Tooktaaki Tawreeta 34 - Fulfulde Bible

Maayde Muusa

¹ Muusa wurti laɗɗe Mo'ab, wa'i hooseere Nebo, haa yeereere hooseere Pisiga tiitotirnde bee Yeriko. Ton Jawmiraawo holli mo lesdi fuu: Lesdi Gile'at haa yotti Dan

² e geɗal Neftali fuu e geɗe Efrayim e Manassa e geɗal Yahuuda fuu haa yotti mbeela hiirnaaŋgewa

³ e Lesdi Fombina e lesdi leesndi e Yeriko, berniwol dibinooje haa yotti Co'ar.

⁴ Nden Jawmiraawo wi'i Muusa: “Kanjum woni lesdi ndi kunaniimi Ibrahiima e Isiyaaku e Yaakubu, mi hokkan ndi danygol maɓɓe. Mi holli ma ndi, ammaa a heɓataa nastugo ndi.”

⁵ Muusa, jaggiiɗo Jawmiraawo maayi ton nder lesdi Mo'ab, bana Jawmiraawo wi'no mo.

⁶ Jawmiraawo uwi mo nder waadiwol ton nder lesdi Mo'ab, haa nokkuure tiitotirnde bee Bayti-Pe'or. Haa wargo hannde walaa mo anndi yenaande maako.

⁷ Muusa waɗi duuɓi teemerre e noogas (120), o maayi diga o cemmbiɗɗo, gite maako tampaay.

⁸ Isra'iila'en mboyi mo nyalɗe cappanɗe tati nder laɗɗe Mo'ab, nden saa'i woyugo mo timmi.

⁹ Ammaa Yosuwa ɓii Nuuna o keewɗo ruuhu faamu, ngam Muusa yowino juuɗe mum dow maako. Isra'iila'en nanani Yosuwa, ɓe tokki umrooje ɗe Jawmiraawo umruno ɓe bee hunnduko Muusa.

¹⁰ Ɓaawoɗon walaa annabiijo bana Muusa meeti laataago nder Isra'iila. Kaŋko, Jawmiraawo wolidi bee maako gite bee gite.

¹¹ Walaa annabiijo goɗɗo meeɗi waɗugo alaamaaji e kaayeefiiji irin ɗi Muusa waɗi, ɗi Jawmiraawo neli mo waɗugo nder lesdi Misra, haa Firawna e saraaki'en muuɗum e lesdi muuɗum fuu.

¹² Walaa annabiijo goɗɗo heɓi baawɗe waɗugo kuuje mawɗe kulniiɗe ɗe Muusa waɗi yeeso Isra'iila fuu.