Limle 6 - Fulfulde Bible

Umroore dow senaaɓe

¹ Jawmiraawo umri Muusa,

² o wi'a yimɓe Isra'iila ni'i: “To gorko malla debbo togake togayeere ngam laataago Naziriijo ngam Jawmiraawo,

³ nden kam taa o yara inaboojam e nguykinoojam sam. Taa o yara koo lammuɗam mbaɗaaɗam bee inaboojam malla nguykinoojam feere, koo ndiyam inabooje boo. Taa o nyaama ɓiɓɓe inabooje kecce malla joorɗe.

⁴ Wakkati togayeere maako fuu, taa o nyaama koo ɗume ko iwi haa inabohi, koo aawdi malla laral inabooje boo.

⁵ Wakkati togayeere maako fuu, taa beluhi meema hoore maako. Wakkati man fuu, o acca gaasa hoore maako e wakkude maako mawna, haa to nyalɗe togayeere maako timmi.

⁶ Wakkati man boo, taa o ɓadito maayɗo

⁷ koo to baaba maako malla daada maako malla deerɗiiko gorko malla debbo maayi, taa o soɓna hoore maako bee ɓaditaago maayɗo, ngam o cenaaɗo ngam Allah.

⁸ Wakkati togayeere maako fuu o cenaaɗo ngam Jawmiraawo.

⁹ To goɗɗo maayi bee juhuki kommbi maako, soɓni gaasa hoore maako, sey o laɓa ka, o laɓa ka nyannde joweeɗiɗawre, nden o laaɓan.

¹⁰ Nyannde joweetataɓre o waddana limanjo pooli masar ɗiɗi malla pooloy ɗiɗoy haa nastirde laymaaru fottirde.

¹¹ Limanjo lii'o gootel ngam ittuki hakke, gootel boo o wulana ngel Allah. Bana non o heɓnirta mo yaafuye hakke maako, ngam o soɓi bee meemugo maayɗo. Nden o sena hoore maako kadiboo.

¹² O laato cenaaɗo Jawmiraawo fahin, ngam saa'i cenki maako naane nafaay, gaasa maako soɓi. Sey o wadda boo jawgel ngel nduuɓu, ngel kirseteeŋgel ngam joɓki aybe maako.

¹³ Ndaa umroore dow Naziriijo mo timmini wakkati togayeere maako: Ɓe njahra mo haa nastirde laymaaru fottirde.

¹⁴ O waddana Jawmiraawo dabbaaji tati ɗi ngalaa aybe, jawgel ngel nduuɓu guleteeŋgel e bortel ngel nduuɓu kirseteeŋgel ngam ittuki hakke e njawdiri mbaalu kirseteendi ngam kawtal yimɓe bee Allah.

¹⁵ O wadda boo silaawo tamseeje ɗe kuroori njiiɓaandi bee nebbam e tamseeje bette tamsaaɗe bee nebbam, ɗe fuu ɗe ufnaaka. Non boo dokke nyaamdu e dokke dufeteeɗe bana ko haani.

¹⁶ Limanjo lii'ano Jawmiraawo kuuje ɗe'e fuu, taaskitina kirseteeŋga ngam ittuki hakke e nguleteeŋga.

¹⁷ Nden o lii'ano Jawmiraawo njawdiri kirseteendi ngam kawtal yimɓe bee Allah, hawtaade bee silaawo tamseeje e dokke nyaamdu e dokke dufeteeɗe.

¹⁸ Naziriijo man laɓa gaasa hoore mum coɓka haa nastirde laymaaru fottirde. Nden o sakkina ka nder yiite nge kirsaaŋga ngam kawtal yimɓe bee Allah ɗon wule dow muuɗum.

¹⁹ Ɓaawo man limanjo hoo'a balawal njawdiri defaaŋgal e tamseere woore e tamseere wetnde boo woore nder silaawo, ɗe ufnaaka. O wallina ɗum fuu dow juuɗe Naziriijo laɓɗo gaasa hoore mum.

²⁰ Nden limanjo ɓaŋgta ɗum, lii'o ɗum yeeso Jawmiraawo, ɗum dokkal ceniiŋgal ngam limanjo, ɗum yowe dow biiwol ɓaŋgtaaŋgol e daŋngo ittaaŋgo. Ɓaawoɗon Naziriijo heɓan yarugo inaboojam fahin.

²¹ Kanjum woni umroore dow Naziri'en waɗɓe togayeere. Ndaa dokkal ngal o waddanta Jawmiraawo, o ɓurna ɗum fodde jawdi maako. O hebbina togayeere maako fodde umroore cenki maako.”

Bolle barkiɗingo Isra'iila'en

²² Jawmiraawo umri Muusa,

²³ o wi'a Haruna e ɓiɓɓe mum: “Sey on mbarkiɗina Isra'iila'en bana ni'i:

²⁴ Jawmiraawo barkiɗina on, ayna on!

²⁵ Jawmiraawo woonana on, mo'ana on!

²⁶ Jawmiraawo laara on bee yerduye muuɗum, hokka on salaaman!

²⁷ Bana non ɓe mbarkiɗinirta Isra'iila'en bee innde am, min boo mi barkiɗinan ɓe.”