Yeremiya 19 - Fulfulde Bible

Alaama mbulku pusŋgu

¹ Jawmiraawo wi'i ni'i: “Yah, soodu mbulku. Hoo'u woɗɓe caka ndotti'en ummaatoore e ndotti'en caka liman'en.

² Yahdu bee maɓɓe haa Waadiwol Ɓii-Hinnom, haa yaasi Dammugal Keeɗe. Wooynu ton ko mi wi'ete.

³ Wi': Sey on nana wolde Jawmiraawo, onon laamiiɓe Yahuuda e jooɗiiɓe nder Urusaliima. Ndaa nii Jawmiraawo honooɓe asama, Allah Isra'iila wi'i: Mi yahran sarru dow nokkuure nde'e. Koo moy nani ɗum, noppi mum ciikan.

⁴ Mi waɗan ɗum ngam yimɓe acci yam, ɓe cannji nokkuure nde'e bee wulugo uurle ngam ɗowanteeɓe jananɓe haa yimɓe annditaay nde. Koo kamɓe, koo kaakiraaɓe maɓɓe, koo laamiiɓe Yahuuda, walaa mo anndino ɗowanteeɓe ɓe'e. Ɓe kebbini nokkuure nde'e bee ƴiiƴam yimɓe mbaraaɓe ɓe ngalaa aybe.

⁵ Ɓe nyiɓi nokkuuje towɗe ngam Ba'al, haa ɓe nguloya ɓikkoy maɓɓe bee yiite bana guleteeɗi. Min mi umraay ɓe waɗugo ɗum, mi meeɗaay wolwugo irin man koo numugo ɗum.

⁶ Ngam maajum min Jawmiraawo mi wi'i: Saa'i waran nde ɓe ewnataako nokkuure nde'e Tofet malla Waadiwol Ɓii-Hinnom, ammaa Waadiwol Kirsol.

⁷ Haa nokkuure nde'e mbilanmi nufayeeje Yahuuda e Urusaliima. Mi do'an yimɓe bee kaafahi konne'en maɓɓe yiɗɓe mbarugo ɓe. Mi nyaamnan colli e dabbaaji ɓalli maɓɓe.

⁸ Mi wilan berniwol ngo'ol, ngol laatoto daliila jancoore. Koo moy caalotooɗo baŋnge maagol hultoran, hayɗinan ngam masiibooji maagol fuu.

⁹ Mi nyaamnan jooɗiiɓe nder maagol kusel ɓikkoy muuɗum'en ngorkoy e ndehoy. Konne'en maɓɓe e yiɗɓe mbarugo kippoto berniwol. Nder ɓillaare nde'e, jooɗiiɓe ton nyaamnyaamtiran.”

¹⁰ Nden pusa mbulku go yeeso yahduɓe bee ma,

¹¹ yeccu ɓe: “Ndaa nii Jawmiraawo honooɓe asama wi'i: Mi fusan yimɓe ɓe'e e berniwol ngo'ol bana goɗɗo fusrata mbulku, ngu wo'itintaako. Ɓe uwan maayɓe haa Tofet ngam babal he'aay.

¹² Bana non waaranmi berniwol ngo'ol e jooɗiiɓe ton. Mi laatinan ngol bana Tofet.” Non Jawmiraawo wi'i.

¹³ “Cuuɗi Urusaliima e cuuɗi laamiiɓe Yahuuda waato soorooji haa ɓe ngulani jama'aare asama fuu uurle dow muuɗum, haa ɓe ndufi dokke dufeteeɗe ngam ɗowanteeɓe jananɓe – ɗi fuu ɗi coɓan bana Tofet.”

Pashuuru limanjo toonyi Yeremiya

¹⁴ Yeremiya lori diga Tofet haa Jawmiraawo nelno mo waɗugo annabaaku. O dari haa babal yeeso haykaliiru Jawmiraawo, o wi'i ummaatoore fuu:

¹⁵ “Ndaa nii Jawmiraawo honooɓe asama, Allah Isra'iila wi'i: Mi yahran sarru dow berniwol ngo'ol e gure maagol fuu, bana ko mbi'mi. Ngam on caatini ko'e mooɗon, on cali ɗowtanaago bolle am.”