Matta 24 - Fulfulde Bible

Yeesu waŋgini gibbinki haykaliiru

¹ Yeesu wurti haykaliiru. Nde o ɗon dilla, pukara'en maako ɓaditi mo ngam sappingo mo nyiɓaalo haykaliiru ndu.

² Nden Yeesu wi'i ɓe: “On ɗon ngi'a kuuje ɗe fuu na? Gooŋga mbi'anmi on: Fakat, hayre luttataa dow hayre, ɓe ngibbinan koo ɗume fuu haa ɗo.”

Alaamaaji aartanɗi timmoode duniyaaru

³ Nde Yeesu ɗon jooɗi dow Hooseere Jaytunje, pukara'en maako ɓaditi mo, kamɓe feere maɓɓe, ɓe ƴami mo: “Yeccu min ndeye kuuje ɗe'e laatoto? Alaama kaye waŋginta saa'i loraaki ma e timmuki duniyaaru?”

⁴ Yeesu jaabi ɓe: “Kakkile, ngam taa goɗɗo majjina on.

⁵ Ngam ɗuuɗɓe ngaran bee innde am, ɓe mbi'an: Min woni Almasiihu. Ɓe majjinan yimɓe ɗuuɗɓe.

⁶ On nanan kubaruuji konuuji ɓadiiɗi e daayiiɗi. Kakkile, taa kultore. Doole ɗum laato, ammaa naa ɗum timmoode tawon.

⁷ Ummaatoore ummanto ummaatoore feere. Laamu ummanto laamu feere. Weelooji e dimmbanɗe lesdi mbaɗan haa nokkuuje feere feereeje.

⁸ Boneeji ɗi fuu laatoto bana fuɗɗam luuwe ɓesnanɗo.

⁹ Yimɓe naŋngan on, njahran on haa woɗɓe ngam ɓe torra on, ɓe mbara on. Ummaatooje fuu nganyan on daliila innde am.

¹⁰ Saa'i man ɗuuɗɓe accan nuɗɗingo yam, ɓe zammbotiran, ɓe nganyindiran.

¹¹ Fewooɓe wi'anɓe ɓe annabi'en ɗuuɗɓe mbaŋgan, ɓe majjinan yimɓe ɗuuɗɓe.

¹² Ngam halleende ɗuuɗan masin, yiide yimɓe ɗuuɗɓe feewtan.

¹³ Ammaa mo munyi haa timmoode, hisan.

¹⁴ Kubaruwol belŋgol ngol laamu asamanji waazinte nder duniyaaru fuu, ngol laatanto ummaatooje seedamku, nden duniyaaru timman.”

Gibbinki Urusaliima

¹⁵ “To on ngi'i nyidduɗum nattinoojum ko annabi Daniyel wolwino dow muuɗum ɗon dari haa nokkuure seniinde - mo jaŋngi ɗum, sey faama booɗɗum!

¹⁶ Nden kam sey wonɓe haa lesdi Yahudiya ndogga haa kooseeje.

¹⁷ Mo ɗon dow soorowol, taa jippo ngam hoocugo kuuje nder maagol.

¹⁸ Mo ɗon haa ngesa boo, taa loro haa saare ngam hoocugo limce mum.

¹⁹ Kayto, bone laatanto reedu'en e musininanɓe nder nyannde man!

²⁰ Tore Allah ngam taa doggudu mon laato saa'i duumol malla nyannde siwtorde.

²¹ Ngam saa'i man torra makka laatoto, irin maaka meeɗaay laataago diga duniyaaru jooɗi haa wargo jonta, ka meetataa laataago boo.

²² To Allah ustaayno limgal nyalɗe man, walaa koo gooto hisanno. Ammaa o usti ɗe ngam daliila suɓaaɓe maako.

²³ Wakkati man, to goɗɗo wi'i on: Ndaa Almasiihu haa ɗo! Malla: Ndaa mo haa to! Taa njaɓe.

²⁴ Ngam fewooɓe wi'anɓe ɓe almasiihu'en malla ɓe annabi'en mbaŋgan, ɓe mbaɗan alaamaaji e kaayeefiiji mawɗi ngam majjingo koo suɓaaɓe Allah, to ɗum heɓoto.

²⁵ Mi anndini on ɗum diga ɗum siwaa laataago.”

Loraaki Ɓii-neɗɗo

²⁶ “To ɓe mbi'i on: Ndaa Almasiihu ɗon haa ladde! Taa njehe ton malla to ɓe mbi'i: O ɗon nyukki haa ɗo! Taa njaɓe ɗum.

²⁷ Bana ma'ere ma'irta diga fuunaaŋge haa hiirnaaŋge, non boo nyalaade loraaki Ɓii-neɗɗo laatorto.

²⁸ Ngam haa nyawmande woni fuu, ton jigaaje mooɓtoto.

²⁹ Law ɓaawo nyalɗe ɓillaare go, naaŋge nyiɓɓan, lewru accan yaynugo, koode asama njanan, baawɗeeji asama boo ndimmboto.

³⁰ Nden alaama Ɓii-neɗɗo waŋgan haa asama. Saa'i maajum ummaatooje duniyaaru fuu mboyan, ɓe ngi'an Ɓii-neɗɗo ɗon wara dow duule asama, bee baawɗe ɗuuɗɗe e tedduŋgal maŋngal.

³¹ O nelan malaa'ika'en maako, ɓe puufan luwal maŋngal, ɓe mooɓtan suɓaaɓe maako wonɓe haa alkibilaaji duniyaaru nayi fuu diga keerol asama ngo'ol haa ngola.”

Misaalu ibbi

³² “Paame ko ibbi anndinta on: To lice maaki kesɗiti, haakooji maaki boo mbiliti, on anndi duumol ɓadake.

³³ Bana non onon boo, to on ngi'i kuuje ɗe'e ɗon laato, annde o ɓadake wargo.

³⁴ Gooŋga mbi'anmi on: Kuuje ɗe'e fuu laatoto hiddeko yimɓe zamanuuru ndu'u fuu maayda.

³⁵ Asama e lesdi njinnan, ammaa bolle am njinnataa sam.”

Walaa mo anndi ndey nyalaade darŋgal laatoto

³⁶ “Walaa neɗɗo anndi nyalaade maajum malla saa'i man. Koo malaa'ika'en haa asama, koo Ɓiɗɗo boo, sey Baabiraawo tan anndi.

³⁷ Ko laatino zamanu Nuuhu, ɗum waɗan saa'i loraaki Ɓii-neɗɗo boo.

³⁸ Nde ilam tuufaana siwaano wargo, yimɓe ɗonno nyaama, ɗonno njara, ɗonno ɓaŋga e ɗonno te'a haa nyalaade Nuuhu nasti koommbowal.

³⁹ Ɓe anndaa sam, haa ndiyam wari, halki ɓe fuu. Bana non loraaki Ɓii-neɗɗo boo laatorto.

⁴⁰ Saa'i man ɗiɗo ngondan haa ngesa, gooto hoo'e, gooto acce.

⁴¹ Rewɓe ɗiɗo namdan dow namarde, gooto hoose, gooto acce.

⁴² Ngam maajum ayne, nde nii on anndaa nyalaade loraaki Jawmiraawo mooɗon.

⁴³ A anndi booɗɗum to jawmu saare anndino saa'iire ndeye gujjo warata, o ɗaanataakono, o accataano gujjo nasta saare maako.

⁴⁴ Ngam maajum laate taaskiiɓe onon boo, ngam Ɓii-neɗɗo waran nder saa'iire nde on tammaaki sam.”

Kuuwoowo koolaaɗo e kuuwoowo kalluɗo

⁴⁵ “Kadi, moy woni kuuwoowo koolaaɗo, kakkilɗo mo jaagorɗo mum halfini ɗum huuwooɓe saare mum, haa o hokka ɓe nyaamdu to saa'i man yottake?

⁴⁶ Barka laatanto kuuwoowo oo, to jaagorɗo maako warti, tawti mo o ɗon suklani kuugal nga'al.

⁴⁷ Gooŋga mbi'anmi on: Jaagorɗo darnan mo dow jawdi muuɗum fuu.

⁴⁸ Ammaa to kuuwoowo oo o kalluɗo, o numi: Jaagorɗo am wartataa law,

⁴⁹ o fuɗɗi fiyugo huuwooɓe wonduɓe bee maako, o ɗon nyaamda e o ɗon yarda bee wuykooɓe,

⁵⁰ nden jaagorɗo maako wartan nyalaade nde o tammaaki, nder saa'iire nde o anndaa boo.

⁵¹ Jaagorɗo maako torran mo torra caatuka, hokkan mo ngeenaari naafiki'en. Kaŋko o woyan, o hirƴindiran nyii'e ngam bone.”