Luka 3 - Fulfulde Bible

Waazu Yuhanna baɗoowo baptisma

¹ Nder hitaande sappo e jowaɓre haa laamu Tiberiyus Kaysara, laamiiɗo Roma, Pontiyus Pilaatu wonno ngomna dow lesdi Yahudiya, Hirudus laamani lesdi Galiili, deerɗum Filip boo laamani lesdi Itureya e lesdi Tarakonitis, Lisaniya boo laamani lesdi Abilen,

² Annas e Kayafas ngonno mawɓe liman'en. Saa'i man Allah wolwani Yuhanna ɓii Zekariya nder ladde.

³ O waanci lesdi kommbi maayo Urdun fuu, o waazini yimɓe ɓe tuuba, ɓe njaɓa baptisma ngam yaafuye hakkeeji maɓɓe.

⁴ Ɗum laati bana annabi Esaaya winnduno nder deftere muuɗum: “Goɗɗo ɗon hoola nder ladde: Mo'inane Jawmiraawo laawol, mbaɗane mo buuwi darnuɗi.

⁵ Waadiwol fuu fottitan, hooseere e towndiire fuu leestinte, laawol leliiŋgol fuu dartoto, laabi kalluɗi fuu mbootan.

⁶ Yimɓe fuu ngi'an kisndam Allah.”

⁷ Yimɓe ɗuuɗɓe ngari haa Yuhanna ngam o waɗana ɓe baptisma. O wi'i ɓe: “Ɓiɓɓe poosokje, moy wi'i on on kisan tikkere Allah warannde?

⁸ Kuuwe kuuɗe ɗe mbaŋginta on tuubi! Taa nume nder ɓerɗe mooɗon, on mbi'a: Ibrahiima woni kaaka amin. Ngam mi ɗon wi'a on, Allah woodi baawɗe waɗango Ibrahiima ɓiɓɓe bee kaa'e ɗe'e.

⁹ Jonta ma fe'irde ɗon taaski ngam fe'ugo lekki diga ɗaɗi mum: Lekki ki rimataa ɓiɓɓe booɗɗe fuu, ki fe'e, ki wudine nder yiite!”

¹⁰ Yimɓe ƴami mo: “Ɗume haani min mbaɗa kadi?”

¹¹ O jaabi ɓe: “Mo mari toggooje ɗiɗi, sey o sennda ɗe bee mo walaa sam. Marɗo nyaamdu boo, sey waɗa bana non.”

¹² Jomnooɓe boo ngari haa Yuhanna ngam ɓe njaɓa baptisma, ɓe ƴami mo: “Moodibbo, ɗume haani min mbaɗa?”

¹³ O jaabi ɓe: “Taa on njomna yimɓe ɓura ko ɓe umri on jaɓugo haa maɓɓe.”

¹⁴ Sooje'en boo ngari, ƴami mo bana non, ɓe mbi'i: “Minin boo, ko haani min mbaɗa?” O jaabi ɓe: “Taa on njaɓta jawdi koo moy malla on kooca ndi dow seedamku fewre. Ammaa ceyore ngeenaari mooɗon tan.”

¹⁵ Yimɓe ɗonno ndeena bee tammunde, koo moy ɗonno numa: “Teema Yuhanna oo woni Almasiihu.”

¹⁶ Yuhanna wi'i ɓe fuu maɓɓe: “Min mi ɗon waɗana on baptisma bee ndiyam, ammaa goɗɗo ɓurɗo yam baawɗe tammi wargo. Koo fiistugo ɓoggi paɗe maako maa, mi he'aay. O waɗanan on baptisma bee Ruuhu Ceniiɗo e bee yiite.

¹⁷ O woodi jaartirɗum haa juŋngo maako, ngam senndirgo alkamaari bee nyaande. O mooɓtan alkamaari haa beembal maako, ammaa o wulan nyaande bee yiite nge nyifataa sam.”

¹⁸ Bee wasuyeeji ɗuuɗɗi, Yuhanna heɓi waazingo ummaatoore kubaruwol belŋgol.

¹⁹ Yuhanna feli Hirudus ngam o te'i Hirudiya, debbo deerɗiiko e ngam kuuɗe kalluɗe feere feereeje ɗe o huuwi.

²⁰ Nden Hirudus waɗi ko ɓuri hallugo fahin: O nastini Yuhanna fursina.

Yeesu jaɓi baptisma

²¹ Ɓaawo yimɓe fuu njaɓi baptisma, Yeesu boo jaɓi ka. Nde o ɗon waɗa do'a, asama maɓɓiti,

²² Ruuhu Allah jippi dow maako bana poola. Sawtu boo iwi haa asama, wi'i: “An woni Ɓiɗɗo am giɗaaɗo, mi ɗon seyoro ma masin.”

Lencitorde Yeesu

²³ Yeesu waɗi baakin duuɓi cappanɗe tati nde o fuɗɗi kuugal maako. Fodde ko yimɓe numi, kaŋko o ɓii Yusufu, Yusufu boo o ɓii Heli.

²⁴ Heli ɓii Mattat, Mattat ɓii Lewi, Lewi ɓii Melki, Melki ɓii Yannay, Yannay ɓii Yusufu,

²⁵ ɓii Mattatiya, ɓii Amos, ɓii Nahum, ɓii Hesli, ɓii Naggay,

²⁶ ɓii Maata, ɓii Mattatiya, ɓii Seme'in, ɓii Yosek, ɓii Yoda,

²⁷ ɓii Yowanan, ɓii Resa, ɓii Zorobaabila, ɓii Salatiyel, ɓii Neri,

²⁸ ɓii Melki, ɓii Addi, ɓii Koosam, ɓii Elmadam, ɓii Eri,

²⁹ ɓii Yosuwa, ɓii Eli'ezer, ɓii Yorim, ɓii Mattat, ɓii Lewi,

³⁰ ɓii Simeyon, ɓii Yahuuda, ɓii Yusufu, ɓii Yonam, ɓii Eliyakim,

³¹ ɓii Meleya, ɓii Menna, ɓii Mattata, ɓii Natan, ɓii Daawuda,

³² ɓii Yessa, ɓii Obet, ɓii Bo'es, ɓii Salmuuna, ɓii Nahasunu,

³³ ɓii Amminadabu, ɓii Admin, ɓii Arni, ɓii Hesruunu, ɓii Peres, ɓii Yahuuda,

³⁴ ɓii Yaakubu, ɓii Isiyaaku, ɓii Ibrahiima, ɓii Tara, ɓii Nahor,

³⁵ ɓii Saruku, ɓii Re'u, ɓii Falek, ɓii Eber, ɓii Sala,

³⁶ ɓii Kaynam, ɓii Arfasada, ɓii Sem, ɓii Nuuhu, ɓii Lamek,

³⁷ ɓii Matusala, ɓii Anuhu, ɓii Yaret, ɓii Maleliyel, ɓii Kaynam,

³⁸ ɓii Enos, ɓii Setu, ɓii Aadamu, ɓii Allah.