Matta 20 - Fulfulde Bible

Balndol dow huuwooɓe ngesa inabooje

¹ “Laamu asamanji nanndi bee jawmu ngesa mo wurti fajiri cub ngam tefoygo huuwooɓe ngam ngesa inabooje muuɗum.

² O narri bee maɓɓe, o yoɓa ɓe nyalaade fuu suleyre cardi. Nden o neli ɓe haa ngesa maako.

³ O wurti fahin saa'a joweenayi, o yi'i yimɓe woɗɓe ɗon ndari haa luumo, ɓe ngalaa kuugal.

⁴ O wi'i ɓe: Njehe haa ngesa am onon boo, mi yoɓan on ko haani.

⁵ Ɓe ndilli haa ngesa maako. Jawmu saare wurti fahin caka nyalawma, o wurti saa'a tati boo, o waɗi bana naane.

⁶ Saa'a jowi o wurti fahin, o tawi yimɓe woɗɓe ɗon ndari. O ƴami ɓe: Ngam ɗume nyalluɗon daraago haa ɗo meere?

⁷ Ɓe njaabi: Ngam walaa mo tefi min ngam kuugal sam. O wi'i ɓe: Njehe, kuuwe onon boo haa ngesa am.

⁸ Nde naaŋge muti, jawmu ngesa wi'i ardiiɗo kuugal muuɗum: Ewna huuwooɓe, yoɓ ɓe ngeenaari maɓɓe, fuɗɗir bee sakkitiiɓe yahugo haa ngesa, timminir bee aartuɓe.

⁹ Yahɓe ngesa deydey saa'a jowi ngari, ɓe keɓi koo moy maɓɓe suleyre suleyre.

¹⁰ Nde aartuɓe yahugo ngesa ngari, ɓe tammino ɓe keɓan ɗuuɗɗum, ammaa o hokki ɓe kamɓe boo suleyre suleyre.

¹¹ Nde ɓe njaɓi, ɓe ngurŋgurti dow jawmu ngesa,

¹² ɓe mbi'i: Ndaa, huuwɓe saa'a ngoota tan a yoɓi ɓe kal-kal bee amin, minin nyalluɓe huuwugo nder bone e gulɗum naaŋge!

¹³ Ammaa jawmu ngesa jaabi gooto maɓɓe, wi'i: Soobaajo am, mi waɗaay ma rikici. En narraay dow ngeenaari suleyre cardi woore nder nyalawmaare na?

¹⁴ Hoo'u ngeenaari ma, yah, min mi yiɗi yoɓugo cakitiiɗo yahugo haa kuugal boo bana mi yoɓi ma.

¹⁵ Malla mi waawataa huuwtinirgo jawdi am bana mi yiɗi? Malla a haaji ngam mi booɗɗo?

¹⁶ Bana non boo, sakkitiiɓe laatoto aartuɓe, aartuɓe boo laatoto sakkitiiɓe.”

Yeesu waŋgini maayde muuɗum e ummitineeki muuɗum tataɓre

¹⁷ Nde Yeesu ɗon yaha Urusaliima, o hoo'i pukara'en maako sappo e ɗiɗo feere maɓɓe. Dow laawol o wi'i ɓe:

¹⁸ “Nane, en ɗon njaha Urusaliima, ton ɓe ndokkan Ɓii-neɗɗo haa juuɗe mawɓe liman'en e moodiɓɓe tawreeta. Ɓe kiitoto mo kiita maayde.

¹⁹ Kamɓe ɓe ndokkan mo haa juuɗe heefeerɓe, ɓe njancan mo, ɓe ɓoccan mo, ɓe ɓilan mo dow leggal gaafaaŋgal. Ammaa nyalaade tataɓre, o ummititto diga maayde.”

Ƴamol daada Yaakuba e Yuhanna

²⁰ Nden daada ɓiɓɓe Zebede wari haa Yeesu bee ɓiɓɓe mum. O sujidi, tori mo huunde.

²¹ Yeesu ƴami mo: “Ko ngiɗɗaa?” O jaabi: “Nyannde a laamake, accu ɓiɗɗo am gooto jooɗo haa nyaamo ma, gooto boo haa nano ma.”

²² Yeesu jaabi mo: “On anndaa ko torotooɗon. On mbaawan yarugo jardugel bone ngel min mi tammi yarugo na?” Ɓe mbi'i: “Min mbaawan.”

²³ Yeesu jaabi ɓe: “Gooŋga, on njaran jardugel am, ammaa jooɗaago haa nyaamo malla haa nano am, naa min hokkata ɗum, ɗum ɗon ngam yimɓe ɓe Baabiraawo am taaskitini.”

²⁴ Nde pukara'en sappo luttuɓe nani haala ka'a, ɓe ɓernani deerɗiraaɓe ɗiɗo go.

²⁵ Nden Yeesu ewni ɓe fuu, wi'i ɓe: “On anndi laamiiɓe ummaatooje ɗon ndoola yimɓe muuɗum'en, mawɓe boo ɗon kolla ɓe baawɗe.

²⁶ Ammaa taa ɗum wona non caka mooɗon. To gooto mooɗon yiɗi laataago mawɗo, sey o laato jaggiiɗo mooɗon.

²⁷ Mo yiɗi ardaago caka mooɗon, laatoto maccuɗo mooɗon.

²⁸ Ngam Ɓii-neɗɗo boo waraay ngam yimɓe kuuwana mo, ammaa ngam o huuwana yimɓe, o hokka yoŋki maako ngam soottugo ɗuuɗɓe.”

Yeesu wumtini wumɓe ɗiɗo

²⁹ Nde ɓe ngurti wuro Yeriko, mooɓre ɗuuɗnde tokki Yeesu.

³⁰ Wumɓe ɗiɗo ɗonno njooɗi kommbi laawol, nde ɓe nani Yeesu ɗon saalo, ɓe ngooki, ɓe mbi'i: “Jawmiraawo, Ɓii Daawuda, enɗu min!”

³¹ Mooɓre telɓani ɓe haa ɓe njeeɗo. Ammaa ɓe towni sawtu, ɓe mbi'i: “Jawmiraawo, Ɓii Daawuda, enɗu min!”

³² Yeesu dari, ewni ɓe, ƴami ɓe: “Ko ngiɗɗon mi waɗana on?”

³³ Ɓe njaabi: “Jawmiraawo, haa gite amin mbumta.”

³⁴ Yeesu yurmini ɓe, meemi gite maɓɓe, law yimɓe ɗiɗo go mbumti, ɓe tokki mo.