Matta 16 - Fulfulde Bible

Farisa'en e Saduki'en ƴami alaama

¹ Farisa'en e Saduki'en ngari haa Yeesu ngam jarribaago mo. Ɓe ƴami mo o waŋginana ɓe alaama iwka diga asama.

² Yeesu jaabi ɓe: “To naaŋge muti, asama boo wooji, on ɗon mbi'a: Jaŋngo laaɓan.

³ Fajiri boo, to asama nyiɓɓi, duule mbooji, on ɗon mbi'a: Naargewol ummoto hannde! On mbaawi fassitirgo ko waŋgi haa asama, ammaa alaamaaji laatiiɗi jonta kam, on mbaawataa fassitirgo ɗi.

⁴ Yimɓe zamanuuru ndu'u, ɓe halluɓe, zammbotooɓe Allah! Ɓe ngeli alaama, ammaa ɓe keɓataa, sonaa alaama annabi Yonas.” Nden o acci ɓe, o dilli.

Ufnirɗum Farisa'en e Saduki'en

⁵ Pukara'en eeri weendu. Ɓe ngejjiti hoo'ugo tamseeje.

⁶ Yeesu wi'i ɓe: “Kakkile, ayne ko'e mooɗon e ufnirɗum Farisa'en e Saduki'en.”

⁷ Pukara'en carwootiri, ɓe mbi'i: “O wolwi bana non ngam en koo'aay tamseeje.”

⁸ Yeesu anndi ko ɓe numata. O ƴami ɓe: “Koni mbi'oton on ngalaa tamseeje, onon famɗa-nuɗɗinki'en?

⁹ On paamaay tawon na? On ciftortaa haala tamseeje jowi ɗe mi senndani yimɓe ujine njowo e limgal cilaaje ɗe on adi

¹⁰ e haala tamseeje joweeɗiɗi ɗe mi senndani yimɓe ujine nayo e limgal cilaaje ɗe on adi na?

¹¹ Koni on paamataa? Mi wolwanaay on haala tamseeje! Kakkilane ufnirɗum Farisa'en e Saduki'en.”

¹² Nden pukara'en paami o wi'aay ɓe ayna ko'e maɓɓe e ufnirɗum tamseeje ammaa ekkitinol Farisa'en e Saduki'en.

Piyer seedi Yeesu woni Almasiihu

¹³ Yeesu yehi lesdi Kaysariya-Filippi. Ton o ƴami pukara'en maako: “Yimɓe ɗon mbi'a, min, Ɓii-neɗɗo, mi moy?”

¹⁴ Ɓe njaabi mo: “Woɗɓe ɗon mbi'a an woni Yuhanna baɗoowo baptisma, woɗɓe boo ɗon mbi'a an woni Eliya. Woɗɓe boo ɗon mbi'a an woni Yeremiya malla gooto annabi'en.”

¹⁵ Yeesu ƴami ɓe: “Onon boo, on ɗon mbi'a mi moy?”

¹⁶ Simon Piyer jaabi mo: “An woni Almasiihu, Ɓiɗɗo Allah geeto.”

¹⁷ Yeesu wi'i mo: “A barkiɗinaaɗo, Simon ɓii Yonas, naa neɗɗo waŋginani ma gooŋga ka, ammaa ɗum Baabiraawo am mo asama.

¹⁸ Mi ɗon wi'e: An woni Piyer waato tapaare. Dow tapaare man mi mahan jama'aare nuɗɗinɓe yam. Koo maayde jaalataako nde sam.

¹⁹ Mi hokkete maɓɓitirɗum laamu asamanji. Ko a haɓɓi haa duniyaaru, ɗum haɓɓaama haa asama boo, ko a fiisti haa duniyaaru, ɗum fiistaama haa asama boo.”

²⁰ Nden Yeesu umri pukara'en muuɗum taa ɓe ngecca koo moy kanyum woni Almasiihu.

Yeesu waŋgini haala maayde muuɗum e ummitineeki muuɗum

²¹ Diga saa'i man Yeesu fuɗɗi faamtingo pukara'en muuɗum, o wi'i: “Doole mi yaha Urusaliima, mi yara bone ɗuuɗɗum diga ndotti'en e mawɓe liman'en e moodiɓɓe tawreeta, ɓe mbarammi, ammaa mi ummito diga maayde nyalaade tataɓre.”

²² Piyer wicciti mo sera, fuɗɗi felugo mo, wi'i: “Kayya, yaa Jawmiraawo, Allah haɗ ɗum! Irin man warantaa ma sam!”

²³ Ammaa Yeesu yeesiti, wi'i Piyer: “Daayam, an Sayɗaanu! A laatani yam daliila fergere, ngam numooji maaɗa iwaay haa Allah, ammaa haa yimɓe.”

²⁴ Nden Yeesu wi'i pukara'en muuɗum: “To goɗɗo yiɗi tokkaago yam, sey o acca muuyo maako, o roondo gaafaaŋgal maako, o tokko yam.

²⁵ Ngam koo moy yiɗi hisnugo yoŋki muuɗum, majjinan ki. Ammaa mo majjini yoŋki mum ngam am, heɓtan ki.

²⁶ To neɗɗo heɓi duniyaaru fuu, ammaa o halki yoŋki maako, ɗume ɗum nafata mo? Malla woodi ko goɗɗo waawata hokkugo ngam soottugo yoŋki muuɗum na? Walaa sam!

²⁷ Ngam Ɓii-neɗɗo waran nder tedduŋgal Baabiraawo mum bee malaa'ika'en mum, saa'i man o warjoto koo moy deydey kuuɗe muuɗum.

²⁸ Gooŋga mbi'anmi on, fakat woɗɓe caka mooɗon maayataa, sey to ɓe ngi'i garki Ɓii-neɗɗo bee laamu muuɗum.”