Yeremiya 33 - Fulfulde Bible

Iinaaji kesi ngam Isra'iila

¹ Saa'i nde Yeremiya ɗonno maɓɓi nder daldal saare laamiiɗo haa aynooɓe aynata, Jawmiraawo wolwani mo ɗiɗaɓre.

² Jawmiraawo mo tagi duniyaaru, tabitini ndu, mo innde mum Jawmiraawo, wi'i Yeremiya:

³ “Ewnam, mi jaaboto ma, mi anndinte kuuje mawɗe nyukkiiɗe ɗe a meeɗaay anndugo.

^4-5 Min Jawmiraawo, Allah Isra'iila mi wi'i: Kaldiya'en ngibbinan cuuɗi Urusaliima e cuuɗi laamiiɓe Yahuuda. Gurtaaki mon ngam haɓre bee kuuje kipporɗe ɗe ɓe ɓadini haa berniwol, nafataa. Ɗum hebbingo berniwol bee ɓalli yimɓe ɓe mbaranmi nder tikkere am e ɓernuki am tan. Mi wiirni yeeso am, taa mi yi'a berniwol ngo'ol ngam daliila halleende nde yimɓe maagol mbaɗi fuu.

⁶ Ammaa mi hurgan ngol, mi yamɗitinan ngol. Mi yamɗitinan yimɓe maagol, mi seynan ɓe bee salaaman e de'ere.

⁷ Mi wo'itinan joonde Yahuuda e Isra'iila, mi wartiran nde bana naane.

⁸ Mi laɓɓinan ɓe e aybeeji maɓɓe ɗi ɓe mbaɗno heedi am fuu, mi yaafoto hakkeeji maɓɓe fuu e tuurtol maɓɓe.

⁹ Urusaliima laatanto yam daliila seyo e maŋgtoore e tedduŋgal. Yimɓe ummaatooje duniyaaru fuu kulan, ndiwnan to ɓe nani habaru kuuje booɗɗe e hayru ko mbaɗananmi yimɓe Urusaliima fuu.”

¹⁰ Ndaa nii Jawmiraawo wi'i: “Yimɓe mbi'i nokkuure nde'e ferwi, walaa yimɓe koo dabbaaji ton. Gooŋga, gure Yahuuda e laabi Urusaliima perwi, walaa yimɓe koo dabbaaji ton. Ammaa haa nokkuuje ɗe'e on nanan fahin

¹¹ hoolo seyo e welwelo, daande ɓaŋɗo e daande ɓaŋaaɗo. On nanan gime waddooɓe kirseteeɗi ngam yettugo Jawmiraawo nder suudu maako. Ɓe mbi'an: Ngette Jawmiraawo honooɓe asama, ngam o booɗɗo, mbooɗeeŋga maako ɗon haa abada! Ngam mi wartiran lesdi ndi'i bana naane.” Non Jawmiraawo wi'i.

¹² Ndaa nii Jawmiraawo honooɓe asama wi'i: “Haa nokkuure ferewnde nde'e nde walaa yimɓe koo dabbaaji e haa gure fuu, durduɗe laatoto fahin haa waynaaɓe ciwtina tokke muuɗum'en.

¹³ Nder gure fuu, dow kooseeje, haa lesdi towndiije, haa Lesdi Fombina, nder lesdi Benyamin, nder gure taariiɗe Urusaliima e nder gure Yahuuda, waynaaɓe caalinan dammooji muuɗum'en fahin, liman ɗi.” Non Jawmiraawo wi'i.

¹⁴ Jawmiraawo wi'i: “Saa'i ɗon wara haa mi hiɓɓina iinaaji ɗi mi iinani yimɓe Isra'iila e Yahuuda.

¹⁵ Saa'i man umminanmi goɗɗo mo danygol Daawuda bi'eteeɗo Fuɗŋgo, o adiliijo. Kaŋko o waɗan kiita ngooŋɗuka e adilaaku nder lesdi.

¹⁶ Saa'i man Yahuuda hisan, Urusaliima boo jooɗoto jam. Yimɓe ndokkan ngol innde Jawmiraawo-woni-adilaaku-meeɗen.

¹⁷ Min Jawmiraawo mi wi'i: Foroy goɗɗo danygol Daawuda jooɗoto dow leeso laamu Isra'iila.

¹⁸ Tum liman'en ɓe lenyol Lewi ndaroto yeeso am ngam lii'aago guleteeɗi e dokke nyaamdu e kirseteeɗi nyalaade nyalaade fuu.”

¹⁹ Jawmiraawo wolwani Yeremiya,

²⁰ o wi'i mo: “On mbaawataa fiistugo alkawal am bee nyalawma, koo alkawal am bee jemma, haa nyalawma e jemma acca waŋgugo nder wakkati man.

²¹ Bana non boo walaa mo waawata fiistugo alkawal am bee suka am Daawuda, haa goɗɗo danygol maako acca laamaago dow leeso laamu maako. Non boo alkawal am bee liman'en Lewi'en jagganiiɓe yam.

²² Mi ɗuɗɗinan danygol suka am Daawuda e limgal liman'en Lewi'en jagganiiɓe yam, ɓe ɗuuɗan bana koode asama malla njaareendi maayo, walaa baawanɗo limugo ɗum.”

²³ Jawmiraawo wolwani Yeremiya, wi'i mo:

²⁴ “A nani ko yimɓe mbi'ata na? Ɓe ɗon mbi'a: Jawmiraawo wudini yimɓe Isra'iila e Yahuuda ɓe o suɓi naane. Ɓe ɗon njawo yimɓe am, ɓe laataaki ummaatoore am fahin.

²⁵ Ammaa min Jawmiraawo mi haɓɓi alkawal bee nyalawma e bee jemma, mi waɗi umrooje ngam asama e lesdi.

²⁶ Fakat bana mi tabitini ɗum, mi jogoto alkawal am bee danygol Yaakubu e suka am Daawuda, mi laaman goɗɗo danygol Daawuda dow danygol Ibrahiima e Isiyaaku e Yaakubu. Ngam mi wartiran joonde maɓɓe bana naane, mi enɗan ɓe.”