Yimre Suleymaanu 3 - Fulfulde Bible

Tawtotiral e geewte hakkunde maɓɓe

¹ Bee jemma mi ɗon dow be'itte am, mi tefi mo ɓernde am yiɗi, mi tefi, ammaa mi tawaay mo sam.

² Sey mi ummo, mi waanca nder berniwol fuu, mi yaha haa laabi e babe boo, mi tefa mo ɓernde am yiɗi. Mi tefi, ammaa mi tawaay mo.

³ Mi fotti bee aynooɓe, taarooɓe nder berniwol, mi ƴami ɓe: “On ngi'i mo ɓernde am yiɗi na?”

⁴ Mi saali ɓe, nii seɗɗa mi tawi mo ɓernde am yiɗi. Mi naŋngi mo, nden mi yoofaay mo sam, mi yahri mo suudu daada am, haa jooɗorde debbo danyɗo yam.

⁵ Faanyɓe rewɓe Urusaliima, kunaneeɗam bee lelji e kampure: Taa pindine yiide, taa ndaame nde, sey to nde yelake!

Yimooɓe

⁶ Ɗum moy warata ɗo diga ladde? Ɗum ɗon nanndi bee daŋraŋge cuurɗe, bee uureeŋga baɗaadi e uurle, e uurle kurooriije piloowo koo ɗeye.

⁷ Ndaa, ɗum leeso laamiiɗo Suleymaanu, honooɓe Isra'iila semmbiɗɓe cappanɗe njoweego ɗon taari ngo.

⁸ Fuu ɓe ɗon njogi kaafaaje, koo moy maɓɓe woowi konu, koo moy maɓɓe ɗon wakki boo kaafahi muuɗum ngam faddaago diga joote jemma.

⁹ Suleymaanu waɗani hoore muuɗum koromwal, o waari ngal bee leɗɗe iwɗe diga laynde Libanon.

¹⁰ O waari kosɗe maagal bee cardi, ɓaawo maagal boo bee kaŋŋeeri, jooɗorde maagal bee batta mboɗeewa, faanyɓe rewɓe Urusaliima boo kuuwi, kamɓe tuppiti gaflaaje maagal bee yiide.

¹¹ Faanyɓe rewɓe Siyona, ngurte, ndaare laamiiɗo Suleymaanu. Ndaare woronnde nde daada laamiiɗo hufni mo ngam nyalaade ɓaŋgal maako, ngam nyalaade seynannde mo ɓernde.