Yeremiya 26 - Fulfulde Bible

Yeremiya yeeso kiita

¹ Saa'i Yooyakim ɓii Yusiya fuɗɗi laamaago nder lesdi Yahuuda, Jawmiraawo wolwani Yeremiya.

² Jawmiraawo wi'i: “Dara haa daldal haykaliiru, yeccu yimɓe warɓe diga gure Yahuuda ngam sujidango yam fuu ko mi umri ma fuu, taa ittu koo wolde woore.

³ Teema ɓe nanan, ɓe fuu ɓe lorto diga laabi maɓɓe kalluɗi. Nden kam mi faasitan waɗugo ɓe sarru ngu anninmi ukkango ɓe daliila kuuɗe maɓɓe kalluɗe.

⁴ Yeccu ɓe: Ndaa nii Jawmiraawo wi'i: Naneeɗam, ɗowtane tawreeta ka ndokkumi on,

⁵ kakkilane bolle sukaaɓe am annabi'en ɓe tokkiimi nelugo haa mooɗon. Ammaa on nanaay.

⁶ To on ɗowtanaaki yam, nden kam mi waɗan nokkuure nde'e bana mbaarumi Silo. Ummaatooje duniyaaru fuu naaliran bee innde berniwol ngo'ol.”

⁷ Liman'en e annabi'en e ummaatoore fuu keɗiti yaake Yeremiya wolwi bolle ɗe'e haa haykaliiru Jawmiraawo.

⁸ Nde Yeremiya timmini wolwugo ko Jawmiraawo umruno mo o wolwana ummaatoore fuu, liman'en e annabi'en e ummaatoore fuu naŋngi mo, kooli: “A he'i mbareego!

⁹ Koni mbaɗɗa annabaaku bee innde Jawmiraawo, mbi'ɗa: Suudu ndu'u laatoto bana Silo, berniwol ngo'ol boo laatoto winnde, walaa goɗɗo jooɗoto ton.” Nden ummaatoore fuu mooɓotiri dow Yeremiya haa haykaliiru Jawmiraawo.

¹⁰ Nde ardiiɓe Yahuuda nani haala man, ɓe ummi diga laamiiɗo ɓe ngari haa haykaliiru Jawmiraawo, ɓe njooɗi baŋnge Dammugal Kesal ngal haykaliiru haa ɓe mbaɗa kiita.

¹¹ Nden liman'en e annabi'en mbi'i ardiiɓe e ummaatoore fuu: “Gorko oo he'i kiita mbareego, ngam o waɗi annabaaku dow berniwol ngo'ol, onon fuu on nani bee noppi mooɗon!”

¹² Ammaa Yeremiya wi'i ardiiɓe e ummaatoore fuu: “Jawmiraawo neli yam waɗugo annabaaku dow suudu ndu'u e berniwol ngo'ol, bana ko nanɗon.

¹³ Ammaa jonta mbo'ine laabi mon e kuuɗe mon kadi. Nane bolle Jawmiraawo Allah mon. Nden kam Jawmiraawo faasitan ukkango on sarru ngu o wi'no.

¹⁴ Min kam, ndaa yam haa juuɗe mon. Mbaɗeeɗam ko fottani on.

¹⁵ Ammaa annde fakat: To on mbari yam, nden kam on mbari goɗɗo mo walaa aybe, on ndoondoto aybe ƴiiƴam dow ko'e mon e dow berniwol ngo'ol e dow yimɓe maagol. Ngam gooŋga, Jawmiraawo neli yam haa mooɗon, mi yecca on kuuje ɗe'e fuu.”

¹⁶ Nden ardiiɓe e ummaatoore fuu mbi'i liman'en e annabi'en: “Gorko oo he'aay kiita mbareego, ngam o wolwani en bee innde Jawmiraawo Allah meeɗen.”

¹⁷ Ɓaawo man woɗɓe caka ndotti'en ummi, mbi'i ummaatoore mooɓtiinde:

¹⁸ “Nder zamanu laamiiɗo Hezekiya, Mika mo Moraset waɗani yimɓe Yahuuda fuu annabaaku, yecci ɓe: Ndaa nii Jawmiraawo honooɓe asama wi'i: Konne'en ndeman Siyona bana ngesa, Urusaliima laatoto bille, hooseere haa haykaliiru woni laatoto towndiire guuɓe.

¹⁹ Laamiiɗo Hezekiya e yimɓe Yahuuda fuu mbaraay Mika. Ammaa Hezekiya huli Jawmiraawo, tori mo ɗuuɗɗum. Jawmiraawo boo faasiti ukkango ɓe sarru ngu o wi'no. Enen jonta en ɗon nastina ko'e meeɗen nder sarru naawŋgu.”

Mbarki annabi Uriya

²⁰ Woodi boo goɗɗo feere mo waɗi annabaaku bee innde Jawmiraawo, innde maako Uriya ɓii Semaya mo Kiriyat-Ye'arim. Kaŋko o wolwi dow berniwol ngo'ol e lesdi ndi'i bana Yeremiya wolwiri.

²¹ Nde laamiiɗo Yooyakim e honooɓe muuɗum e ardiiɓe muuɗum fuu nani bolle Uriya, laamiiɗo tefi mbarugo mo. Ammaa Uriya faami ɗum, o hultori, o doggi haa Misra.

²² Nden laamiiɗo Yooyakim neli Elnatan ɓii Akbor bee worɓe woɗɓe haa Misra.

²³ Ɓe ngaddi Uriya diga ton, ɓe njahri mo yeeso laamiiɗo Yooyakim. O mbari mo, o wudini mo nder ngaska ngoota bee mbaraaɓe woɗɓe.

²⁴ Ahikam ɓii Safan faddi Yeremiya, ngam taa o hokke haa juuɗe ummaatoore yiɗnde mbargo mo.