Markus 15 - Fulfulde Bible

Yeesu yeeso Pilaatu

¹ Fajiri cub, mawɓe liman'en kawti bee ndotti'en e moodiɓɓe tawreeta e hiitooɓe nder dawriinde fuu, ɓe carwootiri. Ɓe kaɓɓi Yeesu, ɓe njahri mo, ɓe ndokki mo haa juuɗe Pilaatu.

² Kaŋko boo o ƴami mo: “An woni laamiiɗo Yahuudu'en na?” Yeesu jaabi mo: “Nonnon bana mbi'ɗa.”

³ Mawɓe liman'en ngullori Yeesu kuuje ɗuuɗɗe.

⁴ Nden Pilaatu ƴami mo fahin: “A jaabataako koo ɗume na? Laar no ɓe ngullori ma gullaali ɗuuɗɗi.”

⁵ Ammaa Yeesu sali wolwugo, haa Pilaatu hayɗini.

Ɓe kiiti Yeesu kiita maayde

⁶ Nde juulde Paska waɗi fuu, Pilaatu woowi yoofango yimɓe kaɓɓaaɗo gooto mo ɓe ƴami.

⁷ Wakkati maajum goɗɗo bi'eteeɗo Barabbas ɗon haa suudu fursina bee woɗɓe, ɓe mbaɗino fitina, ɓe mbarno goɗɗo nder fitina ka'a.

⁸ Nden yimɓe mooɓre ndilli haa saare Pilaatu, ɓe mbi'i mo o waɗana ɓe ko o woowi waɗango ɓe.

⁹ Pilaatu ƴami ɓe: “On ngiɗi mi yoofana on laamiiɗo Yahuudu'en na?”

¹⁰ Ngam o anndi, mawɓe liman'en njahrani mo Yeesu ngam kaajal.

¹¹ Ammaa mawɓe liman'en tiɗɗini yimɓe ɓe mbi'a mo ndikka o yoofana ɓe Barabbas.

¹² Fahin Pilaatu wolwani yimɓe: “Mo on mbi'ata laamiiɗo Yahuudu'en, mi waɗa mo ɗume kadi?”

¹³ Ɓe kooli fahin, ɓe mbi'i: “Ɓil mo haa leggal gaafaaŋgal!”

¹⁴ Pilaatu ƴami: “Kadi halleende ndeye o waɗi?” Ammaa ɓe ɓesdi wookugo bee sawtu, ɓe mbi'i: “Ɓil mo haa leggal gaafaaŋgal!”

¹⁵ Pilaatu yiɗi fottango mooɓre. Ngam maajum o yoofani ɓe Barabbas. Nden o umri sooje'en, ɓe ɓocci Yeesu, o hokki mo haa juuɗe maɓɓe ngam ɓe ɓila mo haa leggal gaafaaŋgal.

Sooje'en njanci Yeesu

¹⁶ Sooje'en njahri Yeesu haa daldal laamorde, ɓe mooɓti sooje'en wonɓe nder yeɓre woore fuu.

¹⁷ Ɓe ɓorni mo mojaare woɗeere, ɓe mbaɗi meetaleewol gi'e, ɓe njo'ini ngol dow hoore maako.

¹⁸ Nden ɓe koofni mo: “Allah woonane, an laamiiɗo Yahuudu'en.”

¹⁹ Ɓe piyi mo bee sawru dow hoore, ɓe tuuti mo tuuɗe, ɓe tuggi koppi ɓe cujidani mo.

²⁰ Nde ɓe timmini jancugo mo, ɓe ɓorti mo mojaare woɗeere go, ɓe ɓorni mo limce maako. Nden ɓe njahri mo yaasi berniwol ngam ɓe ɓila mo dow leggal gaafaaŋgal.

Gaafeeki Yeesu

²¹ Haa laawol ɓe potti bee goɗɗo Sirene, bi'eteeɗo Simon, baaba Aleksandire e Rufus, o ɗon warta ngesa. Sooje'en ndooli mo roondaago leggal gaafaaŋgal Yeesu.

²² Ɓe njahri Yeesu haa nokkuure nde ɓe mbi'ata Golgota bana wi'ugo: nokkuure Gumbal-hoore.

²³ Ton ɓe ngiɗi yarnugo mo inaboojam ɓennduɗam jillaaɗam bee ɗacce, ammaa Yeesu sali yarugo.

²⁴ Nden ɓe ɓili mo haa leggal gaafaaŋgal, ɓe cenndi limce maako bee waɗugo kur'u ngam ɓe keɓta ko koo moy maɓɓe hoo'ata.

²⁵ Ɗum ɗonno saa'a joweenayi fajiri, ɓe ɓili mo dow leggal gaafaaŋgal.

²⁶ Ɓe mbinndi daliila kiita maako dow alluha bana ni'i: “Laamiiɗo Yahuudu'en.”

²⁷ Ɓe ɓildi fasooɓe ɗiɗo bee Yeesu haa leɗɗe gaafaaɗe, gooto haa nyaamo maako, gooto boo haa nano maako.

²⁸ [Bana nii ko deftere wi'i gooŋɗiri, nde wi'i: “Ɓe limi mo nder huuwooɓe zunuuba.”]

²⁹ Saalotooɓe ton ndimmbini ko'e muuɗum'en, kuɗi mo, ɓe mbi'i: “Hey! A wi'no a yibbinan haykaliiru, a mahtoto ndu nder nyalɗe tati.

³⁰ Jippa leggal gaafaaŋgal kadi, hisnu hoore ma!”

³¹ Bana non boo mawɓe liman'en e moodiɓɓe tawreeta njanci Yeesu, ɓe mbolwi hakkunde maɓɓe ɓe mbi'i: O hisni woɗɓe, ammaa o waawataa hisnugo hoore maako.

³² Sey en ngi'a Almasiihu, laamiiɗo Isra'iila jippo leggal gaafaaŋgal jonta, ngam haa en nuɗɗina mo. Koo ɓildaaɓe bee maako go boo kallini mo.

Maayde Yeesu

³³ Caka naaŋge nyiɓre suddi lesdi fuu haa yotti saa'a tati asiri.

³⁴ Saa'a tati Yeesu hooli bee sawtu: “Elohi, Elohi, lema sabaktani?” Bana wi'go: “Yaa Allah am, yaa Allah am, ngam ɗume a wudini yam?”

³⁵ Woɗɓe dariiɓe ton nani ɗum, ɓe mbi'i: “Ndaa o ɗon ewno Eliya.”

³⁶ Gooto maɓɓe yaawi suuwi sooso nder lammuɗam, taari ɗum dow loosol, nden o ɓaŋgti ɗum ngam yarnugo Yeesu, o wi'i: “Sey en ndeena e en ndaara to Eliya waran jippina mo diga leggal gaafaaŋgal.”

³⁷ Ammaa Yeesu hooli bee semmbe, o maayi.

³⁸ Wiirndallo nder haykaliiru seeki caka cak diga dow haa les.

³⁹ Nde ardiiɗo dow sooje'en Roma teemerre dariiɗo les leggal gaafaaŋgal yi'i no Yeesu maayri, o wi'i: “Fakat, goɗɗo oo o Ɓiɗɗo Allah.”

⁴⁰ Woodi boo rewɓe ton, ɓe ɗon ndaara diga daayiiɗum. Nder maɓɓe Mariyama mo wuro Magdala e Mariyama daada Yaakuba pamaro e Yoses e Salome.

⁴¹ Ɓe tokkino Yeesu, ɓe njagganino mo nde o ɗonno haa Galiili. Woodi boo rewɓe feere ɗuuɗɓe, ɓe ngarduno bee Yeesu haa Urusaliima.

Uweeki Yeesu

⁴² Nde ɗum nyalaade taaskara, bana wi'go nyalaade nde aartata nyannde siwtorde, nde hiiri,

⁴³ Yusufu mo wuro Arimatiya wari. O mawɗo tedduɗo caka dawrooɓe. O ɗon reeni garki laamu Allah boo. Kaŋko o tiɗɗini ɓernde maako, o yehi haa Pilaatu, o tori mo ɓanndu Yeesu.

⁴⁴ Pilaatu hayɗini nanugo Yeesu maayi law bana nii. O ewni mawɗo sooje'en go, o ƴami mo: “Neeɓi o maayi na?”

⁴⁵ Ɓaawo mawɗo sooje'en Roma anndini mo habaru man, o duŋani Yusufu hoosugo ɓanndu Yeesu.

⁴⁶ Yusufu soodi kasa ɗigguka, o jippini ɓanndu Yeesu, o hasni ndu, o wallini ndu nder yenaande wasaande nder tapaare. Nden o talli hayre mawnde, o maɓɓi nastirde yenaande.

⁴⁷ Mariyama mo Magdala e Mariyama daada Yoses ndaari haa ɓe mballini ɓanndu Yeesu.