Tooktaaki Tawreeta 24 - Fulfulde Bible

Umroore dow ceergal

¹ To goɗɗo te'i debbo, nden o wanyi mo ngam o tawi goɗɗum cemtuɗum haa maako. Nden kam o winndana mo ɗereewol ceergal, o hokka mo ngol, o wurtina mo saare maako.

² Debbo oo wurto saare maako, o dilla gorko feere te'a mo.

³ Ammaa kaŋko boo, to o wanyi mo, o winndana mo ɗereewol ceergal, o hokka mo ngol, o wurtina mo saare maako. Malla to gorko ɗiɗaɓo oo maayi,

⁴ nden kam, goriiko arano ceerunooɗo mo waawataa wartirgo mo haa o laato debbo maako ɓaawo o laari mo bana coɓɗo, ɗum nyidduɗum haa yeeso Jawmiraawo. Taa on mbaɗa hakke dow lesdi ndi Jawmiraawo, Allah mooɗon hokkata on ngam maron.

Umrooje ngam teeruɓe

⁵ To goɗɗo te'i debbo, duuraay tawon, taa o nasta jama'aare konu, taa on njowana mo kuugal koo ngale. Acce mo o jooɗo bee debbo maako haa saare hitaande woore, o seyna debbo maako mo o ɓaŋgi.

⁶ Taa hoocu namrude koo ɓiŋgerre ngam jeŋngina to a hokki goɗɗo nyamaande, ngam ɗum yoŋki maako koocuɗa.

⁷ To a tawi goɗɗo wujji gooto caka banndiraaɓe mum Isra'iila'en, macciɗini ɗum malla soorri ɗum, nden kam o mbareteeɗo. Bana non ittirton halleende nde'e caka mooɗon.

⁸ Kakkilane nyawu saɗawre, on mbaɗa ko liman'en Lewi'en ekkitinta on bana umrumi ɓe.

⁹ Ciftore ko Jawmiraawo, Allah mooɗon waɗi Mariyama dow laawol, yaake on ngurti lesdi Misra.

¹⁰ To a hokki keeddiɗɗa nyamaande, taa nastu suudu maako ngam hoocugo limce maako jeŋngina.

¹¹ Dara haa yaasi, mo a hokki nyamaande go, waddane ɗum haa yaasi.

¹² To o talakaajo, taa jogita jeŋngina maako haa jaŋngo.

¹³ Sey a hokkita mo ɗum saa'i naaŋge ɗon muta, haa o waalo, o suddoro. Nden kam o barkiɗinte, a laatoto adiliijo yeeso Jawmiraawo, Allah maaɗa.

¹⁴ Taa toonya talakaajo kuuwanɗo ngam ngeenaari, koo o banndiraawo ma malla o jananno nder lesdi mon, jooɗiiɗo nder gootol berniwol mon.

¹⁵ Nyalaade fuu hokku mo ngeenaari maako hiddeko naaŋge muta. Ngam o woodi haaje ngeenaari man masin. To a yoɓaay mo, o wulloto ma haa Jawmiraawo, an boo ɗum laatanto ma hakke.

¹⁶ Taa baabiraaɓe mbare daliila hakkeeji ɓikkoy muuɗum'en. Taa ɓikkoy boo mbare daliila hakkeeji baabiraaɓe muuɗum'en. Ammaa koo moy mbare ngam hakkeeji mum.

¹⁷ Taa cottine gooŋga jananno malla atiimeejo yeeso kiita. Taa kooce limce debbo jurumɗo jeŋngina.

¹⁸ Sey on ciftora no onon boo on laatino maccuɓe haa Misra. Ammaa Jawmiraawo, Allah mooɗon rimɗini on diga ton. Ngam maajum umrumi on huuwugo fodde wolde nde'e.

¹⁹ To on ɗon coda ngesa mon, to on ngejjiti cammeeje goɗɗe haa ngesa, taa lorte ngam suɓtugo ɗe. Accane ɗe hoɗɓe jananɓe e atiime'en e rewɓe yurumɓe. Nden kam Jawmiraawo, Allah mooɗon barkiɗinan kuuɗe mon fuu.

²⁰ To on ɗon teɓa jaytunje mon, taa lorte ngam suɓtugo caamɗe ɓaawo mooɗon. Accane ɗe hoɗɓe jananɓe e atiime'en e rewɓe yurumɓe.

²¹ To on ɗon teɓa inabooje mon boo, taa lorte suɓtugo luttuɗe. Accane ɗe hoɗɓe jananɓe e atiime'en e rewɓe yurumɓe.

²² Taa ngejjite, onon bee ko'e mon naane on laatino maccuɓe haa Misra. Ngam maajum umrumi on huuwugo fodde wolde nde'e.