Yeremiya 2 - Fulfulde Bible

Ngaaba Jawmiraawo bee Isra'iila'en tuurtuɓe

¹ Jawmiraawo wolwani yam, wi'i:

² “Yah, wooynu haa berniwol Urusaliima: Ndaa nii Jawmiraawo wi'i: Mi ɗon siftora adilaaku ma saa'i a paanyo e yiide ma saa'i a muuyaaɗo, no a tokkori yam nder ladde, nder lesdi ndi walaa aawre.

³ Saa'i man Isra'iila'en laatakeno senaaɓe ngam Jawmiraawo bana ƴaamle codol maako aartuɗe. Koo moy nyaami ɗe, waɗi aybe, sarru ukkani ɗum.” Non Jawmiraawo wi'i.

⁴ Nane wolde Jawmiraawo, onon yimɓe Yaakubu, onon le'i Isra'iila fuu!

⁵ Ndaa nii Jawmiraawo wi'i: “Aybewol ngole kaakiraaɓe mon tawi haa am haa ɓe ndaayti yam? Ɓe tokki meereejum, bana non ɓe laati kamɓe boo meere'en.

⁶ Ɓe ƴamaay: Toy Jawmiraawo mo wurtini en lesdi Misra, mo ɗowi en nder ladde, nder lesdi perewndi, keewndi gasɗe, nder lesdi njoorndi, nyiɓɓundi, ndi walaa saalotooɓe koo jooɗiiɓe ton?

⁷ Min waddi on nder lesdi ndimoori haa on nyaama ɓenndalooje maari e kuuje maari booɗɗe. Ammaa onon, nde on nasti ndi, on coɓni lesdi am, on ngartiri maral am nyidduŋgal.

⁸ Liman'en meeɗaay ƴamugo: Toy Jawmiraawo? Fassitirooɓe tawreeta anndaa yam, ardiiɓe tuurtani yam, annabi'en boo mbaɗi annabaaku bee innde Ba'al, tokki ɗowanteeɓe ɓe nafataa.

⁹ Ngam man ngullotoomi on fahin. Mi ɗon wullo boo taaniraaɓe mooɗon.” Non Jawmiraawo wi'i.

¹⁰ “Njehe haa duuɗe Kitti'en, ndaaroye. Malla nele nelaaɓe haa Keedar, kakkile booɗɗum, ndaare teema irin ɗu'um meeɗi laataago!

¹¹ Woodi ummaatoore sannjunde ɗowanteeɓe muuɗum na? Koo nde ɓe laataaki ɗowanteeɓe bee gooŋga! Ammaa ummaatoore am sannji tedduŋgal muuɗum bee ɗowanteeɗo mo nafataa!

¹² Kayɗine daliila man, onon asamanji, ndiwne, kultore!” Non Jawmiraawo wi'i.

¹³ “Ngam ummaatoore am waɗi aybe cowi ɗiɗi: Min mo seeɓoore ngeendam, ɓe acci yam ɓe ngasi gaawi ceekɗi ɗi njogataako ndiyam ngam ko'e maɓɓe.

¹⁴ Kadi Isra'iila laati maccuɗo malla o danyaaɗo nder njeyaaŋgu na? Koni o laati keɓal konu?

¹⁵ Barooɗe ɗon ubba dow maako, ɗon ubba bee semmbe, ɗon mbonna lesdi maako. Berniiji maako gulaaɗi perwi, woodaa goɗɗo haa ton.

¹⁶ Koo yimɓe Memfis e Tahapanes boo pemmbi on, laatini on maccuɓe.

¹⁷ Ɗum fuu ɗum laatani on ngam on acci Jawmiraawo, Allah mooɗon yaake o ɗonno ɗowa on.

¹⁸ Kadi jonta boo, ko lortaago Misra ngam yarugo ndiyam Sikor nafata? Malla ko yahugo Assuura ngam yarugo ndiyam Efratis nafata?

¹⁹ Halleende mooɗon, kayre ɓoccata on, tuurtol mooɗon boo ɗon do'a on kiita! On acci yam, min Jawmiraawo, Allah mooɗon, on acci hulugo yam. Annde, paame no ɗum halliri masin!”, non Jawmiraawo Allah honooɓe asama wi'i.

²⁰ “Diga ɓooyma on tuurtani yam, on teeti, on mbi'i: Min njaggantaako ma fahin! Ammaa on ɗon turi bana daakaareejo dow towndiije fuu e les leɗɗe kecce fuu.

²¹ Mi jubi on bana inabohi cuɓaaki, bana fuɗŋgo wooɗŋgo. Ko waɗi mi ɗon yi'a jonta on ngayli, on laati inabohi bonniiki, jananhi?

²² Koo to on ngiiwake bee kilbu, to on ɗuɗɗini lootirde, tuundi hakke mooɗon ɗon lutta yeeso am”, non Jawmiraawo Allah wi'i.

²³ Koni on ɗon mbi'a: “Min coɓaay, min tokkaaki Ba'alji. Ndaare laabi mooɗon nder waadiwol, anndite kuuɗe mooɗon. On laati bana ngeelooba ndewa ndogganŋga koo toy fuu,

²⁴ bana wamnde rewre woownde yeeɗugo nder ladde hamaadaare, laahannde ngam suuno maare ɗuuɗŋgo. Moy naŋgtata nde? Walaa haaje wamnde worde soma ɗaɓɓitugo nde. Nde lewru maare waɗi, koo moy tawan nde law.

²⁵ Ndikka ndaroɗon! To naa non paɗe mooɗon paɗɗititto, kondondi mooɗon boo njooran! Ammaa on ɗon mbi'a: Aa'a, woodaa! Min ngiɗi jananɓe, min tokkoto ɓe.

²⁶ Bana gujjo ɗon semta to o naŋngaama, bana non yimɓe Isra'iila ɗon cemta, kamɓe e laamiiɓe maɓɓe e ardiiɓe maɓɓe e liman'en maɓɓe e annabi'en maɓɓe.

²⁷ Ɓe ɗon mbi'a leggal: An woni baaba amin! Ɓe ɗon mbi'a hayre boo: An danyi min! Ngam ɓe ngaylitani yam ɓaawe maɓɓe, naa geese maɓɓe. Ammaa to ɓe nasti bone, ɓe mbi'an: Umma, hisnu min!

²⁸ Kadi toy ɗowanteeɓe mooɗon ɓe mbaɗanɗon ko'e mooɗon? Sey ɓe ummo, ɓe kisna on to on nasti bone! Onon yimɓe Yahuuda, ɗowanteeɓe mooɗon ɗuuɗi bana gure mooɗon.

²⁹ Koni ngulloton yam? On fuu on tuurtani yam.” Non Jawmiraawo wi'i.

³⁰ “Mi ɓocci ɓiɓɓe mooɗon, ammaa ɗum nafaay, ɓe njaɓaay elto. Kaafahi mooɗon mbari annabi'en bana mbarooga zammbotoowa.

³¹ Onon yidere nde'e, kakkilane wolde Jawmiraawo! Kadi mi laatanake Isra'iila ladde malla lesdi nyiɓre ɓaleere na? Koni ummaatoore am ɗon wi'a: Min njahan haa min ngiɗi fuu, min lortataako haa maaɗa?

³² Kadi paanyo debbo yejjitan fawne muuɗum na? Ɓaŋgeteeɗo yejjitan toggoore ɓaŋgal muuɗum na? Ammaa ummaatoore am yejjiti yam, neeɓi.

³³ Kayya, on anndi ɗaɓɓititgo yiɗɓe on! Ngam maajum on mboowi waɗugo zunuubaaji.

³⁴ Ƴiiƴam laafuɓe ɓe ngalaa aybe ɗon haa gawarle limce mooɗon, koo nde on tawaay ɓe ɗon nasta cuuɗi mooɗon ngam wujjugo. Ammaa bee non fuu

³⁵ on ɗon mbi'a: Min ngalaa aybe! Sey a acca tikkango min! Ndaa, mi hiitoto on ngam on mbi'i: Min mbaɗaay hakke!

³⁶ On ɗon ngayla laabi mooɗon bee koyɗum! On cemtan daliila Misra, bana on cemtiri daliila Assuura.

³⁷ On loroto diga ton bee juuɗe mooɗon dow ko'e mooɗon. Ngam yimɓe ɓe koolotooɗon, min Jawmiraawo mi wudini ɓe. On keɓataa hayru haa maɓɓe.”