Limle 35 - Fulfulde Bible

Berniiji Lewi'en

¹ Jawmiraawo wolwani Muusa nder laɗɗe Mo'ab baŋnge maayo Urdun, haa fuunaaŋge Yeriko, wi'i mo:

² “Umru Isra'iila'en ɓe ndokka Lewi'en berniiji goɗɗi haa maral maɓɓe, non boo durduɗe taariiɗe berniiji man.

³ Lewi'en mara berniiji ɗi'i, njooɗo ton. Durduɗe boo laatano dabbaaji maɓɓe.

⁴ Durduɗe man mbaɗa reeta kilomeetir haa yaasi mahi taariiɗi berniiji ɗi ndokkoton Lewi'en.

⁵ Sey on poonda yaasi berniwol kilomeetir gootel haa fuunaaŋge e fombina e hiirnaaŋge e woyla fuu, berniwol wona haa caka cak.

⁶ Sey on ndokka ɓe boo berniiji kisruɗi joweego. To goɗɗo mbari goɗɗo feere bilaa anniya, sey o dogga, o yaha ton. Ndokke ɓe berniiji cappanɗe nayi e ɗiɗi goɗɗi boo.

⁷ Limgal berniiji ɗi ndokkoton Lewi'en fuu, cappanɗe nayi e joweetati, berniiji bee durduɗe maaji.

⁸ Berniiji ɗi ndokkoton Lewi'en, koo'e ɗi haa mare le'i mon. To maral lenyol mawni, ngol hokka berniiji ɗuuɗɗi. To maral man famɗi boo, ngol hokka seɗɗa. Lenyol fuu hokka fodde maral ngal ngol heɓi.”

Gure kisruɗe

⁹ Jawmiraawo umri Muusa,

¹⁰ o wi'a Isra'iila'en ni'i: “To on eerake maayo Urdun, on nasti lesdi Kanaana boo,

¹¹ sey on cuɓana ko'e mon gure kisruɗe, ɗe laatanto on. To goɗɗo mbari goɗɗo feere bilaa anniya, nden kam o dogga, o yaha ton.

¹² Gure ɗe'e laatano on kisruɗe yeeso baatoowo. Mbarɗo goɗɗo mbarataake, sonaa to o darake yeeso kiita jama'aare.

¹³ Cuɓe gure kisruɗe joweego, ɗe laatano on:

¹⁴ Tati haa fuunaaŋge Urdun, tati boo nder lesdi Kanaana.

¹⁵ Ɗe laato kisruɗe ngam Isra'iila'en, non boo ngam jananɓe jooɗiiɓe caka mooɗon malla hoɗɓe. Koo moy mbari goɗɗo bilaa anniya, dogga nder wooto maaje.

¹⁶ Ammaa to o tappi mo bee njamndi haa o maayi, nden kam o mbari hoore, o mbareteeɗo.

¹⁷ Malla to o fiɗi mo bee hayre haa o maayi, nden kam o mbari hoore, o mbareteeɗo.

¹⁸ To o fiyi mo bee leggal haa o maayi, nden kam o mbari hoore, o mbareteeɗo.

¹⁹ Baatoowo mbara mo haa tawi mo fuu.

^20-21 Koo moy wanyi goɗɗo, dofli mo malla sakkini huunde dow maako malla lukki mo haa o maaya, o mbaroowo hoore, o mbareteeɗo. Baatoowo mbara mo haa tawi mo fuu.

²² Ammaa to goɗɗo hakkilaay, dofli goɗɗo feere malla sakkini huunde dow maako, mbari mo bilaa anniya, bilaa nganyŋgu boo

²³ malla to o laaraay, sakkini hayre, mbari goɗɗo mo o meeɗaay wanyugo ɗum, mo o yiɗaa naawnugo boo,

²⁴ nden kam jama'aare hiito hakkunde mbarɗo oo bee baatoowo fodde umrooje ɗe'e:

²⁵ Sey jama'aare hisna mbarɗo, taa juŋngo baatoowo heɓa mo. Jama'aare lortina mo haa wuro hisrude ngo o dogguno e mum. O jooɗo ton, haa hooreejo liman'en gujaaɗo nebbam ceniiɗam maaya.

²⁶ Ammaa to mbarɗo go wurtake wuro hisrude ngo o dogguno e mum,

²⁷ to baatoowo tawi mo yaasi keerol wuro man, mbari mo, nden kam aybe mbar-hoore do'ataa dow maako.

²⁸ Sey mbarɗo jooɗo nder wuro hisrude, haa to hooreejo liman'en nder wakkati man maayi. Ɓaawoɗon o heɓan hootugo saare maako.

²⁹ Kanjum ɗum laatano Isra'iila'en farilla tabitinanka kiita ndarnuka ngam gide mon fuu, koo toy on njooɗoto fuu.

³⁰ Koo moy mbari goɗɗo bee anniya, o mbareteeɗo dow seedamku seedooɓe ɗuuɗɓe, ammaa seedamku ceedoowo gooto he'ataa ngam hiitugo goɗɗo kiita mbareego.

³¹ Taa njaɓe coottaari yoŋki mbarɗo bee anniya ngam aybe maako do'i mo kiita mbareego, nden o mbareteeɗo fakat.

³² To goɗɗo doggi, yehi haa wuro hisrude boo, taa njaɓe coottaari ngam o hoota saare maako, aarta maayde hooreejo liman'en.

³³ To on mbaɗi irin ɗu'um, on coɓnan lesdi ndi njooɗiiɗon e mum. Ƴiiƴam mbaraaɗo soɓnan lesdi. Coɓki man ittataake, sonaa bee ƴiiƴam mbarɗo mo.

³⁴ Taa coɓne lesdi ndi njooɗiiɗon e mum, ngam min Jawmiraawo mi ɗon jooɗi caka Isra'iila'en nder lesdi ndi'i.”