Matta 22 - Fulfulde Bible

Balndi dow ɓaŋgal

¹ Kadiboo Yeesu waɗani ɓe balndi, wi'i ɓe:

² “Laamu asamanji nanndi bee laamiiɗo mo waɗi juulde ɓaŋgal ɓiyum.

³ O neli suka'en maako haa ewnaaɓe haa nyaamdu juulde man, ammaa ɓe cali wargo.

⁴ Fahin o neli suka'en feere bee umroore bana ni'i: Mbi'e ewnaaɓe: Ga'i am e nyalbi am payɗi kirsaama, nyaamdu defaama jonta, kuuje fuu taaskitinaama, ngare haa juulde ɓaŋgal.

⁵ Ammaa ewnaaɓe kakkilanaay ɗum, ɓe ndilli: Goɗɗo haa ngesa muuɗum, goɗɗo boo haa filu muuɗum,

⁶ luttuɓe naŋngi suka'en laamiiɗo go, ɓe torri ɓe, ɓe mbari ɓe.

⁷ Laamiiɗo ɓerni, neli sooje'en muuɗum, ɓe mbari mbarooɓe ko'e ɓe'e, ɓe nguli wuro maɓɓe boo.

⁸ Nden o wi'i suka'en maako: Nyaamdu juulde ɓaŋgal defaama, ammaa ewnaaɓe ke'aay wargo.

⁹ Ngam maajum njehe haa kawtirɗe laabi fuu, ewne mo tawɗon fuu haa juulde ɓaŋgal.

¹⁰ Sukaaɓe go njehi haa laabi, ɓe tawi halluɓe e wooɗɓe fuu, ɓe mooɓti ɓe. Suudu ɓaŋgal heewi ewnaaɓe.

¹¹ Laamiiɗo nasti ngam laarugo ewnaaɓe. Ton o yi'i goɗɗo, mo ɓornaaki limce ɓaŋgal.

¹² O wi'i mo: Soobaajo am, noy a nastiri haa ɗo bilaa toggoore ɓaŋgal? O waawaay jaabaago mo sam.

¹³ Nden laamiiɗo wi'i jaggiiɓe muuɗum: Kaɓɓe kosɗe maako e juuɗe maako, ngudine mo yaasi nder nyiɓre, o woya, o hirƴindira nyii'e ton.”

¹⁴ Ngam woodi ewnaaɓe ɗuuɗɓe, ammaa suɓaaɓe kam ɗuuɗaay.

Jomorgol ngam laamiiɗo

¹⁵ Nden Farisa'en njehi, mbaɗi sawari ngam naŋngugo Yeesu nder bolle muuɗum nder tuuforgol.

¹⁶ Ɓe neli pukara'en maɓɓe bee yimɓe Hirudus haa Yeesu, ɓe mbi'i mo: “Moodibbo, min anndi walaa ko yaalu ma bee goɗɗo, a senndindirtaa yimɓe, a ɗon anndina laawol Allah bee gooŋga.

¹⁷ Wi' min ko a numata: Ɗum kaanduɗum hokkugo laamiiɗo Roma jomorgol na malla naa non?”

¹⁸ Ammaa Yeesu anndi numo maɓɓe halluŋgo, o wi'i ɓe: “Hey onon naafiki'en, koni on tuufani yam tuuforgol?

¹⁹ Kolleeɗam ceede ɗe ɓe njoɓrata jomorgol.” Ɓe ngaddani mo suleyre.

²⁰ Nden Yeesu ƴami ɓe: “Suura e innde moy ɗo?”

²¹ Ɓe mbi'i mo: “Kaysara, laamiiɗo Roma jeyi.” Yeesu wi'i ɓe: “Nden kam njoɓe Kaysara ko haanani mo, ndokke Allah boo ko haanani Allah.”

²² Nde ɓe nani jaawaabu man, ɓe kayɗini, ɓe ndilli, ɓe acci mo.

Ƴamol dow ummitineeki maayɓe

²³ Nyalaade man Saduki'en, wi'anɓe maayɓe ummitittaako, ngari haa Yeesu. Ɓe ƴami mo:

²⁴ “Moodibbo, Muusa wi'i: To goɗɗo maayi, walaa ɓikkoy, sey deerɗiiko te'a debbo maako ngam haa o heɓana maayɗo ɓikkoy.

²⁵ Woodino haa amin deerɗiraaɓe njoweeɗiɗo. Arano te'i debbo, maayi, heɓaay ɓikkoy. Bana nii o accani deerɗiiko debbo maako.

²⁶ Ɗum laati bana non dow ɗiɗaɓo, dow tataɓo haa yotti joweeɗiɗaɓo.

²⁷ Ɓaawo maɓɓe fuu, debbo boo maayi.

²⁸ Nyannde ummitineeki maayɓe kam, debbo oo laatanto moy caka maɓɓe? Nde nii ɓe fuu ɓe te'ino mo.”

²⁹ Ammaa Yeesu jaabi ɓe: “On ɗon mboofa masin! Ngam on anndaa ko winnda nder Defte Ceniiɗe, on anndaa baawɗe Allah boo.

³⁰ To maayɓe ummitake, walaa teegal fahin, ammaa ɓe laatoto bana malaa'ika'en haa asama.

³¹ On njaŋngaay ko Allah wolwani on dow ummitineeki maayɓe na? O wi'i:

³² Min woni Allah Ibrahiima e Allah Isiyaaku e Allah Yaakubu. Mi Allah yeeɗɓe naa mo maayɓe!”

³³ Ekkitinol maako hayɗini mooɓe nanɗe mo fuu.

Umroore ɓurnde mawnugo

³⁴ Nde Farisa'en nani no Yeesu je'iniri Saduki'en, ɓe mooɓtotiri.

³⁵ Gooto maɓɓe, moodibbo tawreeta waɗani Yeesu ƴamol ngo'ol ngam jarribaago mo:

³⁶ “Moodibbo, umroore ndeye ɓuri mawnugo haa tawreeta?”

³⁷ Yeesu jaabi mo: “Yiɗ Jawmiraawo, Allah maaɗa bee ɓernde ma fuu, bee yoŋki ma fuu e bee hakkiilo ma fuu.

³⁸ Kayre woni umroore mawnde e arannde.

³⁹ Ndaa ɗiɗawre nanndunde bee maare: Yiɗ keeddiɗɗiraawo maaɗa bana no a yiɗiri hoore ma.

⁴⁰ Tawreeta Muusa e ko annabi'en ngaazini fuu ɗon ndari dow umrooje ɗiɗi ɗe'e.”

Almasiihu e Daawuda

⁴¹ Nde Farisa'en mooɓtotiri, Yeesu ƴami ɓe:

⁴² “Ko numoton dow Almasiihu? O ɓii moy?” Ɓe mbi'i mo: “O Ɓii Daawuda.”

⁴³ Yeesu wi'i ɓe: “Kadi ngam ɗume Daawuda ewni mo Jawmiraawo bee baawɗe Ruuhu Allah? O wi'i:

⁴⁴ Jawmiraawo wolwani jawmam: Jooɗa haa nyaamo am, haa to mi wallini konne'en maaɗa les kosɗe ma.

⁴⁵ Daawuda ewni mo Jawmiraawo, noy Almasiihu laatori ɓiyiiko kadi?”

⁴⁶ Walaa mo waawi jaabaago mo koo wolde woore. Diga nyannde man koo moy huli ƴamugo mo ƴamɗe goɗɗe.