Nehemiya 8 - Fulfulde Bible

Esira jaŋngi tawreeta yeeso yimɓe fuu

¹ Ummaatoore fuu mooɓi bana goɗɗo gooto haa daldal yeeso Dammugal Ndiyam. Ɓe mbi'i moodibbo Esira o wadda deftere tawreeta Muusa, ka Jawmiraawo umruno Isra'iila.

² Nyannde go'oore nder lewru joweeɗiɗaɓru, Esira, limanjo waddi tawreeta yeeso mooɓtorde, worɓe e rewɓe e derke'en heewtuɓe faamugo fuu.

³ O jaŋngi deftere man haa babal yeeso Dammugal Ndiyam, diga subaha haa caka naaŋge. Ummaatoore fuu, worɓe e rewɓe e derke'en heewtuɓe faamugo ɗon keɗito jaŋgɗe deftere tawreeta.

⁴ Moodibbo Esira dari dow ba'eteeɗum leggal ko ɓe mbaɗi ngam daliila man. Mattitiya e Sema e Anaya e Uriya e Hilkiyya e Ma'aseya ndari haa nyaamo maako. Pedaya e Miisayel e Malkiya e Hasum e Hasbaddana e Zekariya e Mesullam boo ndari haa nano maako.

⁵ Esira maɓɓiti deftere, ummaatoore fuu yi'i ɗum, ngam o ɗonno towti dow yimɓe fuu. Nde o maɓɓiti nde, ɓe ummi.

⁶ Esira maŋgti Jawmiraawo, Allah Mawɗo. Yimɓe fuu ɓaŋgti juuɗe muuɗum'en, njaabi: “Aamiina, aamiina!” Nden ɓe turi, ɓe cujidani Jawmiraawo, geese maɓɓe meemi lesdi.

⁷ Yeesu'a e Baani e Serebiya e Yamin e Akkubu e Sabbetay e Hodiyya e Ma'aseya e Kelita e Azariya e Yozabat e Hanan e Pelaya, Lewi'en, paamtini tawreeta haa ummaatoore dariinde haa nokkuure maare.

⁸ Ɓe njaŋngi nder deftere tawreeta Allah bee laaɓɗum, ɓe passitiri nde haa yimɓe paama ko jaŋnga.

⁹ Nehemiya, ngomna e moodibbo Esira, limanjo e Lewi'en faamtinɓe ummaatoore nde mbi'i ɓe fuu: “Hannde woni nyalaade senaande ngam Allah Jawmiraawo mooɗon. Taa cune, taa mboye.” Ngam ummaatoore fuu ɗon woya, saa'i ɓe ɗon nana bolle tawreeta.

¹⁰ Esira wi'i ɓe: “Njehe jonta, nyaame payɗum, njare mbelɗam, nelde boo geɗe nyaamdu haa mo taaskitinaay nyaamdu. Ngam hannde woni nyalaade senaande ngam Jawmiraawo men. Taa cune, ngam seyo iwŋgo diga Jawmiraawo woni semmbe mon.”

¹¹ Lewi'en boo nde'itini yimɓe, mbi'i ɓe: “Nde'ite, ngam nyalaade nde'e nde senaande, taa cune.”

¹² Nden yimɓe fuu ndilli nyaamoygo e yaroygo, ɓe neldi geɗe nyaamdu boo. Ɓe ceyi bee seyo maŋngo ngam ɓe paami bolle ɗe ɓe anndini ɓe.

Juulde bukkaaji

¹³ Jaŋngo man baaba-ci'e'en nder ummaatoore fuu e liman'en e Lewi'en mooɓti haa moodibbo Esira ngam ɓe keɗito bolle tawreeta.

¹⁴ Ɓe tawi nder maaka ko Jawmiraawo umri bee hunnduko Muusa: “Saa'i juulde nder lewru joweeɗiɗaɓru, Isra'iila'en fuu njooɗo nder bukkaaji.”

¹⁵ Nde ɓe nani ɗum, ɓe ngooyni nder Urusaliima e gure maɓɓe fuu: “Njehe kooseeje, ngadde lice diga jaytunje gese e jaytunje ladde e asuraaje e dibinooje e leɗɗe cukkuɗe, mbaare bukkaaji, bana ko winnda.”

¹⁶ Ummaatoore wurti, waddi ɗe. Nden ɓe mbaɗi bukkaaji, koo moy dow soorowol mum, koo haa daldal saare mum. Non boo haa daldal haykaliiru Allah, haa babal yeeso Dammugal Ndiyam e babal yeeso Dammugal Efrayim.

¹⁷ Yimɓe jama'aare wartuɓe diga daheeki fuu mbaɗi bukkaaji, njooɗi nder maaji. Diga wakkati Yosuwa ɓii Nuuna haa wargo nyalaade man, Isra'iila'en meetaay waɗugo irin ɗu'um. Ɓe ceyi bee seyo maŋngo.

¹⁸ Kala nyalaade fuu ɓe njaŋngani ɓe deftere tawreeta Allah, diga nyalaade aranndeere haa ragareere. Ɓe mbaɗi juulde man nyalɗe joweeɗiɗi. Nyalaade joweetataɓre boo ɓe mbaɗi mooɓtorde senaande, bana ko umra.