Wahayu Yuhanna 12 - Fulfulde Bible

Debbo e Kuuŋga

¹ Nden alaama makka waŋgi haa asama. Woodi debbo ɓorniiɗo naaŋge, lewru ɗon les kosɗe maako, o ɗon hippi woronnde koode sappo e ɗiɗi dow hoore.

² O ɗon bee reedu, o ɗon wooka ngam luuwe naŋngi mo.

³ Nden alaama ngoɗka waŋgi haa asama. Ɗum Kuuŋga, maapinndiiwa, mboɗeewa. Nga woodi ko'e joweeɗiɗi e luwe sappo, hoore koo ndeyeere fuu ɗon bee meetaleewol.

⁴ Bee wicco maaga nga doonyi yeɓre koode woore nder tati haa asama, nga rufi ɗe haa duniyaaru. Nga dari yeeso debbo ɓadiiɗo ɓesnugo go ngam haa nga nyaama ɓiŋngel, to ngel danyaama.

⁵ Nden debbo go ɓesni ɓiɗɗo gorko, ɓiɗɗo oo tammi durugo ummaatooje bee sawru njamndi. Ammaa ɓiŋngel wiftaama, yahraama haa Allah e haa leeso laamu mum.

⁶ Debbo doggi haa ladde hamaadaare, haa nokkuure nde Allah taaskitinani mo haa o nyaamne ton balɗe ujineere e teemeɗɗe ɗiɗi e cappanɗe joweego (1.260).

⁷ Nden konu waɗi haa asama. Mika'iilu e malaa'ika'en muuɗum kaɓi bee Kuuŋga go. Kuuŋga e malaa'ika'en maaga boo kaɓi bee maɓɓe.

⁸ Ammaa Mika'iilu'en njaali nga. Kaŋga e malaa'ika'en maaga fuu keɓaay jooɗaago haa asama fahin.

⁹ Kuuŋga maapinndiiwa, waato mboodi nayeeri, nga ɓe mbi'ata Iblisa malla Sayɗaanu, zammboowo jooɗiiɓe haa duniyaaru fuu, sakkinaama haa lesdi, kaŋga e malaa'ika'en maaga fuu.

¹⁰ Nden mi nani sawtu haa asama ɗon wi'a: “Jonta, kisndam yottake! Allah meeɗen waŋgini baawɗe e laamu muuɗum e baawɗe Almasiihu muuɗum. Ngam gulloowo deerɗiraaɓe meeɗen yeeso Allah meeɗen jemma bee naaŋge go sakkinaama diga asama.

¹¹ Deerɗiraaɓe meeɗen njaali mo bee ƴiiƴam jawgel e bee wolde gooŋga nde ɓe ceedi. Ɓe paalaay yoŋkiiji maɓɓe, ɓe kasdi maayugo.

¹² Ngam maajum ceye, onon asamanji e onon jooɗiiɓe ton! Ammaa bone laatanto lesdi e mbeela! Ngam Iblisa jippanake on, o ɗon ɓerni masin ngam o anndi wakkati seɗɗa tan luttani mo.”

¹³ Nde Kuuŋga go laari nga sakkinaama haa lesdi, nga fuɗɗi taasnugo debbo ɓesnuɗo ɓiɗɗo gorko go.

¹⁴ Ammaa debbo go hokkaama bileeji dutal maŋngal ɗiɗi, ngam haa o fiira, o yaha haa nokkuure maako nder ladde hamaadaare, haa ɓe nyaamni mo duuɓi tati bee reeta, daayiiɗum bee mboodi go.

¹⁵ Nden mboodi tuuti ndiyam bana maayo, ngam haa ɗam tokko debbo, ɗam ilna mo.

¹⁶ Ammaa lesdi walli debbo. Ndi maɓɓiti hunnduko maari, ndi yari ndiyam maayo wurtiiŋgo hunnduko Kuuŋga go.

¹⁷ Nden Kuuŋga go tikkani debbo, nga dilli haɓugo bee luttuɓe nder danygol maako, waato ɗowtaniiɓe umrooje Allah, tabitɓe nder gooŋga ka Yeesu seedani ɓe.

¹⁸ Kuuŋga go dari dow njaareendi haa fomoonde mbeela.