Tooktaaki Tawreeta 14 - Fulfulde Bible

Bojji ngam maayɗo

¹ “Onon on ɓikkoy Jawmiraawo, Allah mooɗon. To on ɗon mboya maayɗo, taa ƴare ɓalli mon, taa laɓe gaasa tiiɗe mooɗon boo.

² Ngam onon, on ummaatoore senaande ngam Jawmiraawo, Allah mooɗon. Jawmiraawo suɓi on nder ummaatooje duniyaaru fuu ngam on laato ummaatoore maako yiɗaande.”

Dabbaaji dagiiɗi e dabbaaji karminaaɗi

³ “Taa nyaame ko harmi fuu.

⁴ Ndaa dabbaaji ɗi nyaamoton: Na'i, baali, be'i,

⁵ amfurde, lelji, baali ladde, be'i kooseeje, bani, jabaaje e kooba,

⁶ dabbaaji marɗi koloŋgi ceekaaɗi, lornanɗi waacere boo.

⁷ Ammaa taa nyaame dabbaaji marɗi koloŋgi ceekaaɗi tan malla lornanɗi waacere tan. Bana geelooɗi e boji e jama-gudde. Ɗi karmi ngam mooɗon, ngam ɗi lornan waacere, ammaa ɗi ngalaa koloŋgi ceekaaɗi.

⁸ Taa nyaame gaduuji. Ɗi karmi ngam mooɗon, ngam ɗi mari koloŋgi ceekaaɗi, ammaa ɗi lornataa waacere. Taa nyaame dabbaaji ɗi'i, taa meeme nyawmanɗe maaji boo.

⁹ Ndaa ko nyaamoton caka kuuje gonɗe nder ndiyam fuu: Ko mari doŋgol e ko mari koɓe fuu.

¹⁰ Ammaa kuuje ndiyam goɗɗe fuu ɗe ngalaa doŋgol malla koɓe, ɗe nyaamataake. Ɗe karmi ngam mooɗon.

¹¹ On nyaama colli dagiiɗi fuu.

¹² Ammaa ndaa colli ɗi kaanaay on nyaama:

¹³ Dutal e ko nanndi bee maagal fuu,

¹⁴ ciilal, maafiire, jigaawal maŋngal e pamaral,

¹⁵ leekuwal e ko nanndi bee maagal fuu,

¹⁶ ndawu, sonndu mbeela raneeru, ngaasiyoowal,

¹⁷ duujiire, cooɗuwal, lamnjatal, naŋngowal liɗɗi,

¹⁸ njoofe-be'iiru non boo wilwildu.

¹⁹ Taa nyaame koowoowe marɗe bileeji koo koye, ngam ɗe karminaaɗe.

²⁰ Ammaa on nyaama colli dagiiɗi fuu.

²¹ Taa nyaame caaɗŋgu. Ndokke ɗum jananɓe wonduɓe bee mooɗon, ɓe nyaama ɗum malla coorre ɗum jananɓe feere. Ammaa onon on ummaatoore senaande ngam Jawmiraawo, Allah mooɗon. Taa ndefe jawgel nder kosam daada maagel.”

Umroore dow zakka

²² Itte zakka, yeɓre woore nder sappo haa ƴaamle gese mon hitaande fuu.

²³ Nden njehe haa nokkuure nde Jawmiraawo, Allah mooɗon suɓata ngam innde muuɗum wona ton. Nyaame yeeso Jawmiraawo ton zakka alkamaari mon e inaboojam mon e nebbam mon e afi dabbaaji mon mawɗi e afi dammooji mooɗon. Bana nii on ekkitorto hulugo Jawmiraawo, Allah mon foroy.

²⁴ To on mbaawaay yahrugo zakka kuuje ɗe Jawmiraawo barkiɗini on bee muuɗum'en, ngam daayaare laawol bee nokkuure nde Allah suɓi ngam innde muuɗum wona ton,

²⁵ nden kam coorre kuuje man, koo'e ceede coggu man, njahde bee man haa suudu Jawmiraawo mooɗon.

²⁶ Coode bee ceede man ko ɓerɗe mon ngiɗi fuu, dabbaaji mawɗi e dammooji e inaboojam e nguykinoojam. Nden nyaame ton, ceye yeeso Jawmiraawo, Allah mooɗon, onon e yimɓe ci'e mon.

²⁷ Ammaa taa ɗawe Lewi'en wonɓe nder berniiji mon, ngam ɓe maraay lesdi caka mooɗon.

²⁸ Haa timmoode hitaande tataɓre, ngadde zakka kuuje fuu ɗe keɓoton hitaande man, mooɓte ɗum nder berniiji mon.

²⁹ Lewi'en ngaran kooca geɗal muuɗum'en, ngam ɓe marataa gese caka mooɗon. Luttuɗum boo ɗum laatano hoɗɓe e atiime'en e rewɓe yurumɓe wonɓe nder berniiji mon. Ɓe fuu ɓe keɓa, ɓe nyaama, ɓe kaara, ngam haa Jawmiraawo, Allah mooɗon barkiɗina kuugal juuɗe mooɗon fuu.