Wahayu Yuhanna 6 - Fulfulde Bible

Takkitannde takkanɗe joweego aartuɗe

¹ Nden mi yi'i jawgel go takkiti takkannde arannde haa takkanɗe joweeɗiɗi go. Mi nani woore nder kuuje geete nayi wi'i bee sawtu bana felmaaŋgo: “War!”

² Mi yi'i puccu ndaneewu. Ba'iiɗo ngu ɗon jogi lagaawal, ɓe ndokki mo woronnde. O dilli, o jaaliiɗo haa o jaalo fahin.

³ Nde jawgel takkiti takkannde ɗiɗawre, mi nani huunde ɗiɗawre wi'i: “War!”

⁴ Puccu feere wurti, ngu mboɗeewu. Ɓe ndokki ba'iiɗo ngu kaafahi makki, ɓe ndokki mo baawɗe waddango duniyaaru konu, haa yimɓe mbarmbartira.

⁵ Nde jawgel takkiti takkannde tataɓre, mi nani huunde tataɓre ɗon wi'a: “War!” Nden mi yi'i puccu ɓaleewu, ba'iiɗo ngu ɗon jogi kilo poondirɗum haa juŋngo muuɗum.

⁶ Mi nani ko nanndi bee sawtu caka kuuje geete nayi wi'i: “Alkamaari agoda gootel soorra deydey ngeenaari kuugal nyalaade woore, non boo sa'iiruuri agoda tati! Ammaa taa wonnu nebbam malla inaboojam!”

⁷ Nde jawgel takkiti takkannde nayaɓre. Mi nani sawtu huunde nayaɓre ɗon wi'a: “War!”

⁸ Mi yi'i, puccu puru. Ba'iiɗo ngu wi'ete Maayde, nden bi'eteeɗo Joonde-maayɓe tokki mo. Ɓe ndokkaama baawɗe dow yeɓre duniyaaru woore nder nayi haa ɓe mbara yimɓe bee kaafahi e weelo e nyawu ndaaɓoowu e dabbaaji ladde.

⁹ Nde jawgel takkiti takkannde jowaɓre, mi yi'i les hirsirde, yoŋkiiji mbaraaɓe ngam daliila wolde Allah e seedamku ngu ɓe ceedi.

¹⁰ Ɓe ɗon ngooka bee sawtu, ɓe ɗon mbi'a: “Yaa Jawmiraawo, ceniiɗo, gooŋgaajo! Haa ndey min ndeenata haa a hiito jooɗiiɓe haa duniyaaru, a waato ngam ɓe mbari min?”

¹¹ Nden ɓe ndokki koo moy maɓɓe ngapaleewol daneewol, ɓe mbi'i ɓe ɓe munya seɗɗa tawon, haa to limgal deerɗiraaɓe maɓɓe jagganooɓe Allah, mbareteeɓe bana maɓɓe ciki.

¹² Nde mi yi'i jawgel takkiti takkannde joweego'oore, lesdi dimmbi masin. Naaŋge ɓalwi bana limce ɓaleeje kurum, lewru wooji coy bana ƴiiƴam,

¹³ koode asama ɗon caama haa lesdi bana ibbe kecce caamirta haa ibbi to henndu semmbiɗndu dimmbini ki.

¹⁴ Asama sotti, taggaama bana goɗɗo taggirta ɗereewol. Kooseeje e duuɗe fuu cotti diga nokkuuje maaje.

¹⁵ Nden laamiiɓe duniyaaru e mawɓe e mawɓe sooje'en e riskuɓe e marɓe baawɗe e maccuɓe e rimɓe fuu nyukkini ko'e muuɗum'en nder lowi e caka tapaaje kooseeje.

¹⁶ Ɓe ɗon mbi'a kooseeje e tapaaje: “Ndo'e dow amin, nyukkine min diga yeeso jooɗiiɗo dow leeso laamu e ɓernuki jawgel!

¹⁷ Ngam nyalaade ɓernuki maɓɓe mawnde yottake, moy waawata dartanaago nde?”