Limle 5 - Fulfulde Bible

Gurtinki soɓɓe

¹ Jawmiraawo wi'i Muusa:

² “Umru Isra'iila'en ɓe ngurtina yaasi saŋngeere marɗo saɗawre e koo moy marɗo nyawu ilnoowu fuu, non boo koo moy coɓruɗo bee meemugo maayɗo.

³ Ngurtine worɓe e rewɓe soɓɓe fuu yaasi ngam taa ɓe coɓna saŋngeere haa njooɗotoomi caka maɓɓe.”

⁴ Isra'iila'en mbaɗi ko Jawmiraawo wi'no Muusa. Ɓe ngurtini soɓɓe fuu yaasi saŋngeere.

Joɓki aybeeji

⁵ Jawmiraawo umri Muusa,

⁶ o wi'a Isra'iila'en ni'i: “To gorko malla debbo yewi umroore Jawmiraawo bee waɗango goɗɗo hakkewol koo ngole, o laatoto aybuɗo.

⁷ Nden sey o waŋgina hakke maako, o lorna ko o hoosi fuu e o ɓesda deydey yeɓre jowaɓre boo. O hokka ɗum goɗɗo mo o waɗi ɗum aybe.

⁸ Ammaa to o walaa banndiraawo ɓadiiɗo jaɓanɗo jobdi aybe man, nden kam ɗum laatanto Jawmiraawo, aybuɗo hokka ɗum limanjo. Ɗum ɓesdaari dow njawdiri mbaalu ngam heɓnango aybuɗo yaafuye.

⁹ Ko itta dow dokke ceniiɗe ɗe Isra'iila'en lii'anto Jawmiraawo fuu, laatanto limanjo lii'otooɗo ɗe.

¹⁰ Dokke ceniiɗe ɗe goɗɗo hokkata limanjo fuu, laatanto mo. E ko goɗɗo hokkata limanjo fuu boo laatanto mo.”

Seko dow hoolaare debbo

¹¹ Jawmiraawo umri Muusa,

¹² o wi'a Isra'iila'en ni'i: “To debbo te'aaɗo waɗi aybe, o waɗi sooynde hoolaare heedi goriiko,

¹³ to o waaldi bee goɗɗo, goriiko boo faamaay ɗum, o soɓi nder sirri, walaa giiɗo mo, walaa ceedoowo boo,

¹⁴ to o seki debbo maako, debbo oo soɓi malla boo o seki debbo maako, koo nde debbo oo soɓaay,

¹⁵ nden kam o yahra mo haa limanjo. O wadda boo dokkal ngam debbo oo, kuroori sa'iiruuri kilo tati, ammaa taa o ɓesda nebbam e uurle dow maari ngam ɗum dokkal nyaamdu ngam daliila seko, ɗum dokkal nyaamdu haa gooŋga waŋga.

¹⁶ Limanjo ɓaditina debbo oo, o darna mo yeeso Jawmiraawo.

¹⁷ Nden limanjo loowa ndiyam cenaaɗam nder fayannde loope. O hoo'a boo mbulwuldi ngondi nder laymaaru fottirde, o ukka ndi nder ndiyam go.

¹⁸ O darna debbo go yeeso Jawmiraawo, nden o fiista moorɗi maako, o wallina dokkal nyaamdu ngam daliila seko dow juuɗe maako haa gooŋga waŋga. Limanjo boo jogo ndiyam kaaɗɗam gaddanɗam naaloore.

¹⁹ Nden o hunna debbo bana ni'i: To a waɗaay njeenu, to a soɓnaay hoore ma, to a waɗaay gorko ma sooynde hoolaare, nden kam ndiyam kaaɗɗam gaddanɗam naaloore ɗa'am torrataa ma.

²⁰ Ammaa to a zammbake gorko ma, a waaldi bee gorko feere, to a toski hoore ma, a soɓni hoore ma, a njeeni,

^21-22 nden kam Jawmiraawo ukkano ma naaloore nde'e caka yimɓe ma, o wartire dimaro, o uppina reedu ma boo. Ndiyam gaddanɗam naaloore ɗa'am nasta teteki ma, uppina reedu ma, wartire dimaro.” Limanjo hunna mo hunayeere naaloore nde'e. Debbo boo jaabo: “Aamiina!”

²³ “Ɓaawo man limanjo winnda naalooje ɗe'e, loota ɗe nder ndiyam kaaɗɗam go.

²⁴ O yarna debbo man ndiyam kaaɗɗam gaddanɗam naaloore go, ɗam nasta nder maako, torra mo.

²⁵ Limanjo jaɓa dokkal nyaamdu ngam daliila seko go diga juuɗe debbo man, ɓaŋgta ngal yeeso Jawmiraawo, lii'o ngal dow hirsirde.

²⁶ O itta nder maagal tamndande woore, ɗum geɗal ciftinorgal, o wula ngal dow hirsirde, nden o yarna debbo ndiyam go.

²⁷ To debbo man soɓni hoore mum, waɗi sooynde hoolaare heedi gorum, nden kam ndiyam gaddanɗam naaloore torran mo masin, reedu maako uppan, o laatoto dimaro. Innde maako boo laatoto naalaande caka yimɓe maako.

²⁸ Ammaa to o laaɓɗo, o soɓnaay hoore maako, nden kam ɗam torrataa mo, o jooɗoto bilaa aybe, o heɓan danygol.

²⁹ Kanjum woni umroore dow haala seko, to debbo soɓni hoore mum bee waɗugo njeenu

³⁰ malla to goriiko seki mo, nden kam gorko man darna mo yeeso Jawmiraawo, limanjo boo waɗana mo fodde umroore nde'e.

³¹ Bana non gorko laaɓrata, debbo boo yara bone fodde aybe mum.”