Yaakuba 2 - Fulfulde Bible

Taa cendindire yimɓe

¹ Deerɗiraaɓe am, nde on nuɗɗinɓe Jawmiraawo meeɗen Yeesu Almasiihu tedduɗo, taa cenndindire yimɓe.

² To diskuɗo ɓorniiɗo limce booɗɗe e halagaare kaŋŋeeri haa hoondu maako, nasti mooɓtorde mooɗon, nden laafuɗo ɓorniiɗo tekkaaje boo nasti,

³ on teddini ɓorniiɗo booɗɗe, on mbi'i mo: “Jooɗa haa babal booɗŋgal nga'al.” Ammaa on mbi'i laafuɗo boo: “Dara ɗo malla jooɗa haa lesdi yeeso am.”

⁴ To on mbaɗi non, on cenndindiraay yimɓe na? On laati hiitooɓe bee numooji kalluɗi.

⁵ Deerɗiraaɓe am yiɗaaɓe, keɗite booɗɗum! Naa Allah suɓi laafuɓe duniyaaru ngam haa ɓe laato riskuɓe nder nuɗɗinki e ɓe ndona laamu ngu o iinani yiɗɓe mo na?

⁶ Ammaa onon on ɗon njawo laafuɓe. Naa ɗum riskuɓe toskinta on e njahrata on yeeso hiitooɓe na?

⁷ Naa kamɓe kallinta innde woonde nde ɓe ewni dow mooɗon?

⁸ Fakat, on mbaɗi ko wooɗi to on kebbitini umroore laamu Allah, fodde ko winnda nder Deftere Seniinde: “Yiɗ keeddiɗɗiraawo ma bana no a yiɗiri hoore ma”.

⁹ Ammaa to on ɗon cenndindira yimɓe, on mbaɗi hakke, umroore tawreeta do'i on kiita ngam on luuti nde.

¹⁰ Ngam koo to goɗɗo ɗowtanake umrooje tawreeta fuu, ammaa o ɗowtanaaki woore nder maaje, o aybuɗo bana luutɗo umrooje tawreeta man fuu.

¹¹ Ngam mo wi'i: “Taa waɗ njeenu” wi'i boo: “Taa mbar-hoore.” Koo to a waɗaay njeenu, ammaa a waɗi mbar-hoore, a luuti umrooje tawreeta fuu.

¹² Ngam maajum, ko on mbolwata malla ko on mbaɗata fuu, paame Allah hiitan on bee tawreeta mum dimɗinanka yimɓe.

¹³ Ngam to goɗɗo walaa enɗam, Allah hiitoto mo bilaa enɗam. Ammaa marɗo enɗam hulataa kiita Allah.

Nuɗɗinki bilaa kuuɗe

¹⁴ Deerɗiraaɓe am! Ɗume ɗum nafata to goɗɗo wi'i: “Mi woodi nuɗɗinki”, ammaa kuuɗe maako mbaŋginaay ki? Nuɗɗinki man hisnan mo na?

¹⁵ To woodi deerɗiraaɓe worɓe malla rewɓe, ɓe ngalaa limce, ɓe ngalaa nyaamdu nde weeti fuu,

¹⁶ goɗɗo caka mooɗon boo wi'i ɓe: “Allah hokku on saa'a! Kolte, nyaame, kaare”, o hokkaay ɓe koo ɗume ngam haaje maɓɓe, ɗume ɗum nafata?

¹⁷ Non nuɗɗinki boo wa'i, to ki waŋginaay kuuɗe maaki, ki baatki.

¹⁸ Ammaa to goɗɗo wi'i: “An a woodi nuɗɗinki, min boo mi woodi kuuɗe”, mi wi'an mo: “Hollam nuɗɗinki ma bilaa kuuɗe, min boo mi hollete nuɗɗinki am bee kuuɗe.”

¹⁹ A nuɗɗini Allah o gooto na? Booɗɗum! Ginnaaji boo nuɗɗini ɗum, ammaa ɗi ɗon ndiwna.

²⁰ Paataaɗo! A yiɗi holleego nuɗɗinki bilaa kuuɗe nafataa sam na?

²¹ Noy Allah adiliniri kaakiraawo meeɗen Ibrahiima? Bee kuuɗe maako o heɓi ɗum, nde o lii'ani Allah Isiyaaku, ɓiyiiko haa hirsirde.

²² A laari no nuɗɗinki maako yahdiri bee kuuɗe maako. Kuuɗe maako kebbitini nuɗɗinki maako.

²³ Bana non ko Deftere Allah wi'no hiɓɓiri: “Ibrahiima nuɗɗini Allah, Allah boo adilini mo.” O ewnaama soobaajo Allah.

²⁴ Kadi na on ndaari, neɗɗo adilinaama bee kuuɗe, naa bee nuɗɗinki tan.

²⁵ Non boo Rahab, daakaareejo. O adilinaama ngam daliila kuuɗe maako, nde o jaɓɓi nelaaɓe Yahuudu'en, o wurtini ɓe bee laawol goɗŋgol.

²⁶ Bana no goɗɗo bilaa yoŋki laatake maayɗo, non nuɗɗinki bilaa kuuɗe boo ki baatki.