Tooktaaki Tawreeta 12 - Fulfulde Bible

Nokkuure woore ngam cujidanki Allah

¹ Ndaa ɗi'i ngoni farillaaji e kiitaaji fuu ɗi on kakkilanta, ɗi on ɗowtanto fodde balɗe mooɗon nder lesdi ndi Jawmiraawo, Allah kaakiraaɓe mooɗon hokkata on fuu, ngam maron ɗum.

² “Nder lesdi man, yimɓe ummaatooje ɗe ndiiwoton, ɗon cujidana ɗowanteeɓe muuɗum'en dow kooseeje towɗe, les leɗɗe kecce boo. Sey on kalka nokkuuje ɗe'e fuu!

³ Ngibbine kirsirɗe maɓɓe, puse kaa'e ciftinorɗe maɓɓe. Ngule daŋraŋge maɓɓe cenaaɗe, pe'e labbi maɓɓe, nattine inɗe maaji e nokkuuje man.

⁴ Taa kuuwane Jawmiraawo, Allah mooɗon bana ummaatooje ɗe'e kuuwranta labbi maɓɓe.

⁵ Jawmiraawo suɓan nokkuure woore caka le'i mon fuu ngam o tabitina innde maako ton. Haa nokkuure man tan njahoton sujidango mo.

⁶ Haa ton on lii'anto mo guleteeɗi mon e kirseteeɗi mon e zakkaaji mon e dokke mon ittaaɗe e dokke ɗe on togani Jawmiraawo e dokke mon caahiiɗe e afi dabbaaji mon mawɗi e afi dammooji mooɗon.

⁷ Sey on nyaama ton yeeso Jawmiraawo, Allah mooɗon, onon e yimɓe ci'e mooɗon, on ceyora nafuuda kuuɗe mon, ngam Jawmiraawo barkiɗini on.

⁸ Yeeso ɗo, on mbaɗataa bana mbaɗeten jonta, koo moy ɗon waɗa ko fottani ɗum.

⁹ Ngam on njottaaki haa pellel siwtaare tawon, on maraay lesdi ndi Jawmiraawo, Allah mooɗon hokkata on tawon.

¹⁰ Ammaa to on eerake maayo Urdun, on njooɗoto haa lesdi ndi Jawmiraawo marnata on, o hokkan on siwtaare, konne'en taariiɓe on fuu ɓillataa on fahin, on njooɗoto nder jam.

¹¹ Jawmiraawo, Allah mooɗon suɓan nokkuure joonde ngam innde mum wona ton. Haa ton on lii'anto mo ko umrumi on fuu: Guleteeɗi mon e kirseteeɗi mon e zakkaaji mooɗon e dokke mon ittaaɗe e dokke cuɓaaɗe ɗe on togani Jawmiraawo fuu.

¹² Ceye ton yeeso Jawmiraawo, Allah mooɗon, onon e ɓikkoy mon worɓe e rewɓe e maccuɓe mon e horɓe mon e Lewi'en jooɗiiɓe nder gure mon, ngam Lewi'en marataa lesdi caka mooɗon.

¹³ Ndeente, taa on lii'o kirseteeɗi mon haa on ngiɗi fuu.

¹⁴ Lii'e ɗi haa nokkuure nde Jawmiraawo suɓata nder berniwol le'i mon gootol. Haa ton on lii'anto mo guleteeɗi mon, on mbaɗan ko umrumi on fuu.

¹⁵ Ammaa on nduŋanaama hirsugo e nyaamugo dabbaaji mon nder gure mooɗon fuu, bana ɓerɗe mon ngiɗi, deydey ko Jawmiraawo, Allah mooɗon hokki on. Koo moy mooɗon, cenaaɗo e mo senaaka, nyaama kusel maaji, bana nyaamroton lelji e jabaaje.

¹⁶ Ammaa taa on nyaama ƴiiƴam maaji. Sey on ndufa ɗam haa lesdi bana ndiyam.

¹⁷ Haa nokkuuje joole nder berniiji mooɗon, taa on nyaama zakka alkamaari mon e inaboojam mon e nebbam mon e afi dabbaaji mon mawɗi e dammooji mon e dokke mon ɗe on togani Jawmiraawo e dokke caahiiɗe ngam seyo mooɗon e dokke ittaaɗe.

¹⁸ Kuuje ɗe'e fuu, sey on nyaama ɗe yeeso Jawmiraawo haa nokkuure nde o suɓata ɗum. Ton nyaamoton ɗe, onon e ɓikkoy mon e maccuɓe mon e horɓe mon e Lewi'en jooɗiiɓe nder gure mon. Ceyore nafuuda kuuɗe mon yeeso Jawmiraawo, Allah mon.

¹⁹ Ndeente, taa acce humtango Lewi'en haaje saa'i on nguurata nder lesdi mon fuu.

²⁰ To Jawmiraawo, Allah mooɗon yaajinani on lesdi bana o wolwani on, to suuno kusel naŋngi on, on nyaama bana on ngiɗi fuu.

²¹ To nokkuure nde Jawmiraawo Allah suɓi ngam tabitingo innde muuɗum ton daayi bee mooɗon, nden kam on kirsan dabbaaji mon mawɗi e dammooji mon ɗi Jawmiraawo hokki on, on nyaama haa ci'e nder berniiji mooɗon bana ngiɗɗon fuu, bana umrumi on.

²² Koo moy mooɗon, cenaaɗo e mo senaaka, nyaama kusel man bana nyaamroton lelji e jabaaje.

²³ Ammaa tabite, taa on nyaama ƴiiƴam, ngam ƴiiƴam woni yoŋki, taa on nyaama yoŋki hawtaade bee kusel.

²⁴ Taa nyaame ƴiiƴam, ndufe ɗam haa lesdi bana ndiyam.

²⁵ To on nyaamaay ɗam, nden kam onon e ɓikkoy mon on keɓan hayru, ngam on mbaɗi ko fottani Jawmiraawo.

²⁶ Ammaa dokke mon cenaaɗe e dokke ɗe on togani Jawmiraawo, njahre ɗe haa nokkuure nde Jawmiraawo suɓata.

²⁷ Lii'e ton guleteeɗi mon dow hirsirde Jawmiraawo, Allah mooɗon, ndufe ƴiiƴam kirseteeɗi mon goɗɗi haa hirsirde Jawmiraawo Allah mon, nden nyaame kusel maaji kam.

²⁸ Kakkilane bolle ɗe umrumi on fuu. Ɗowtane ɗe. Nden kam onon e ɓikkoy mon on keɓan hayru haa foroy, ngam on mbaɗan ko fotti, ko wooɗi yeeso Jawmiraawo, Allah mooɗon.”

Kaɗki sujidango labbi

²⁹ “To on ɗon nasta lesdi, Jawmiraawo, Allah mooɗon nattinan yimɓe ummaatooje wonɓe ton. On ndiiwan ɓe, on njooɗoto nder lesdi maɓɓe.

³⁰ Ɓaawo maajum ndeente, taa on tokko al'aadaaji labbi maɓɓe, ɗum laatanto on tuuforgol. Taa ƴame haala ɗowanteeɓe maɓɓe malla no ɓe teddinirta ɓe, haa on teddina ɓe kal-kal.

³¹ Cujidane Jawmiraawo, Allah mooɗon, ammaa naa bana kamɓe ɓe cujidirani labbi maɓɓe. Ko ɓe kuuwani labbi maɓɓe, ɗum nyidduɗum haa Jawmiraawo, o ɗon wanya ɗum. Ɓe lii'ani ɗi koo ɓikkoy maɓɓe worɓe e rewɓe boo nguleteekoy dow kirsirɗe maɓɓe.”