Matta 12 - Fulfulde Bible

Ƴamol dow nyannde siwtorde

¹ Saa'i man, Yeesu saali nder ngesa alkamaari, ɗum nyannde siwtorde. Pukara'en maako maati dolo, nden ɓe ngewi cammeeje, ɓe ƴakki.

² Nde Farisa'en ngi'i ɗum, ɓe mbi'i Yeesu: “Pukara'en maaɗa ɗon kuuwa ko dagaaki huuweego nyannde siwtorde.”

³ O jaabi ɓe: “On meeɗaay jaŋngugo ko Daawuda waɗino, kaŋko e yimɓe maako nde ɓe maati dolo na?

⁴ Ɓe nasti suudu Allah, ɓe nyaami tamseeje jo'inaaɗe yeeso Allah, koo nde ɓe ngalaa duŋayeere nyaamugo ɗe, sey liman'en tan?

⁵ Malla on meeɗaay jaŋngugo nder tawreeta, liman'en ɗon kuuwa nder haykaliiru koo nyannde siwtorde boo na? Bee man ɓe ɗon luuta umroore, ammaa ɓe ngalaa aybe.

⁶ Mi ɗon wi'a on: Ndaa, ko ɓuri haykaliiru maŋngu ɗon haa ɗo.

⁷ To on paamino ko saawi nder bolle ɗe'e: Enɗam ngiɗmi, naa dabbaaji kirsaaɗi, nden kam on aybintaano yimɓe ɓe ngalaa aybe.

⁸ Ngam Ɓii-neɗɗo woni Jawmu nyalaade siwtorde.”

Yeesu yamɗitini waata-juŋngoojo

⁹ Yeesu ummi ton, yehi, nasti suudu dewal Yahuudu'en.

¹⁰ Woodi goɗɗo waata-juŋngoojo ton. Farisa'en ngiɗi wullaago Yeesu, ngam man ɓe ƴami mo: “Tawreeta duŋani en yamɗitingo goɗɗo nyannde siwtorde na?”

¹¹ Yeesu jaabi ɓe: “Goɗɗo caka mooɗon, to o woodi mbaalu ngootu tan, nden ngu yolli nder ngaska nyannde siwtorde, o wurtintaa ngu na?

¹² Fakat, neɗɗo ɓuri mbaalu saman, ngam maajum ɗum dagake huuwugo kuugal booɗŋgal nyannde siwtorde.”

¹³ Nden o wi'i gorko go: “Fortu juŋngo ma.” O forti ngo, ngo yamɗiti, warti bana ngoya.

¹⁴ Nden Farisa'en ngurti, carwootiri, kaɓɓi dabare ngam mbarugo Yeesu.

Suka mo Allah suɓi

¹⁵ Ammaa Yeesu faami anniya maɓɓe, o ummi nokkuure man, o dilli, mooɓe ɗuuɗɗe tokki mo. O yamɗitini nyawɓe fuu.

¹⁶ Ammaa o barri ɓe, taa ɓe mbaŋgina mo.

¹⁷ Ɗum hiɓɓini annabaaku Esaaya, bi'ɗo:

¹⁸ “Allah wi'i: Ndaa suka am mo mi suɓi, giɗaaɗo am mo mi seyorto. Mi neli Ruuhu am dow maako, o anndinan ummaatooje kiita ndarnuka.

¹⁹ O jokkirtaa bee goɗɗo, o wookataa, walaa mo nanata sawtu maako haa laabi.

²⁰ O yewataa kewal nyobbaaŋgal. O nyifataa pittirlayel, to ngel ɗon suura tawon, haa to o heɓani kiita ngooŋɗuka jaalorgal.

²¹ Ummaatooje fuu tammorto innde maako.”

Jaawaabu Yeesu haa hallinɓe mo

²² Nden ɓe ngaddani Yeesu goɗɗo mo ginnawol ɗon nder muuɗum, o bumɗo, muukaajo boo. Yeesu yamɗitini mo, o wolwi, o yi'i.

²³ Ɗum hayɗini mooɓe fuu, ɓe mbi'i: “Oo ɗo, naa o Ɓii Daawuda na?”

²⁴ Nde Farisa'en nani ɗum, ɓe mbi'i: “Goɗɗo oo ɗon riiwa ginnaaji bee baawɗe ɗe Be'elzebul, laamiiɗo ginnaaji hokki mo.”

²⁵ Yeesu anndi numooji maɓɓe, wi'i ɓe: “To yimɓe laamu koo nguye narraay, laamu man do'oto. To yimɓe wuro koo ngoye malla yimɓe saare koo ndeye narraay, ɗum darataako.

²⁶ To Sayɗaanu ɗon riiwa Sayɗaanu, nden kam o narraay bee hoore maako, noy laamu maako tabitirta?

²⁷ To min mi ɗon riiwa ginnaaji bee baawɗe Be'elzebul, bee baawɗe ɗeye ɓikkoy mooɗon boo ndiiwrata ɗi? Ngam maajum ɓikkoy mooɗon kiitoto on.

²⁸ Ammaa to bee baawɗe Ruuhu Allah ndiiwranmi ginnaaji boo, nden kam laamu Allah yottanake on.

²⁹ Walaa mo waawataa nastugo saare cemmbiɗɗo, wujja kuuje maako, sonaa o aarta, o haɓɓa mo tawon, nden o ɓofta kuuje saare maako fuu.

³⁰ Mo wondaay bee am, o konneejo am. Mo wallaay yam mooɓtugo, saŋkitan.

³¹ Ngam maajum mi ɗon wi'a on: Neɗɗo heɓan yaafuye hakkeeji mum e bolle mum kalluɗe dow Allah fuu. Ammaa mo wolwi kalluka dow Ruuhu Ceniiɗo, heɓataa yaafuye sam.

³² Koo bolwanɗo kalluka dow Ɓii-neɗɗo boo, heɓan yaafuye. Ammaa mo yeddi Ruuhu Ceniiɗo, heɓataa yaafuye sam, koo nder zamanuuru jontaaru, koo nder waranndu boo.”

Lekki e ɓiɓɓe mum

³³ “To lekki wooɗi, ɓiɓɓe maaki boo mbooɗan. To lekki wooɗaay, ɓiɓɓe maaki boo mbooɗataa. Ɓe annditan lekki haa ɓiɓɓe mum.

³⁴ Onon ɓiɓɓe poosokje, noy on mbaawrata wolwugo kuuje booɗɗe nde onon on halluɓe? Ko heewi ɓernde goɗɗo, kanjum hunnduko muuɗum wolwata.

³⁵ Neɗɗo booɗɗo ɗon wurtina kuuje booɗɗe nder siga mum mbooɗka, neɗɗo kalluɗo boo ɗon wurtina kuuje kalluɗe nder siga mum kalluka.

³⁶ Mi ɗon wi'a on: Nyalaade darŋgal, yimɓe njaabanto ko'e muuɗum'en dow bolle meereeje ɗe ɓe mbolwi fuu.

³⁷ Allah gooŋɗinte fodde bolle maaɗa malla boo o aybinte.”

Kaayeefi Yonas

³⁸ Nden woɗɓe nder moodiɓɓe tawreeta e Farisa'en mbi'i Yeesu: “Moodibbo, min ngiɗi a waɗa alaama haa min ndaara!”

³⁹ Yeesu jaabi ɓe: “Yimɓe zamanuuru ndu'u, ɓe halluɓe, zammbotooɓe Allah! Ɓe ngeli alaama, ammaa ɓe keɓataa, sonaa alaama annabi Yonas.

⁴⁰ Bana Yonas waɗi nyalawmaaje tati e jemmaaje tati nder reedu liiŋgu, bana non Ɓii-neɗɗo boo waɗan nyalawmaaje tati e jemmaaje tati nder lesdi.

⁴¹ Nyalaade darŋgal, yimɓe Niniwe ummanto yimɓe zamanuuru ndu'u, hiitoto ɓe, ngam yimɓe Niniwe tuubi nde ɓe nani waazu Yonas. Ndaa, ɓurɗum Yonas haa ɗo.

⁴² Laamiiɗo debbo, mo Lesdi Fombina, ummanto yimɓe zamanuuru ndu'u, wulloto ɓe nyalaade darŋgal, ngam o wari diga daayiiɗum haa o nana bolle Suleymaanu keewɗe hikma. Ndaa ɓurɗum Suleymaanu haa ɗo.”

Loraaki ginnawol

⁴³ “To ruuhuwol coɓŋgol wurtake goɗɗo, ngol yiiloyan haa karɗe ngam ɗaɓɓugo nokkuure siwtaago, to ngol heɓaay,

⁴⁴ nden kam ngol wi'an: Mi loroto haa suudu am ndu mi wurtino. To ngol lori haa maaru, ngol tawan ndu sookru, wuuwaandu e mo'itinaandu,

⁴⁵ nden ngol yaha, ngol wadda ruuhuuji goɗɗi joweeɗiɗi, ɓuranɗi ngol hallugo, ɗi nastan suudu man, ɗi njooɗoto nder maaru. Joonde goɗɗo oo hallan ko ɓuri naane. Bana nii ɗum laatanto yimɓe halluɓe nder zamanuuru ndu'u!”

Deerɗiraaɓe Yeesu e daada mum

⁴⁶ Saa'i Yeesu ɗon wolwana mooɓre tawon, daada maako e deerɗiiko'en ɗon ndari yaasi, ngam ɓe ngiɗi wolwango mo.

⁴⁷ Goɗɗo feere wi'i mo: “Ndaa, daada ma e deerɗiraaɓe ma ɗon ndari yaasi, ɓe ngiɗi wolwango ma.”

⁴⁸ Yeesu jaabi mo: “Moy woni daada am? Ɓeye ngoni deerɗiraaɓe am?”

⁴⁹ Nden o sappi pukara'en maako, o wi'i: “Ndaa, ɓe'e ngoni daada am e deerɗiraaɓe am.

⁵⁰ Ngam waɗanɓe muuyo Baabiraawo am mo asama fuu, kamɓe ngoni deerɗiraaɓe am worɓe e rewɓe e daada am.”