Yeremiya 5 - Fulfulde Bible

Hakkeeji Urusaliima e Yahuuda

¹ Jawmiraawo wi'i: “Caale nder laabi berniwol Urusaliima, ndaare, linye, ɗaɓɓite haa babe maagol, teema on tawan goɗɗo gooto mo ɗon waɗa ko fotti, mo ɗon ɗaɓɓita gooŋga! Nden kam mi yaafanto Urusaliima.

² Koo to ɓe mbi'i: Fakat bana Jawmiraawo o geeto – ɓe ɗon kunoro fewre.”

³ Yaa Jawmiraawo, naa gite maaɗa ɗon kuuciti dow gooŋga na? A ɓocci ɓe, ammaa ɗum naawaay ɓe. A ɓadake nattingo ɓe, ammaa ɓe njaɓaay elto. Ɓe caatini ko'e maɓɓe ko ɓuri hayre, ɓe cali tuubugo.

⁴ Mi tammino: “Ɗum leesɓe, ɓe ngalaa hakkiilo. Ɓe anndaa laawol Jawmiraawo e kiita Allah maɓɓe ndarnuka.

⁵ Sey mi yaha haa mawɓe kadi, mi wolida bee maɓɓe. Ngam kamɓe ɓe anndi laawol Jawmiraawo e kiita Allah maɓɓe ndarnuka”. Ammaa ɓe tuurti, ɓe piisti kaɓɓotiral bee Allah.

⁶ Ngam maajum mbarooga laynde faɗɗan ɓe, saafaandu ladde nattinan ɓe, paaɗaawu ɗon waaltano gure maɓɓe, seekan gurtotooɗo fuu. Ngam tuurtol maɓɓe e zunuubaaji maɓɓe ɗuuɗi masin.

⁷ Jawmiraawo wi'i: “Noy mi yaaforanto ma ɗum fuu, an Urusaliima? Ɓiɓɓe maaɗa acci yam, ɓe ɗon kunoro labbi koo to ɗi laataaki ɗowanteeɓe. Min haarni ɓe, ammaa kamɓe ɓe mbaɗi njeenu, ɓe mooɓi haa cuuɗi daakaare'en.

⁸ Ɓe laati bana pucci ngurwooji payɗi, koo moy maɓɓe ɗon nodda debbo keeddiɗɗum.

⁹ Mi hiitataako kuuje ɗe'e na? Mi waatataako ummaatoore bana nde'e na?

¹⁰ Naste nder gese inabooje Urusaliima. Mbonne ɗe, ammaa taa nattine ɗe fuu! Ta'e lice maaje fuu, ngam naa min Jawmiraawo jeyi ɗe!”

¹¹ Jawmiraawo wi'i: “Yimɓe Isra'iila e yimɓe Yahuuda zammbi yam fakat.

¹² Ɓe ngeddi yam, ɓe ɗon mbi'a: Walaa ko o waɗata! Sarru ukkantaako min, min - ngi'ataa kaafahi koo weelo.

¹³ Haala annabi'en boo– ɗum henndu meere. Wolde am woodaa nder kunnduɗe maɓɓe.”

¹⁴ Jawmiraawo Allah honooɓe asama wi'i: “Daliila bolle ɗe yimɓe ɓe'e mbolwi, mi laatinan bolle am nder hunnduko maaɗa yiite, yaa Yeremiya, ɓe laatoto leɗɗe, nge nyaama ɓe.”

¹⁵ Jawmiraawo wi'i: “Onon yimɓe Isra'iila, mi waddan ummaatoore dow mooɗon diga daayiiɗum. Ɗum ummaatoore semmbiɗnde, tabitiinde diga ɓooyma. On anndaa wolde maare, on paamataa ko ɓe mbi'ata.

¹⁶ Ɓahi maare nanndi bee yenaande omtaande, honooɓe maare fuu ɓe semmbiɗɓe.

¹⁷ Nde nyaaman nafuuda gese mooɗon e nyaamdu mooɗon. Nde nyaaman ɓiɓɓe mon worɓe e rewɓe, nde nyaaman dammooji mooɗon e na'i mooɗon, nde nyaaman inabooje mooɗon e ibbe mooɗon. On ɗon koolo berniiji mooɗon cemmbiɗɗi, ammaa ummaatoore nde'e halkan ɗi bee kaafahi.

¹⁸ Bee non fuu, koo nder nyalɗe ɗe'e mi nattintaa on fuu.” Non Jawmiraawo wi'i.

¹⁹ To ɓe ƴami: Ngam ɗume Jawmiraawo Allah amin waɗi min ɗum fuu, nden yeccu ɓe: On acci Jawmiraawo, on ɗowtani ɗowanteeɓe jananɓe nder lesdi mooɗon. Ngam maajum on ɗowtanto jananɓe nder lesdi ndi on maraay.

²⁰ Anndine yimɓe Yaakubu, ngooyne nder lesdi Yahuuda:

²¹ Nane, onon faataaɓe, sooya-hakkiilo'en! On ngoodi gite, ammaa on ngi'ataa. On ngoodi noppi, ammaa on nanataa.

²² Jawmiraawo ɗon ƴama: “On kulataa yam na? On ndiwnataa yeeso am na? Min mi heerɗini mbeela bee njaareendi, ɗum keerol duumiiŋgol ngol saalataake. Ƴuuge mbeela ɗon ndimmbo, ammaa ɗe ngalaa baawɗe. Ɗe ɗon iida, ammaa ɗe caalataako keerol man.

²³ Ammaa on ngoodi ɓerɗe caatuɗe, tuurtuɗe. On ngayliti ɓaawo, on ndilli.

²⁴ On mbi'aay haa ɓerɗe mooɗon: Kulenma Jawmiraawo Allah meeɗen, dokkoowo en iyeele arane e ragareeje nde saa'i maaje waɗi, taaskitinanɗo en asaweeje codol boo.

²⁵ Ammaa ɗum aybeeji mooɗon njiiɓi ɗum, ɗum hakkeeji mooɗon ittani on barka.

²⁶ Halluɓe ɗon caka ummaatoore am. Ɓe ɗon ndeena haa baaltol bana tuufnooɓe colli. Ɓe ɗon mbaɗa tuuforli ngam naŋngugo yimɓe.

²⁷ Bana silaawo heewŋgo colli, non cuuɗi maɓɓe keewri rikici. Ngam maajum ɓe laati mawɓe e riskuɓe.

²⁸ Ɓe payi, ɓe tekki. Halleende maɓɓe ɓuri semmbe. Ɓe kiitataako fodde kiita ngooŋɗuka. Ɓe ngooŋɗintaa haala atiime'en, ammaa ɓe ɗon keɓa hayru, ɓe njiŋngataa laafuɓe.

²⁹ Jawmiraawo ɗon ƴama: Mi hiitataako kuuje ɗe'e na? Mi waatataako ummaatoore bana nde'e na?

³⁰ Kulniiɗum e nyidduɗum laatake nder lesdi:

³¹ Annabi'en ɗon ngaazina fewre, liman'en ɗon laamo bana ɓerɗe maɓɓe ngiɗi, ummaatoore am boo yerdi ɗum. Ammaa ɗume on mbaɗata to timmoode yottake?”