Yeremiya 10 - Fulfulde Bible

Njaggu labbi e njaggu Allah

¹ Onon yimɓe Isra'iila, nane koŋngol Jawmiraawo dow mooɗon.

² Ndaa nii Jawmiraawo wi'i: “Taa tokke laawol ummaatooje goɗɗe. Taa kultore ngam alaamaaji haa asama, koo to ummaatooje man ɗon kula ɗi.

³ Farillaaji yimɓe ummaatooje ɗe'e nafataa sam. Ɓe pe'an lekki nder laynde, cehoowo sehan leggal man bee cehrugel,

⁴ fawnan ngal bee cardi e kaŋŋeeri. Nden o tigga cehaaɗum man bee tappirɗum e suufuuje, ngam taa ɗum dimmbo.

⁵ Suuraaji labbi ɗi'i nanndi bee kulnirɗum colli haa ngesa kurciije. Ɗi mbolwataa, ɗi njahataa boo, doole goɗɗo roondo ɗi. Taa kule ɗi, ngam ɗi mbaawataa waɗugo koo kalluɗum koo booɗɗum.”

⁶ Yaa Jawmiraawo, walaa nannduɗo bee maaɗa. A mawɗo, innde maaɗa nde mawnde marnde semmbe.

⁷ Moy hulataa ma, yaa laamiiɗo ummaatooje? An a he'i huleego. Walaa nannduɗo bee maaɗa caka marɓe hikma nder ummaatooje e nder laamuuji maɓɓe fuu.

⁸ Ɓe fuu maɓɓe ɓe faataaɓe, sooya-hakkiilo'en, ngam ɗowanteeɓe ekkitinooɓe ɓe, ɗum leggal meere!

⁹ Cardi ngam labbi maɓɓe iwi haa Tarsis, kaŋŋeeri boo haa Ufas. Baɗoowo sanaa'a e kilaajo mbaɗi ɗi. Ɗi ɗon ɓorni limce carwinaaɗe e boɗeeje, baɗaaɗe bee juuɗe waawɓe.

¹⁰ Ammaa Jawmiraawo o Allah bee gooŋga, o Allah geeto, o laamiiɗo duumiiɗo. To o ɓerni, lesdi dimmboto, to o tikki, ummaatooje ndarataako.

¹¹ Ndaa ko on mbi'ata ummaatooje: Labbi ɗi'i tagaay asama e lesdi, ɗi nattan dow lesdi, ɗi meetataa taweego les asama.

¹² Jawmiraawo waɗi lesdi bee baawɗe mum, bee hikma maako o tagri duniyaaru, bee anndal maako o we'iti asama.

¹³ To o telɓi, ndiyamji nder asama ɗon mooɓo, o ɗon wa'ina duule e keeri duniyaaru, o ɗon sakkina ma'e haa iyeende toɓa, o ɗon wurtina henndu nder cigorɗi maako.

¹⁴ Yimɓe fuu ɓe faataaɓe, sooya-anndal'en. Koo moy kilaajo semtiran labbi muuɗum, ngam suuraaji ɗi o waɗi laataaki ɗowanteeɓe bee gooŋga, ɗi ngalaa yoŋki.

¹⁵ Ɗi kuuje meereeje, jalnooje, saa'i kiita ɗi kalkan.

¹⁶ Ammaa Allah laatiiɗo geɗal Yaakubu laataaki bana non. Kaŋko woni tagɗo kuuje fuu, o suɓi Isra'iila'en ɓe laato yimɓe maral maako. Innde maako Jawmiraawo honooɓe asama.

Bojji daliila kiita

¹⁷ Onon yimɓe Urusaliima, konne'en kippake on. Ɓofte kuuje mooɗon!

¹⁸ Ngam Jawmiraawo wi'i o riiwan jooɗiiɓe nder lesdi ndi'i jonta, o ɓillan ɓe ngam taa koo gooto maɓɓe daɗa.

¹⁹ Yimɓe Urusaliima ɗon mboya: “Kayto, ɓe naawni min! Kuuduuje amin nyawndataako. Min tammino min mbaawan munyango bone ɗe'e!

²⁰ Ɓe mbili cuuɗi amin, ɓe ta'i ɓoggi laymaaji amin. Ɓikkoy amin acci min, ndilli. Walaa luttuɗo ngam o dartina laymaaji amin, o haɓɓa wiirndallooji maaji.”

²¹ Ardiiɓe mooɗon ɓe faataaɓe, ɓe ɗakkotiraay bee Jawmiraawo. Ngam maajum ɓe keɓaay hayru, yimɓe maɓɓe fuu caŋkiti.

²² Nane! Habaru ɗon wara. Hoolo maŋngo waɗi haa lesdi woyla. Honooɓe maari laatinan berniiji Yahuuda ladde meere e jooɗorde cuuli.

²³ Yaa Jawmiraawo, mi anndi neɗɗo maraay ngeendam muuɗum, o waawataa ɗowugo palanɗe maako.

²⁴ Eltu min, yaa Jawmiraawo! Ammaa naa bee caatal. Taa eltu min bee tikkere, ngam taa a mbara min.

²⁵ Ruf tikkere ma dow ummaatooje ɗe anndaa ma, dow yimɓe ɓe ewnaaki innde ma! Kamɓe ɓe mbari danygol Yaakubu, ɓe nattini min fuu, ɓe mbili lesdi amin!