Yeremiya 40 - Fulfulde Bible

Yeremiya wondi bee Gedaliya

¹ Jawmiraawo wolwani Yeremiya, ɓaawo Nebuzaradan, hooreejo aynooɓe laamiiɗo rimɗini mo haa Rama. Ɓe njahrno mo ton, o kaɓɓaaɗo bee callalluuji, caka yimɓe Urusaliima e Yahuuda, daheteeɓe haa Baabila fuu.

² Hooreejo aynooɓe go umri waddugo Yeremiya, wi'i mo: “Jawmiraawo Allah maaɗa wolwuno haala sarru ngu'u dow lesdi ndi'i.

³ Jonta o timmini ko o wi'no, ngam on mbaɗi hakke dow Jawmiraawo, on ɗowtanaaki mo. Ngam maajum kuuje ɗe'e fuu laatanake on.

⁴ Jonta piistanmi callalluuji haa juuɗe ma, mi rimɗine. To ɗum fottani ma a yahda bee am haa Baabila, nden kam war, min boo mi hakkilante. Ammaa to ɗum fottanaay ma, nden kam taa war. Ndaa, lesdi fuu ɗon we'iti yeeso maaɗa, yah haa ngiɗɗa fuu.”

⁵ Ammaa Yeremiya dillaay tawon. Ngam maajum Nebuzaradan wi'i mo: “Lorta haa Gedaliya ɓii Ahikam ɓii Safan mo laamiiɗo Baabila waɗi ngomna dow gure Yahuuda. Jooɗoda bee maako caka yimɓe malla yah haa nokkuure koo ndeye fottanannde ma fuu.” Nden o hokki mo dokkal e njooɓaari laawol, o jaɓɓiti mo.

⁶ Yeremiya yehi haa Gedaliya ɓii Ahikam, jooɗodi bee maako haa Mispa, caka yimɓe luttuɓe nder lesdi.

Dabare mbarugo Gedaliya

⁷ Nden mawɓe jama'aaje konu wonɓe nder ladde e honooɓe muuɗum'en nani laamiiɗo Baabila waɗi Gedaliya ɓii Ahikam ngomna lesdi fuu, halfitinani mo leesɓe nder lesdi ɓe ndahaaka haa Baabila, worɓe e rewɓe e ɓikkoy.

⁸ Ngam maajum Isma'iilu ɓii Netaniya e Yohanan ɓii Kareha e Seraya ɓii Tanhumet e ɓiɓɓe Efay Netofaajo e Yaajaniya Ma'akatiijo, kamɓe e worɓe maɓɓe njehi haa Gedaliya haa Mispa.

⁹ Gedaliya ɓii Ahikam ɓii Safan hunani ɓe: “Taa kule jagganaago Kaldiya'en. Njooɗe nder lesdi, njaggane laamiiɗo Baabila, nden kam on njooɗoto jam.

¹⁰ Min mi jooɗoto haa Mispa, mi wakiiliijo mooɗon haa Kaldiya'en waranɓe haa amin. Onon boo, mooɓte inaboojam e ɓiɓɓe leɗɗe e nebbam, cige ɗum. Njooɗe nder gure ɗe maroton.”

¹¹ Yahuudu'en wonɓe haa Mo'ab e Ammoon e Edoom e lesɗe goɗɗe, kamɓe boo ɓe nani laamiiɗo Baabila acci yimɓe luttuɓe haa Yahuuda. Ɓe nani boo o darni Gedaliya ɓii Ahikam ɓii Safan ngomnaajo dow maɓɓe.

¹² Ngam maajum ɓe ngurti haa nokkuuje ɓe caŋkiti fuu, ɓe ngarti Yahuuda, haa Gedaliya nder wuro Mispa, ɓe mooɓti inaboojam e ɓiɓɓe leɗɗe, ɗuuɗɗum masin.

¹³ Ɓaawo man Yohanan ɓii Kareha e mawɓe konu woɗɓe go ngari haa Gedaliya haa Mispa,

¹⁴ mbi'i: “A anndi na? Ba'alis, laamiiɗo Ammoon neli Isma'iilu ɓii Netaniya ngam mbarugo ma.” Ammaa Gedaliya ɓii Ahikam jaɓaay ko ɓe mbi'i.

¹⁵ Nden Yohanan wi'i mo bee sirri: “Accu mi yaha, mi mbara Isma'iilu ɓii Netaniya. Walaa mo heɓtata ɗum. Koni o ɗaɓɓata mbarugo ma? To bana non, Yahuudu'en mooɓtiiɓe haa maaɗa fuu caŋkititto, luttuɓe Yahuuda fuu kalkan.”

¹⁶ Ammaa Gedaliya jaabi mo: “Taa waɗ ɗum. Ko mbi'ɗa dow Isma'iilu, ɗum fewre.”