Titus 3 - Fulfulde Bible

Joonde Masiihiŋkeejo

¹ Siftinor nuɗɗinɓe ɓe leestana ardiiɓe e marɓe baawɗe, ɓe nanana ɓe, ɓe taaskano kuugal booɗŋgal koo ngale.

² Taa ɓe mbolwa kalluka dow koo moy, taa ɓe njokkira boo, ammaa ɓe mboonana yimɓe, foroy ɓe laato yaŋkiniiɓe heedi koo moy fuu.

³ Ngam ɓooyma enen boo en laatino faataaɓe, tuurtooɓe, majjuɓe. En laatino maccuɓe suunooji meeɗen e maccuɓe ko seynatano ɓerɗe meeɗen fuu. En ɗonno njooɗi bee halleende e kaajal, woɗɓe nganyino en, enen boo en nganynganytirino.

⁴ Ammaa nde Allah, Kisnoowo men waŋginani en mbooɗeeŋga mum e yiide mum,

⁵ o hisni en, naa ngam en kuuwi kuuɗe adiliije, ammaa ngam hinnuye maako, saa'i en keɓi danyeeki kesi bee baptisma, Ruuhu Ceniiɗo boo hesɗitini en.

⁶ Ngam Allah waanji Ruuhu muuɗum dow meeɗen barka Yeesu Almasiihu, Kisnoowo en,

⁷ ngam haa laatooɗen ronooɓe ngeendam nduumiiɗam ɗam tammuɗen, nde nii Almasiihu adilini en bee mo'ere mum.

⁸ Kanjum woni wolde hoolniinde. Mi yiɗi a tabitina kuuje ɗe'e, ngam haa nuɗɗinɓe Allah tiino huuwugo kuuɗe booɗɗe. Kanjum ɗum wooɗi, ɗum nafan yimɓe.

⁹ Ammaa daaya gaabi paataaɗi e haala defte asli e jokkirli e kujjootiral dow tawreeta, ngam ɗum nafataa, ɗum meereejum meere.

¹⁰ Goɗɗo biɗu'aakuujo, fel mo nde woore, nde ɗiɗi boo. To o nanaay ma, daaya mo.

¹¹ A anndi irin goɗɗo oo seli laawol darnuŋgol, o hakkeejo. Bana nii o hiiti hoore maako.

Wasuyeeji ragareeji

¹² To mi neli Artemas malla Tikikus haa maaɗa, haɓdu wargo haa am haa Nikopolis, ngam mi waɗi anniya saalitingo duumol ton.

¹³ Wallu Zenas, alkaaliijo e Apollos ngam jahaaŋgal maɓɓe, haɓdu humtango ɓe haaje maɓɓe fuu.

¹⁴ Yimɓe meeɗen, kamɓe boo sey ɓe ekkito tiinaago huuwugo kuuɗe booɗɗe, ɓe mballa ɓe to haajeeji juhanake ɓe, ngam haa ngeendam maɓɓe waŋgina nafuuda.

¹⁵ Wonduɓe bee am fuu koofni ma. Hoofnu nuɗɗinɓe yiɗɓe min. Mo'ere Allah wonda bee mooɗon fuu.