹ Ngarmi jarne am, deerɗam, muuyaaɗo am, mi ɗon teɓa baɗaadi e balsani am, mi ɗon nyaama njumri nder yowre am, mi ɗon yara inaboojam e kosam am. Soobiraaɓe, ngare, on nyaama, on njara, on nguykira yiide!

Yimooɓe O maɓɓitani mo dammugal, ammaa wakkati saali Paanyo debbo

² Mi ɗonno ɗaani, ammaa ɓernde am ɗaanaaki sam. Ndaa, giɗaaɗo am ɗon silmino haa dammugal: War, maɓɓitit, deerɗam, giɗaaɗo am, an poolel am ngel walaa feloore sam, saawawre suddi hoore am, bee jemma nde soofni gaasaaji am.

Sukaajo Paanyo debbo

³ Na mi ɓorti limce am? Noy ɓornitiranmi ɗe jonta kam? Non kosɗe am boo, ndaa mi looti ɗe. Kadi, noye tunwiniranmi ɗe?

⁴ Haa wurdere giɗaaɗo am nastini juŋngo, haa ɓernde am ta'i.

⁵ Mi ummi, mi maɓɓiti suudu am, nebbam baɗaadi ɗon simta diga juuɗe am, ɗam ɗon ila diga kooli am dow joogorɗe dammugal.

⁶ Mi maɓɓitani giɗaaɗo am suudu, ammaa o dilli, o majjiti! Ngam man mi ɓadake maayugo. Mi tefi nder wuro, mi tawaay mo sam, mi ewni, ammaa o nootaaki yam.

⁷ Mi fotti bee aynooɓe, taarotooɓe nder berniwol. Ɓe piyi yam, ɓe naawni yam, aynooɓe mahi berniwol njaɓti mojaare am.

⁸ Faanyɓe rewɓe Urusaliima fuu, mi tori on, to on tawi giɗaaɗo am, ngecce mo, mi nyawɗo nyawu yiide.

Yimooɓe

⁹ Noy giɗaaɗo ma ɓurdata woɗɓe, an ɓurɗo rewɓe fuu wooɗugo? Noy giɗaaɗo ma ɓurdata woɗɓe, haa kunnuɗa min bana nii?

Paanyo debbo

¹⁰ Giɗaaɗo am o boɗeejo jaynanɗo, nder ujine sappo on annditan mo:

¹¹ Hoore maako kaŋŋeeri laaɓndi, gaasa hoore maako bana bukki dibinooje, ka ɗon ɓalwi kurum bana leekuuje.

¹² Gite maako bana pooli haa maahoy, giiwotooɗi nder kosam, darotooɗi haa ndiyam seeɓoore.

¹³ Gole maako ɗe booɗɗe bana jarne keewɗe pinndi belɗi uurooji. Bana gurguli, non hunnduko maako, ko ɗon simtina nebbam baɗaadi.

¹⁴ Juuɗe maako ɗe cabbi kaŋŋeeri, ɗe ɓasaaɗe bee kaa'e e Tarsis. Ɓanndu maako ɗon bana nyiindere nyiiwa ɓorwunde, ɗum ɓasaaɗum bee kaa'e safira.

¹⁵ Korle maako ɗe daŋraŋge kaa'e daneeje, jo'inaaɗe dow caɓɓal kaŋŋeeri. Jaati maako nanndi bee hooseere Libanon, o feereejo bana leɗɗe cemmbiɗɗe.

¹⁶ Hunnduko maako ɗon weli, o fuu maako o ceynoowo. Non nii giɗaaɗo am, sooba am wa'i, faanyɓe rewɓe Urusaliima.