Yimre Suleymaanu 2 - Fulfulde Bible

¹ Ndaa, mi nanndi bee pinndi yayre Saron, bana gurguli waadiiji.

Sukaajo

² Bana gurguli caka giŋngille, non giɗaaɗo am caka faanyɓe rewɓe.

Paanyo debbo

³ Bana lekki dimanki ɓiɓɓe belɗe caka leɗɗe laynde, nonnon giɗaaɗo am caka sukaaɓe. Les ɗowdi maaki mi yiɗi jooɗaago, ɓiɓɓe maaki ɗon mbelani ɗemŋgal.

⁴ O yahri yam suudu njaramji, ɗum yiide o darnani yam ton bana tuutawal.

⁵ Mballiteeɗam bee tamseeje inabooje, cemmbiɗineeɗam bee ɓenndalooje belɗe, ngam fakat mi nyawi nyawu yiide.

⁶ Nano maako ɗon sakki les hoore am, nyaamo maako boo huufammi ɓanndu.

⁷ Faanyɓe rewɓe Urusaliima, kunaneeɗam bee lelji e kampure, taa pindine yiide, taa ndaame nde, sey to nde yelake!

Mo ɗon yotto Paanyo debbo

⁸ Keɗite, ɗum giɗaaɗo am! O ɗon wara, o ɗon diwa dow kooseeje, o ɗon ficco dow towndiije.

⁹ Giɗaaɗo am nanndi bee lelwa, o ɗon nanndi bee ɓiŋngel hamfurde. Ndaa o ɗon dari ɓaawo mahol amin, o ɗon yurno gal burɗe maagol, o ɗon laara haa leɗɗe gaafiiɗe.

¹⁰ Ndaa giɗaaɗo am ɗon ewno yam: An giɗaaɗo am, umma! War, ŋarniiɗo am!

Sukaajo

¹¹ Ngam ndaa, nduŋngu jinni, saa'i iyeende saalake,

¹² pinndi ladde ɗon mbaŋga haa lesdi, saa'i waɗi ngam yimugo gimi, sawtu poola ɗon nane haa lesdi.

¹³ Ibbe kecce ɗon ɓennda haa ibbi, inabooje ɗon pinna, ɗon uura. An giɗaaɗo am, umma! War, ŋarniiɗo am!

¹⁴ Poolel am haa ceekli tapaaje, nder nyukkorde diirtorde, accam mi laara yeeso maaɗa mi heɗito sawtu, ngam sawtu ma weli e a ŋarniiɗo boo.

¹⁵ Naŋngane min doldolɗe, ndoldolkon, kon ɗon mbonna min gese inabooje, inabooje amin boo fuu ɗon pinna.

Paanyo debbo

¹⁶ Giɗaaɗo am min jeyi, min boo mo maako, o ɗon dura tokkere maako nder gurguli ladde.

¹⁷ Hiddeko henndu asiri wifa, saa'i ɗowdi ɗon jinna haa lesdi, sey a lorto, an giɗaaɗo am, ngara, sey a laato bana lelwa e ɓiŋngel hamfurde, gonŋgel nder ceekli kooseeje.