Yeremiya 34 - Fulfulde Bible

Annabaaku dow Sedekiya

¹ Jawmiraawo wolwani Yeremiya saa'i Nabukodonosor, laamiiɗo Baabila wardi bee jama'aare konu muuɗum e honooɓe diga laamuuji gonɗi les laamu maako fuu e ummaatooje fuu, ɓe kaɓi bee Urusaliima e gure taariiɗe ngol fuu.

² Jawmiraawo Allah Isra'iila wi'i Yeremiya: “Yah, yeccu Sedekiya, laamiiɗo Yahuuda: Ndaa nii Jawmiraawo wi'i: Mi hokkan berniwol ngo'ol haa laamiiɗo Baabila, ngam o wula ngol.

³ An boo a daɗataa mo, ammaa ɓe naŋngete, ɓe ndokke haa juŋngo maako. A laaran mo gite bee gite, a wolidan bee maako. Nden a yahan Baabila.

⁴ An Sedekiya, laamiiɗo Yahuuda, nan ko Jawmiraawo wi'i dow maaɗa: A maayrataa bee kaafahi.

⁵ A maayan nder de'ere. Bana yimɓe ngulno uurle ngam kaakiraaɓe ma laamiiɓe aartuɓe ma, bana non ɓe ngulan uurle ngam maaɗa boo. Ɓe mboyete: Wayyo, barkaama! Ndaa ko mbi'mi, min Jawmiraawo.”

⁶ Annabi Yeremiya lornani laamiiɗo Sedekiya bolle ɗe'e fuu haa Urusaliima.

⁷ Saa'i man honooɓe laamiiɗo Baabila ɗon kaɓa bee berniwol. Ɓe ɗon kaɓa boo bee Lakis e Azeka, ngam berniiji ɗi'i tan lutti nder berniiji Yahuuda cemmbiɗɗi fuu.

⁸ Fahin Jawmiraawo wolwani Yeremiya, ɓaawo laamiiɗo Sedekiya haɓɓi alkawal bee yimɓe Urusaliima fuu ngam wooynugo ɓe njoofa jeyaaɓe maɓɓe.

⁹ Ɓe narri koo moy yoofa maccuɗo mum Ibraniŋkeejo fuu e korɗo mum Ibraniŋkeejo, taa goɗɗo huuwna banndum Yahuuduujo.

¹⁰ Ardiiɓe e ummaatoore fuu njaɓi alkawal nga'al ngam yoofugo maccuɓe e horɓe muuɗum'en, taa ɓe meeta macciɗingo ɓe. Ɓe mbaɗi non, ɓe ndimɗini ɓe.

¹¹ Ammaa ɓaawoɗon numooji maɓɓe ngayliti, ɓe ɗaɓɓiti yoofaaɓe, ɓe macciɗini ɓe kadiboo.

¹² Saa'i man Jawmiraawo wolwani Yeremiya.

¹³ Jawmiraawo, Allah Isra'iila wi'i: “Mi haɓɓi alkawal bee kaakiraaɓe mooɗon saa'i mi rimɗini ɓe diga njeyaaŋgu haa lesdi Misra. Mi umri ɓe, mi wi'i:

¹⁴ Nde duuɓi joweeɗiɗi njaalti fuu, sey ɓe njoofa banndiraaɓe maɓɓe Ibraniŋke'en soorruɓe ko'e muuɗum'en haa jaagorɓe muuɗum'en nde nii ɓe kuuwani ɓe duuɓi joweego. Ammaa kaakiraaɓe mon ɗowtanaaki yam, ɓe kakkilanaay ko mbi'mi ɓe.

¹⁵ Onon boo, neeɓaay on ngartani yam, on mbaɗi ko fottani yam bee yoofugo banndiraaɓe mon fuu. On kaɓɓi alkawal yeeso am nder suudu senaandu ngam am.

¹⁶ Ammaa jonta numooji mon ngayliti, on coɓni innde am. Koo moy mooɗon ɗaɓɓiti maccuɗo mum e korɗo mum, on macciɗini ɓe kadiboo, koo nde on ndimɗinno ɓe.

¹⁷ Ngam maajum min Jawmiraawo mi wi'i: On ɗowtanaaki yam, on njoofaay banndiraaɓe mon fuu. Ammaa min mi yoofan on ngam haa maayron bee konu e nyawu kalluŋgu ndaaɓoowu e weelo, haa ummaatooje duniyaaru fuu kula saa'i ɗe ngi'i on.

^18-19 Ardiiɓe Yahuuda e Urusaliima e saraaki'en e liman'en e yimɓe lesdi fuu kaɓɓi alkawal yeeso am. Ɓe ta'i gaggel caka cak, ɓe caali caka reetaaji maagel ɗiɗi. Ammaa ɓe piisti alkawal am, ɓe tokkaaki umrooje maagal. Ngam maajum mbaɗanmi ɓe ko ɓe mbaɗi gaggel.

²⁰ Mi hokkan ɓe haa konne'en maɓɓe yiɗɓe mbarugo ɓe. Ɓalli maɓɓe laatanto colli e dabbaaji ladde nyaamdu.

²¹ Mi hokkan Sedekiya, laamiiɗo Yahuuda e saraaki'en muuɗum, haa juuɗe konne'en maɓɓe yiɗɓe mbarugo ɓe. Mi hokkan ɓe haa honooɓe laamiiɗo Baabila, accuɓe haɓugo bee mooɗon.

²² Mi umran ɓe ɓe lorto, ɓe kaɓa bee berniwol ngo'ol, ɓe nyaama ngol, ɓe ngula ngol. Mi laatinan gure Yahuuda ladde meere, bilaa jooɗiiɓe ton.” Non Jawmiraawo wi'i.