Wahayu Yuhanna 22 - Fulfulde Bible

¹ Nden malaa'ikaajo go holli yam maayo ndiyam ngeendam. Ngo ɗon jalbita bana kiristal, ngo iwi haa leeso laamu Allah e jawgel.

² Haa caka daldal berniwol e haa pomoole maayo man, lekki ngeendam ɗon dari ton. Ki ɗon rima ɓiɓɓe nde sappo e ɗiɗi nder hitaande, lewru fuu nde woore. Haako maaki laati kurgun ngam hurgugo ummaatooje.

³ Naaloore meetataa taweego ton. Leeso laamu Allah e jawgel daroto nder maagol, jagganooɓe Allah njagganto mo.

⁴ Ɓe ngi'an yeeso maako, innde maako ɗon winndi haa tiiɗe maɓɓe.

⁵ Jemma waɗataa haa ton fahin, walaa mo marata haaje pittirla malla jayŋgol naaŋge, ngam Jawmiraawo Allah yaynanan ɓe bee annoora mum. Ɓe laamoto haa abada abadin.

Garki Yeesu

⁶ Nden malaa'ikaajo go wi'i yam: “Bolle ɗe'e, ɗe gooŋgaaje, ɗe koolniiɗe. Jawmiraawo Allah dokkuɗo annabi'en ruuhuuji annabaaku, neli malaa'ikaajo muuɗum ngam ɓe kolla jaggiiɓe muuɗum ko ɓadake wargo bee doole.”

⁷ Yeesu wi'i: “Ndaa, mi ɓadake wargo! Barka laatanto ɗowtantooɓe bolle annabaaku nder deftere nde'e!”

⁸ Min Yuhanna mi nani, mi yi'i kuuje ɗe'e. Nde mi nani e mi yi'i ɗe, mi hofi yeeso malaa'ikaajo kolluɗo yam ɗe ngam mi sujidana mo.

⁹ Ammaa o wi'i yam: “Taa waɗ ɗum! Min boo mi jaggiiɗo Allah bana maaɗa e deerɗiraaɓe ma annabi'en e ɗowtaniiɓe bolle deftere nde'e fuu. Sujidan Allah!”

¹⁰ Fahin, o wi'i yam: “Taa maɓɓu bolle annabaaku nder deftere nde'e, ngam wakkatiire nde kuuje ɗe'e laatoto ɓadake yottaago.

¹¹ Koo moy halli, o tokko waɗugo halleende, koo moy soɓi, o tokko waɗugo coɓɗum, koo moy laatiiɗo adiliijo, o tokko waɗugo adilaaku, koo moy seni, o tokko jooɗaago nder senaare.”

¹² Yeesu wi'i: “Ndaa mi ɓadake wargo. Mi waddan mbarjaari haa mi warjo koo moy fodde kuuɗe muuɗum.

¹³ Min woni Alfa e Omega, arano e ragareejo, fuɗɗoode e timmoode.”

¹⁴ Barka laatanto lootɓe ngapaleeji muuɗum'en. Kamɓe ɓe keɓan jarfu nyaamugo ɓiɓɓe lekki ngeendam, ɓe nastiran berniwol gal dammuɗe.

¹⁵ Ammaa soɓɓe bana dawaaɗi, waɗooɓe hiila, daakaare'en, mbarooɓe ko'e, rewooɓe labbi, yiɗɓe pewe e fewooɓe, doole ɓe njooɗo yaasi berniwol.

¹⁶ “Min Yeesu, mi neli malaa'ikaajo am ngam seedaago kuuje ɗe'e dow jama'aaje nuɗɗinɓe fuu yeeso mooɗon. Min mi goɗɗo asŋgol e danygol Daawuda, mi horre baɓɓol ɗelkannde.”

¹⁷ Ruuhu e ɓaŋgeteeɗo mbi'i: “War!” Koo moy nani ɗum, sey wi'a: “War!” Koo moy ɗomɗi, sey wara. Koo moy yiɗi, sey jaɓa ndiyam ngeendam caahu.

Bolle ragareeje

¹⁸ Min Yuhanna, mi ɗon reentina koo moy nanɗo bolle annabaaku deftere nde'e: To goɗɗo ɓesdi haa maaje, Allah ɓesdanan mo masiibooji binndaaɗi nder deftere nde'e.

¹⁹ To goɗɗo itti koo ɗume haa bolle annabaaku nder deftere nde'e, Allah ittan geɗal maako haa ɓiɓɓe lekki ngeendam e geɗal maako haa berniwol ceniiŋgol bana ko winnda nder deftere nde'e.

²⁰ Ceediiɗo kuuje ɗe'e wi'i: “Fakat, mi ɓadake wargo!” Aamiina! War, yaa Jawmiraawo Yeesu!

²¹ Mo'ere Jawmiraawo Yeesu wonda bee koo moy fuu!