Markus 3 - Fulfulde Bible

Jamɗitinki waata-juŋngoojo nyalaade siwtorde

¹ Ɓaawoɗon, Yeesu lorti haa suudu dewal Yahuudu'en. Goɗɗo waata-juŋngoojo ɗonno ton.

² Farisa'en ɗonno ayna Yeesu ngam yi'ugo to o yamɗitinan goɗɗo nyannde siwtorde, ngam ɓe ngiɗi wullaago mo.

³ Yeesu wi'i waata-juŋngoojo go: “Umma, dara yeeso yimɓe fuu.”

⁴ Nden Yeesu ƴami yimɓe ɓe ɗonno ndaara mo: “Ɗume tawreeta meeɗen duŋi nyalaade siwtorde? Waɗugo mbooɗeeŋga naa malla waɗugo halleende? Hisnugo yoŋki goɗɗo naa malla mbarugo mo?” Ammaa ɓe cali jaabaago mo.

⁵ Yeesu laari ɓe fuu bee tikkere, ɓernde maako naawi ngam caatal ɓerɗe maɓɓe. Nden o wi'i waata-juŋngoojo go: “Fortu juŋngo ma.” O forti ngo, juŋngo maako yamɗiti.

⁶ Farisa'en ngurti suudu dewal Yahuudu'en, ɓe kawti law bee woɗɓe nder yeɓre yimɓe Hirudus, ɓe carwootiri ngam halkugo Yeesu.

Mooɓre ɗuuɗnde tokki Yeesu haa weendu Galiili

⁷ Yeesu dillidi bee pukara'en muuɗum haa weendu Galiili. Mooɓre ɗuuɗnde tokki mo. Nde iwi diga Galiili e Yahudiya

⁸ e Urusaliima e Idumaya, diga gaɗa maayo Urdun e diga lesdi kommbi Tirus e Sidon. Yimɓe ɓe fuu ngari haa maako, ngam ɓe meeɗi nanugo habaru kuuɗe maako.

⁹ Nden Yeesu wi'i pukara'en muuɗum ɓe tefana mo koommbowal, ngam taa mooɓre ɓiɗɗa mo.

¹⁰ Ngam o yamɗitini yimɓe ɗuuɗɓe, nyawɓe fuu ɗon njaawa ɓaditaago ngam meemugo mo.

¹¹ Nde yimɓe ɓe ruuhuuji coɓɗi torri ngi'i Yeesu, ɓe ndo'i yeeso maako, ɓe ngooki ɓe mbi'i: “An a Ɓiɗɗo Allah.”

¹² Ammaa Yeesu umri ɗi bee caatal, taa ɗi mbaŋgina mo.

Yeesu suɓi pukara'en sappo e ɗiɗo

¹³ Nden Yeesu wa'i dow towndiire, o ewni ɓe o yiɗi fuu. Ɓe ngari haa maako.

¹⁴ Bana nii o waɗi ɓe nelaaɓe sappo e ɗiɗo, ngam ɓe ngonda bee maako e o nela ɓe waazoygo,

¹⁵ o hokki ɓe boo baawɗe riiwugo ginnaaji.

¹⁶ Ndaa nelaaɓe sappo e ɗiɗo ɓe o suɓi: Simon (Yeesu inndi mo Piyer)

¹⁷ e Yaakuba e Yuhanna, ɗiɗo fuu ɓiɓɓe Zebede. Yeesu inndi ɓe Bowanerges, bana wi'go: (Yimɓe bana felmaaŋgo)

¹⁸ e Andire e Filip e Bartolome e Matta e Tomas e Yaakuba ɓii Halfa e Tadde e Simon Kanaaniijo

¹⁹ e Yahuuda Iskariyot zammbotooɗo Yeesu.

Hakke dow Ruuhu Ceniiɗo

²⁰ Ɓaawo man Yeesu warti saare. Mooɓre hawti fahin, haa Yeesu e pukara'en muuɗum mbaawaay koo nyaamugo.

²¹ Nde banndiraaɓe maako nani haala man, ɓe ngari hoocugo mo, ngam yimɓe ɗon mbi'a: “Hakkiilo maako jiiɓake.”

²² Moodiɓɓe tawreeta warɓe diga Urusaliima mbi'i: “Be'elzebul ɗon nder maako, laamiiɗo ginnaaji hokki mo baawɗe riiwugo ɗi.”

²³ Nden Yeesu ewni ɓe, o wolwani ɓe bee balndi. O wi'i: “Bana noy Sayɗaanu waawrata riiwugo Sayɗaanu?

²⁴ To laamu senndake geɓe geɓe, ngu wilan.

²⁵ To yimɓe saare narraay hakkunde maɓɓe, saare man wilan.

²⁶ Non boo to Sayɗaanu ɗon dartano hoore muuɗum, to cennduki waɗi nder laamu maako, o darataako, o nattan.

²⁷ Goɗɗo waawataa nastugo saare cemmbiɗɗo ngam jaɓtugo jawdi maako, sey o aarta o haɓɓa cemmbiɗɗo oo, nden o ɓofta kuuje saare maako fuu.

²⁸ Gooŋga mbi'anmi on, yimɓe keɓan yaafuye hakkeeji muuɗum'en fuu e yaafuye bolle muuɗum'en kalluɗe dow Allah fuu.

²⁹ Ammaa mo wolwi kalluka dow Ruuhu Ceniiɗo, heɓataa yaafuye sam, ngam o waɗi hakkewol duumiiŋgol.”

³⁰ Yeesu wi'i non ngam woɗɓe mbi'no: “O woodi ruuhuwol kalluŋgol.”

Deerɗiraaɓe Yeesu e daada mum

³¹ Daada e deerɗiraaɓe Yeesu ngari. Ɓe ndari yaasi, ɓe neli ewnoygo mo.

³² Yimɓe ɗuuɗɓe ɗon njooɗodi bee Yeesu. Ɓe mbi'i mo: “Daada ma e deerɗiraaɓe ma ɗon yaasi, ɓe ngiɗi laarugo ma.”

³³ Yeesu jaabi ɓe: “Moy woni daada am e ɓeye ngoni deerɗiraaɓe am?”

³⁴ Nden o laari yimɓe taariiɓe mo, o wi'i: “Ndaa daada am e deerɗiraaɓe am ɗon ɗo!

³⁵ Waɗanɓe muuyo Allah fuu, kamɓe ngoni deerɗiraaɓe am worɓe e rewɓe e daada am.”