Tooktaaki Tawreeta 32 - Fulfulde Bible

¹ “An, asama nan haa mi wolwa, lesdi heɗita ko mbi'anmi!

² Ekkitinol am toɓa bana iyeende, bolle am laato bana saawawre dow lesdi. Ɗe toɓa bana iyeende dow huɗo, bana waabiliire dow haakooji kecci.

³ Ngam mi ɗon wooyna innde Jawmiraawo. Maŋgte Allah meeɗen!

⁴ O tapaare hisrude. Kuugal maako, ngal timmuŋgal. Laabi maako fuu, ɗi darnuɗi. O Allah koolniiɗo, walaa faasikaare haa maako, o adiliijo darnuɗo!

⁵ Ammaa onon on ummaatoore faasikiire e hallunde, on mbonnake! On cemtini ko'e mon, on laataaki ɓikkoy maako fahin!

⁶ Bana non ngettirton Allah na? Onon faataaɓe ɓe ngalaa hakkiilo! Naa kaŋko woni Baabiraawo mooɗon, tagɗo on, tabitinɗo on haa on laato ummaatoore?

⁷ Ciftore zamanuuji ɓooymaaji, kakkilane gide caaliiɗe. Ƴame baabiraaɓe mon e ndotti'en ko laati naane, ɓe anndina on ɗum.

⁸ Nde Allah Ɓaŋiiɗo senndani ummaatooje mare, nde o senndi ɓiɓɓe Aadama, o darni keeri ummaatooje fodde limgal ɓiɓɓe Isra'iila.

⁹ Ngam Jawmiraawo suɓi Isra'iila laatini ɗum ummaatoore muuɗum e maral muuɗum.

¹⁰ O tawi Isra'iila nder ladde, dow harde caka caafaali kaaŋaaɗi. O hakkilani mo, o elti mo, o ayni mo bana ɓiŋngel yiitere maako.

¹¹ Bana dutal ekkitinirta ɓikkoy mum fiirugo, ngal weela dow maakoy, ngal efta koy dow bileeji maagal.

¹² Jawmiraawo feere mum ɗowi yimɓe mum, walaa ɗowanteeɗo goɗɗo wondi bee maɓɓe.

¹³ O wa'ini ɓe dow lesdi towndiije, ɓe nyaami ko fuɗi haa ladde. O nyaamni ɓe njumri caka tapaaje e jaytunje maɓɓe mawni caka kaa'e caatuɗe.

¹⁴ Ɓe nyaami kettuŋgol dabbaaji maɓɓe mawɗi e ɓe njari kosam dammooji maɓɓe. Ɓe ɗon nyaama ɓellere njawkoy e kusel jawɗi maɓɓe payɗi. Ɓe ɗon nyaama kusel payŋgel. Ɓe ɗon nyaama alkamaari ɓurɗi wooɗugo, ɓe ɗon njara inaboojam inabooje maɓɓe.

¹⁵ Yimɓe maako laati riskuɓe, tuurtooɓe, ɓe fayɓe, marɓe ɓellere. Ɓe acci Allah tagɗo ɓe, ɓe njawi tapaare hisnoore ɓe.

¹⁶ Ɓe ummini kaajal Jawmiraawo bee sujidango ɗowanteeɓe jananɓe, ɓe mettini mo bee kuuɗe maɓɓe nyidduɗe.

¹⁷ Ɓe kirsi ngam ginnaaji ɗi laataaki Allah, ngam ɗowanteeɓe ɓe meeɗaay anndeego, ɗum ɗowanteeɓe hesɓe, waŋguɓe jonta. Kaakiraaɓe mooɗon anndaa ɓe.

¹⁸ Isra'iila'en, on ngejjiti Allah tapaare mooɗon, tagɗo on, dokkuɗo on ngeendam!

¹⁹ Jawmiraawo laari o jawaaɗo ngam ɓikkoy maako ngorkoy e ndehoy tikkini mo.

²⁰ O wi'i: Mi wiirnan ɓe gite am, haa mi laara ko heɓata ɓe. Ngam ɓe laati ummaatoore faasikiire, ɓiɓɓe ɓe ngalaa hoolaare.

²¹ Ɓe ummini kaajal am bee ɗowanteeɓe ɓe laataaki Allah, ɓe mettini yam bee kuuje meereeje. Mi umminan kaajal maɓɓe bee yimɓe ɓe laataaki ummaatoore gooŋgaare. Mi mettinan ɓe bee ummaatoore faataande.

²² Tikkere am wulan bana yiite, nyaaman koo ɗume fuu haa lesdi. Nde wulan haa yotto joonde maayɓe, nde nyaaman koo caɓɓaaje kooseeje boo.

²³ Mi yowanan ɓe boneeji ɗuuɗɗi, mi fiɗan kuri am fuu dow maɓɓe.

²⁴ Ɓe tampan daliila weelo e jonte, ɓe njinnan daliila nyawuji kalluɗi caatuɗi. Mi neldan ɓe kuuje ladde ŋatooje, non boo boɗɗe mbarooje.

²⁵ Kaafahi do'an ɓiɓɓe maɓɓe dow laabi, kultoreeŋgol ukkanto ɓe nder cuuɗi, suka'en e faanyɓe e musinankoy e ndotti'en fuu kalkan.

²⁶ Mi anniyino nattingo ɓe fuu, ngam taa goɗɗo meeta siftorgo inɗe maɓɓe.

²⁷ Ammaa mi yiɗaa jancoore konne'en maɓɓe, wanyɓe ɓe numa, mbi'a: Juuɗe amin njaali ɓe. Ɓe mbi'ataa: Jawmiraawo waɗaay ɗum fuu.

²⁸ Ngam Isra'iila'en laatake ummaatoore nde walaa faamu, ɓe ngalaa hakkiilo sam.

²⁹ To ɓe ngoodino hakkiilo, ɓe paamanno kuuje ɗe'e, ɓe keɓtanno ko tammi warango ɓe.

³⁰ Bana noy konneejo gooto riiwrata ujineere, ɗiɗo boo ndiiwan ujine sappo, to naa Allah tapaare maɓɓe soorri ɓe, Jawmiraawo maɓɓe acci ɓe?

³¹ Ammaa konne'en anndi ɗowanteeɓe muuɗum'en ngalaa baawɗe ɗe Allah tapaare meeɗen.

³² Ngam kamɓe ɓe nanndi bee yimɓe Sodoma e Gomorra, ɓe nanndi bee inabooje bonniiɗe, dimooje ɓenndalooje keewɗe tooke e kaaɗeeŋga,

³³ inaboojam maɓɓe haaɗi rok, bana tooke poosokje.

³⁴ Jawmiraawo wi'i: Ndaa ko mi taaski nder sirri ko mi waɗata ɓe,

³⁵ min waatoto, min warjoto ɓe, haa saa'iire nde kosɗe maɓɓe ndimmboto. Nyalaade nattere maɓɓe ɓadake, kiita maɓɓe ɗon ɓadito bee jaawal!

³⁶ Ngam Jawmiraawo hiitanto ummaatoore mum, o hinnoto jaggiiɓe maako. Ngam o yi'i ɓe ɗon tampa, maccuɓe e rimɓe maɓɓe fuu njinni.

³⁷ Nden o ƴaman yimɓe maako: Toy ɗowanteeɓe mooɗon ɓe kooliiɗon go? Toy tapaare mooɗon hisrude nde'e?

³⁸ On nyaamni ɓe ɓellere kirsaaɗi mon, on njarni ɓe inaboojam mon. Sey ɓe ngara, ɓe mballa on jonta, sey ɓe ngara ɓe kisna on, ɓe paddo on!

³⁹ Ndaare jonta min feere am woni Allah, walaa ɗowanteeɗo goɗɗo haa kommbi am! Min mbarata, min yeeɗinta boo, min naawnata, min hurgata boo. Walaa kisnanɗo ko juŋngo am jogoto!

⁴⁰ Mi ɗon ɓaŋgta juŋngo am gal asama, mi ɗon huno: Fakat bana mi geeto,

⁴¹ mi welnan kaafahi am ɗelkoohi, juŋngo am waɗa kiita. Mi waato konne'en am, mi hiitoto wanyɓe yam fuu!

⁴² Kuri am njaran ƴiiƴam maɓɓe, kaafahi am nyaaman kusel maɓɓe. Ki heewan ƴiiƴam mbaraaɓe e naŋngaaɓe, ki ta'an ko'e ardiiɓe konne'en.

⁴³ Asama seyoda bee ummaatoore Jawmiraawo, ɗowanteeɓe fuu cujida yeeso Jawmiraawo. Ngam o waato konne'en maako daliila ƴiiƴam jaggiiɓe maako ndufaaɗam. Ammaa o ittan aybe nder lesdi ummaatoore maako.”

⁴⁴ Muusa e Yosuwa ɓii Nuuna ngimi yimre nde'e, Isra'iila'en fuu ɗon keɗito.

Umrooje Muusa ragareeje

⁴⁵ Nde Muusa timmini wolwango Isra'iila'en bolle ɗe'e,

⁴⁶ o wi'i ɓe: “Umrooje ɗe'e ɗe umrumi on hannde fuu, njaɓe ɗe haa ɓerɗe mon, ɗe laato seedamku dow mooɗon. Umre ɗe ɓikkoy mon, ngam koy kakkilana bolle tawreeta ka'a fuu, koy ɗowtano ɗe.

⁴⁷ Ngam tawreeta ka'a laatanaaki on bolle meere, fakat ngeendam mon ɗon nder maaka. Ɗowtane ka ngam haa balɗe mon njuuta nder lesdi gaɗa Urdun ndi nastoton haa maron ɗum.”

⁴⁸ Nyalaade man nden Jawmiraawo wi'i Muusa:

⁴⁹ “Yah haa kooseeje Abariima haa ɗo nder lesdi Mo'ab, haa nokkuure tiitotirnde bee berniwol Yeriko. Wa'a hooseere Nebo, a laara lesdi Kanaana ndi marnanmi Isra'iila'en.

⁵⁰ A maayan dow hooseere nde a wa'ata, a maayan bana kaakiraaɓe ma, bana deerɗa Haruna maayri dow hooseere Hor, o maayi bana yimɓe ummaatoore mum.

⁵¹ Ngam onon ɗiɗo ɓe'e on ngewi umroore am yeeso Isra'iila'en, haa ndiyamji Meriba baŋnge Kaades nder ladde Ciin, on kollaay senaare am caka Isra'iila'en.

⁵² Ngam man a eewan lesdi ndi ndokkanmi Isra'iila'en diga daayiiɗum, ammaa an kam a nastataa ndi.”