Nahum 3 - Fulfulde Bible

Jawmiraawo halkan Niniwe

¹ Bone laatanto berniwol dufanŋgol ƴiiƴam, keewŋgol fewre e toonyaare, tum jaɓtol ɗon!

² Hoolo ɓoccol e hoolo kosɗe mootaaji ɗon ton, non boo caamŋgal pucci e mootaaji tultanɗi,

³ samnooɓe ummake e kaafaaje jaynanɗe e labbe ɗelkanɗe, naawnaaɓe ɗuuɗɓe, maayɓe ɗuuɗɓe ɓe ngalaa limgal, koo toy goɗɗo fergoto maayɓe.

⁴ Ɗum waɗi daliila kuuɗe daakaareeku ɗuuɗɗe ɗe daakaareejo oo huuwi. O ɗon esta bee ŋarol maako, o hiilaajo mawɗo. Bee daakaareeku maako e hiilaaji maako, o macciɗini ummaatooje e jama'aaje.

⁵ Jawmiraawo honooɓe asama wi'i: “Mi ɗon monni ma. Mi ɓaŋgtan gawarle limce ma dow yeeso ma, mi hollan ummaatooje temmbuki ma e mi hollan laamuuji fuu ko semtinte.

⁶ Mi rufan mbuuwri dow maaɗa, mi bustinte, mi laatinte huunde laareteende meere.

⁷ Nden koo moy yi'i ma doggan daayiiɗum bee ma, o wi'an: Berniwol Niniwe halki! Moy yurminta ngol? Toy keɓanmi de'itinooɓe ngol?”

⁸ An Niniwe, a tammi a ɓuri No-Amon wooɗugo na? Berniwol ngo'ol jooɗino caka ilduɗe, ndiyamji taarino ngol, maayo maŋngo laatino cukkol maagol, ndiyamji ayni ngol.

⁹ Etiyopiya e Misra ngonno semmbe maagol ɗe ngalaa keerol. Yimɓe Put e Libiya ngonno wallooɓe ngol.

¹⁰ Ammaa jooɗiiɓe maagol ndahaama, konne'en ndirɓi ɓikkoy maagol haa kawtirɗe laabi fuu. Ɓe mbaɗi kur'u dow tedduɓe maagol, ɓe kaɓɓi mawɓe maagol fuu bee callalluuji.

¹¹ An boo a wuykan, a nyukkoto, a ɗaɓɓitan hisrude ngam hisugo yeeso konne'en.

¹² Berniiji ma cemmbiɗɗi fuu nanndi bee ibbe ɗe ɓiɓɓe maaje aartuɗe ɓenndi. To goɗɗo dimmbi ɗe, ɓiɓɓe maaje caaman nder hunnduko koo moy giɗɗo nyaamugo ɗe.

¹³ Honooɓe ma wonduɓe bee maaɗa laati bana rewɓe. Dammuɗe lesdi ma maɓɓitake jaasɗum yeeso konne'en ma, yiite ɗon nyaama leɗɗe palduɗe.

¹⁴ Nyeɗ ndiyam! Ngam konne'en taarake ma. Wo'itin mahol ma cemmbiɗŋgol. Sey a jiiɓa loope, a yaaɓa ɗe, a taasko tappirɗum birikje.

¹⁵ Bee non fuu, yiite nyaamete, kaafahi halkete. Ki nyaamete bana baɓɓatti nyaamiditta koo ɗume, koo to yimɓe ma ɗuuɗi bana baɓɓatti.

^16-17 A ɗuɗɗini filooɓe ma ko ɓuri koode asamanji, aynooɓe ma bana baɓɓatti, wakiili'en ma bana baɓɓatti baaliiɗi haa kowaaɗi nder wakkati jaaŋgol. To naaŋge fuɗi, ɗi mbe'ita bileeji maaji, ɗi piira, ɗi ndilla, walaa annduɗo haa toy.

¹⁸ An laamiiɗo Assuura, ardiiɓe ma ɗaanake, hoore'en ma suusɓe mbaalake, ndimmbataako, ummaatoore ma saŋkitake dow kooseeje, walaa mooɓtanɗo nde.

¹⁹ Walaa lekki ngam naawnere ma, huuduure ma hurgataako. Nananɓe habaru maaɗa fuu kellan juuɗe ngam maaɗa, ngam tum halleende ma meemi koo moy.