Luka 10 - Fulfulde Bible

Nelki nelaaɓe cappanɗe njoweeɗiɗo e ɗiɗo

¹ Ɓaawo maajum Jawmiraawo suɓi pukara'en woɗɓe cappanɗe njoweeɗiɗo e ɗiɗo, o neli ɓe ɗiɗo ɗiɗo yeeso maako, nder berniiji e gure haa o yahata fuu.

² O wi'i ɓe: “Ƴaamle ɗuuɗi, ammaa sodooɓe ɗuuɗaay. Tore jawmu ƴaamnde o ɓesda nelugo sodooɓe haa ƴaamnde maako.

³ Njehe, mi neli on bana baali caka caafaali.

⁴ Taa njahde bee booro ceede malla booro njooɓaari, koo paɗe. Taa ndare ngam koofnotiron bee goɗɗo dow laawol boo.

⁵ Saare ndeyeere nastoton fuu, mbi'e tawon: Salaaman laatano saare nde'e.

⁶ To goɗɗo giɗɗo salaaman ɗon haa saare man, salaaman mooɗon jooɗoto dow maako. To woodaa boo, salaaman man lortoto haa mooɗon.

⁷ Njooɗe haa saare maajum, nyaame, njare ko ɓe ndokkata on fuu. Ngam kuuwoowo he'i heɓugo ngeenaari muuɗum. Taa cotte saare nde'e haa ndeya.

⁸ To on nasti wuro koo ngoye, to ɓe njaɓɓake on, nyaame ko ɓe ngaddanta on.

⁹ Njamɗitine nyawɓe ɓe on tawi ton fuu, mbi'e ɓe: Laamu Allah ɓaditake on!

¹⁰ Ammaa to on nasti wuro koo ngoye, ɓe njaɓɓaaki on, ngurte haa laabi maago, mbi'e:

¹¹ Min piɗɗani on koo collaaje wuro mooɗon haa kosɗe amin, ammaa annde laamu Allah ɓaditake!

¹² Mi ɗon wi'a on, nyannde darŋgal, kiita Sodoma hoyan dow kiita wuro man.”

Bone dow gure caliiɗe nuɗɗingo

¹³ “Bone laatano ma, an Korajin. Bone laatano ma, an Baytisayda. Ngam kaayeefiiji baɗaaɗi nder mooɗon, to ɗi mbaɗaano nder Tirus e Sidon kam, ɓooyma yimɓe ton njooɗotono nder ndoondi, ɓe ɓornotono buhuuje e ɓe ndufanno ndoondi dow ko'e maɓɓe.

¹⁴ Ngam maajum nyalaade darŋgal, kiita Tirus e Sidon hoyan dow kiita mooɗon.

¹⁵ An Kafarnahum, a ɗon tammo Allah ɓaŋgtete haa yotto asama na? Kayya! A leestinteeɗo haa a nasta joonde maayɓe!”

¹⁶ Yeesu wi'i pukara'en muuɗum: “Nananɗo on, nanani yam, caliiɗo on, salake yam, caliiɗo yam boo, salake nelɗo yam.”

Loraaki nelaaɓe cappanɗe njoweeɗiɗo e ɗiɗo

¹⁷ Nelaaɓe cappanɗe njoweeɗiɗo e ɗiɗo go ngarti bee seyo, ɓe mbi'i: “Jawmiraawo, koo ginnaaji ɗowtanake min ngam innde ma!”

¹⁸ Nden Yeesu wi'i ɓe: “Mi yi'i Sayɗaanu do'i diga dow bana ma'ere.

¹⁹ Ndaa, mi hokki on baawɗe dammugo boɗɗe e jahe e jaalaago baawɗe konneejo fuu. Koo ɗume naawnataa on.

²⁰ Ammaa taa ceye ngam ruuhuuji ɗowtanake on, ceye ngam inɗe mooɗon binndaaɗe haa asamanji.”

Yeesu seyi

²¹ Wakkati man Ruuhu hebbini Yeesu seyo, o wi'i: “Yaa Baabiraawo, Jawmu asama e lesdi, mi yetti ma ngam a waŋginani ɓikkoy pamaroy ko a suuɗi marɓe anndal e faamu. Ooho, yaa Baabiraawo, bana nii ɗum fottani ma.

²² Baabiraawo am halfini yam kuuje fuu. Walaa annduɗo moy woni Ɓiɗɗo sonaa Baabiraawo, walaa annduɗo boo moy woni Baabiraawo, sonaa Ɓiɗɗo e mo Ɓiɗɗo yiɗi waŋginango mo ɗum.”

²³ Nden o wayliti haa pukara'en, o wolwani ɓe feere maɓɓe: “Barka laatano gite gi'anɗe ko ngi'oton!

²⁴ Mi ɗon wi'a on: Annabi'en ɗuuɗɓe e laamiiɓe ɗuuɗɓe ngiɗno yi'ugo ko ngi'oton, ammaa ɓe ngi'aay. Ɓe ngiɗno nanugo ko nanoton, ammaa ɓe nanaay.”

Balndol Samariyaajo booɗɗo

²⁵ Moodibbo tawreeta ummi, ngam jarribaago Yeesu, o ƴami mo: “Moodibbo, ɗume mbaɗanmi ngam heɓugo ngeendam nduumiiɗam?”

²⁶ Yeesu wi'i mo: “Ko winnda nder tawreeta men? Ko jaŋngata ton?”

²⁷ O jaabi: “Ƴiɗ Jawmiraawo, Allah maaɗa bee ɓernde ma fuu, bee yoŋki ma fuu, bee semmbe ma fuu, bee hakkiilo ma fuu, non boo yiɗ keeddiɗɗiraawo ma bana no a yiɗiri hoore ma.”

²⁸ Yeesu wi'i mo: “A jaabake booɗɗum, waɗ bana non, a heɓan ngeendam.”

²⁹ Ammaa o yiɗi gooŋɗingo hoore maako, o wi'i Yeesu: “E moy woni keeddiɗɗiraawo am?”

³⁰ Yeesu wi'i: “Goɗɗo ummi Urusaliima ɗon yaha Yeriko. Fasooɓe pasi mo, ɓe njaɓti ko o mari fuu e ɓe piyi mo, ɓe ndilli, ɓe acci mo daande maayde.

³¹ Fottotiri boo limanjo feere tokki laawol man, yi'i goɗɗo go. O widdi sera, o saali.

³² Bana non Lewiijo wari haa nokkuure man, yi'i goɗɗo go. Kaŋko boo o widdi sera, o saali.

³³ Ammaa woodi Samariyaajo ɗonno yaha jahaaŋgal, o yotti kommbi pasaaɗo go. Nde o yi'i goɗɗo go, o yurmini mo.

³⁴ O ɓaditi, o rufi nebbam e inaboojam dow kuuduuje maako, o haɓɓi ɗe, o wa'ini mo mba'aawa maako, o yahri mo suudu, haa hoɗɓe mbeerata, o suklani mo.

³⁵ Jaŋngo man, o hoosi suleyje cardi ɗiɗi, o hokki jawmu suudu hoɗɓe, o wi'i: Suklan mo, to mi yaalti, mi lornante ɓurɗum ko a majjini.”

³⁶ Nden Yeesu wi'i: “Haa maaɗa kam, nder tato ɓe'e, moy a tammi o keeddiɗɗiraawo pasaaɗo?”

³⁷ Moodibbo tawreeta jaabi: “Mo waɗani mo enɗam.” Yeesu wi'i mo: “Yah an boo, waɗ bana non.”

Yeesu haa saare Marta e Mariyama

³⁸ Nde Yeesu ɗon yaha haa laawol bee pukara'en muuɗum, o nasti wuro feere, debbo bi'eteeɗo Marta jaɓɓi mo haa saare muuɗum.

³⁹ O woodi deerɗiraawo debbo, bi'eteeɗo Mariyama, mo jooɗi kommbi Jawmiraawo, ɗon nana wolde maako.

⁴⁰ Marta ɗon sukli jamum bee kuuɗe feere feere haa saare. O wari, o wi'i: “Jawmiraawo, walaa ko yaalu ma nde deerɗiraawo am acci yam, mi ɗon sukli feere am bee kuuɗe na? Wi' mo o wallammi!”

⁴¹ Jawmiraawo jaabi mo: “Marta, Marta, a ɗon ɓillori hoore ma bee kuuje ɗuuɗɗe.

⁴² Huunde woore tan wonete haandunde. Mariyama suɓi geɗal booɗŋgal, ngal hoosataake haa maako.”