Yimre Suleymaanu 4 - Fulfulde Bible

Sukaajo

¹ An a ŋarniiɗo masin, an giɗaaɗo am, an a ŋarniiɗo masin. Non boo gite ma bana pooli haa ɓaawo suddaare ma. Gaasa hoore maaɗa bana tokkere be'i, diirtotooɗi hooseere Gile'at.

² Nyii'e maaɗa ɗon bana tokkere baali meksaaɗi, gartanɗi diga lootirde maaji. Mbaalu fuu wondi bee ciwtu maagu, walaa koo ngootu nder maaji sooyi ngu.

³ Hunnduko ma wooɗi bana diidi boɗeeji. Bana pecce rummaanoore, non gole ma, ɗe ɗon nyukki haa ɓaawo suddaare ma.

⁴ Bana suudu Daawuda towndu, non daande ma, bana ɓale suudu. Bawarɗe ujine ɗon ɓili ton, kanje fuu ɗe semmbiɗɓe non.

⁵ Bana ciwtukoy lelwa, ndurankoy caka gurguli, non enɗi ma.

⁶ Hiddeko henndu asiri wifa, saa'i ɗowdi ɗon jinna haa lesdi, Sey mi yaha hooseere baɗaadi, sey mi yaha towndiire uurle boo.

⁷ An a ŋarniiɗo masin, an giɗaaɗo am, walaa batte haa maaɗa sam.

⁸ Muuyaaɗo am, war diga Libanon, wardu bee am diga Libanon. Diirta diga yeereere hooseere Amana, diirta hoore Seniira e Hermoon non, diga loowi barooɗe e kooseeje paaɗaaji.

⁹ Deerɗiraawo am, muuyaaɗo am, a hiilni yam, bee daarki gite ma tan a hiilniri yam, non boo bee koɗel haa daande ma.

¹⁰ Deerɗiraawo am, yiide ma wooɗi, muuyaaɗo am, nde weli ɓuri inaboojam fuu, uureeŋgol uurdi ngujam ma ɓuri ngol uurle fuu.

¹¹ Muuyaaɗo am, hunnduko ma weli bana njumri, njumri e kosam ɗon haa les ɗemŋgal ma, uureeŋgol uurdi limce ma bana ngol Libanon.

¹² Bana jarne maɓɓaaɗe, non mbaaɗa, muuyaaɗo am, deerɗam, a ɗon bana waawru maɓɓaandu e seeɓoore takkaande.

¹³ Rummaanooje ɗon puɗa haa jarne man, ɓiɓɓe leɗɗe cuɓaaɗe ɗon mawna ton, leɗɗe nardi e nalleehi tampataa ton,

¹⁴ nardi e citta uurka, ƴommbal uurŋgal e sinnamom, non boo leɗɗe uurɗe e baɗaadi, bee leɗɗe ɓurɗe uurugo.

¹⁵ An seeɓoore nde yarnata jarne man, an a ɓulndu ilnooru ndiyamji tum, bana maaje ilooje e Libanon.

Paanyo debbo

¹⁶ Henndu woyla, fin! War, henndu fombina! War, wifu dow jarne am, sey jarne am simtina balsani fuu. Jonta giɗaaɗo am wara nder jarne mum, nyaamugo ɓiɓɓe leɗɗe cuɓaaɗe.