Wahayu Yuhanna 20 - Fulfulde Bible

Duuɓi ujineere

¹ Nden mi yi'i malaa'ikaajo ɗon jippo diga asama, o ɗon jogi maɓɓitirɗum ngaska lugguka go e callalluwol loorŋgol haa juŋngo maako.

² O naŋngi Kuuŋga, mboodi nayeeri, waato Iblisa malla Sayɗaanu, o haɓɓi nga ngam duuɓi ujineere (1.000).

³ O sakkini nga nder ngaska lugguka, huɓli ka, waɗi lammba dow maaka, ngam taa nga meeta zammbaago ummaatooje fahin, sonaa to duuɓi ujineere timmi. Ɓaawoɗon doole nga yoofe baakin wakkati seɗɗa.

⁴ Nden mi yi'i leese laamu. Jooɗiiɓe dow maaje keɓi baawɗe hiitaago. Mi yi'i yoŋkiiji ta'aaɓe ko'e daliila seedamku Yeesu e ngam wolde Allah. Mi yi'i boo yimɓe ɓe cujidanaayno ndabbaawa malla suura maaga, ɓe njaɓaayno maandorde ndabbaawa haa tiinde malla haa juŋngo. Ɓe ɗon ngeeɗi bee Almasiihu, ɓe ɗon laamo bee maako duuɓi ujineere.

⁵ Maayɓe luttuɓe ngeeɗitaay haa duuɓi ujineere timmi. Kanjum woni ummitineeki maayɓe arani.

⁶ Barka e senaare laatanto ummitittooɓe nder ummitineeki arani ki'i! Maayde ɗiɗawre walaa baawɗe dow maɓɓe. Ɓe laatoto liman'en Allah e Almasiihu, ɓe laamodoto bee Almasiihu duuɓi ujineere.

Sayɗaanu jaalaama

⁷ To duuɓi ujineere timmi, Sayɗaanu yoofete diga fursina mum.

⁸ O dillan estoygo ummaatooje gonɗe haa alkibilaaji duniyaaru nayi fuu, waato Gog e Magog. Sayɗaanu mooɓtan ɗe ngam konu, ɗe ɗuuɗan bana njaareendi maayo.

⁹ Ɗe caŋkititto haa duniyaaru fuu, ɗe taaroto saŋngeere senaaɓe Allah e berniwol ngol o ɓuri yiɗugo. Nden yiite jippoto diga asama, nyaaman ɗe.

¹⁰ Nden Sayɗaanu estoowo ɓe, sakkinte nder weendu yiite e baruudu. Naane maa, ndabbaawa e pewoowo bi'anɗo o annabiijo cakkinaama ton. Ɓe fuu ɓe njaran bone ton jemma e naaŋge, haa abada abadin.

Kiita ragareeha

¹¹ Nden mi yi'i leeso laamu maŋngo raneewo e jooɗiiɗo dow maago. Lesdi e asama ndoggi yeeso maako, meetaay yi'eego.

¹² Mi yi'i maayɓe, mawɓe e leesɓe, ɓe ɗon ndari yeeso leeso laamu. Defte maɓɓitaama. Nden deftere woɗnde boo maɓɓitaama, ɗum deftere ngeendam. Maayɓe kiitaama fodde kuuɗe muuɗum'en binndaaɗe nder defte.

¹³ Nden mbeela tuuti maayɓe muuɗum. Maayde e joonde maayɓe boo tuuti maayɓe muuɗum'en. Ɓe kiitaama gooto gooto fodde kuuɗe maɓɓe.

¹⁴ Nden maayde e joonde maayɓe cakkinaama nder weendu yiite. Weendu yiite ndu'u woni maayde ɗiɗawre.

¹⁵ Koo moy mo innde muuɗum winndaaka nder deftere ngeendam, o sakkinaama nder weendu yiite.