Wahayu Yuhanna 11 - Fulfulde Bible

Seedooɓe ɗiɗo

¹ Nden ɓe ndokki yam kewal poondirgal, ngal nanndi bee sawru. O wi'i yam: “Umma, foondu haykaliiru Allah bee hirsirde maaru, lim sujidooɓe nder maaru.

² Ammaa taa foondu daldal gonŋgal yaasi haykaliiru, ngam ngal hokkaama haa ummaatooje goɗɗe. Ɓe njaaɓan berniwol ceniiŋgol lebbi cappanɗe nayi e ɗiɗi (42).

³ Mi nelan seedooɓe am ɗiɗo, ɓorniiɓe limce buhuuje, ɓe mbaɗan annabaaku nyalɗe ujineere e teemeɗɗe ɗiɗi e cappanɗe joweego (1.260).”

⁴ Seedooɓe ɗiɗo ɓe'e ngoni jaytunje ɗiɗi e pittirlaaji ɗiɗi dariiɗi yeeso Jawmu duniyaaru.

⁵ To goɗɗo tefi naawnugo ɓe, yiite wurtoto kunnduɗe maɓɓe, nyaaman konne'en maɓɓe. Bana nii boo to goɗɗo tefi naawnugo ɓe, fakat o mbareteeɗo bana non.

⁶ Ɓe ngoodi baawɗe maɓɓugo asama ngam taa iyeende toɓa yaake ɓe ɗon mbaɗa annabaaku. Ɓe ngoodi baawɗe waylititgo ndiyamji laato ƴiiƴam. Nde ɓe ngiɗi fuu, ɓe ngoodi baawɗe ukkango duniyaaru masiibooji koo ɗiye fuu.

⁷ To ɓe timmini seedaago, ndabbaawa wurtoto ngaska lugguka go, haɓan bee maɓɓe. Nga jaaloto ɓe, nga mbaran ɓe.

⁸ Ɓalli maɓɓe mbaaloto haa daldal berniwol maŋngol, maana innde maagol Sodoma e Misra, haa ton boo ɓe ɓilno Jawmiraawo maɓɓe dow leggal gaafaaŋgal.

⁹ Woɗɓe nder jama'aaje, asli, ɗemɗe e ummaatooje ngi'an ɓalli maɓɓe balɗe tati bee reeta, ɓe nduŋantaako koo moy uwa ɓe.

¹⁰ Jooɗiiɓe haa duniyaaru ceyorto maayde seedooɓe ɗiɗo ɓe'e. Ɓe mbaɗan juulde, ɓe nelneltiran caahuuji, ngam annabi'en ɓe'e torrino jooɗiiɓe haa duniyaaru masin.

¹¹ Ɓaawo balɗe tati bee reeta, Allah lornani ɓe poofɗe, ɓe ummi, ɓe ndari. Kulol maŋngol naŋngi yi'ɓe ɓe fuu.

¹² Nden annabi'en ɗiɗo go nani sawtu mo asama ɗon wi'a ɓe: “Eeŋge haa ɗo!” Ɓe eeŋgi haa asama nder ruuldere. Konne'en maɓɓe ɗon ndaara ɓe.

¹³ Saa'i man nden lesdi dimmbi masin haa yeɓre berniwol woore nder sappo yibbi. Sarru ngu halki yimɓe ujine njoweeɗiɗo (7.000). Yimɓe luttuɓe kultori, ɓe teddini Allah mo asama.

¹⁴ Torra ɗiɗaɓa saalake, ndaa torra tataɓa ɓadake yottaago.

Luwal joweeɗiɗaɓal

¹⁵ Nden malaa'ikaajo njoweeɗiɗaɓo fuufi luwal muuɗum. Mi nani sawtuuji cemmbiɗɗi nder asama, ɗi ɗon mbi'a: “Laamu duniyaaru laatanake Jawmiraawo meeɗen e Almasiihu muuɗum, o laamoto haa abada abadin!”

¹⁶ Nden ndotti'en noogas e nayo jooɗiiɓe dow leese laamu muuɗum'en yeeso Allah go tuggi koppi, cujidani Allah.

¹⁷ Ɓe mbi'i: “Min ngetti ma, yaa Jawmiraawo Allah Baawɗo dow koo ɗume fuu, mo ɗon, mo ɗonno ɓooyma. A huuwi bee baawɗe ma mawɗe, a laamake!

¹⁸ Ummaatooje tikkani ma, ammaa ɓernuki ma waŋgi. Ɗum wakkati hiitaago maayɓe, warjaago jaggiiɓe ma annabi'en e senaaɓe e hulɓe ma, mawɓe e leesɓe fuu. Non boo, wakkati ngam nattingo nattinooɓe lesdi!”

¹⁹ Nden haykaliiru Allah haa asama maɓɓiti, haa sundukru alkawal mum waŋgi nder maaru. Nden ma'e ma'i, hoolooji mbaɗi, pelmaali mbaɗi, lesdi dimmbi, mallimallooje loorɗe toɓi.